Modern Central Saraiki Bible
احبار 8
ہارُون تے اُوندے پوتراں دی مخصوصیت
رب العالمین مُوسیٰ کُوں آکھیا، ”ہارُون تے اُوندے پوتراں کُوں، کاہِناں دے لباس کُوں، مسح کرݨ آلے تیل کُوں، گُناہ تُوں پاک کرݨ آلی قُربانی کیتے جوان ڈاند کُوں، ڈُو چھتریاں کُوں تے بے خمیری روٹیاں دی ٹوکری کُوں میڈے حضُور گِھن آنویں۔ وَل پُوری جماعت کُوں اِجتماع آلے تمبُو دے دَر اُتے جمع کریں۔“
مُوسیٰ رب العالمین دے حُکم دے مطابق اِینویں ای کیتا۔ جِیں ویلے یکی جماعت اِجتماع آلے تمبُو دے دَر اُتے کٹھی تھی گئی تاں مُوسیٰ اُنہاں کُوں آکھیا، ”ایہ اُوہو کم ہے جیندے کرݨ دا حُکم رب العالمین ڈِتے۔“ وَل او ہارُون تے اُوندے پوتراں کُوں سامنڑے گِھن آیا تے اُنہاں کُوں غُسل ڈِیوایا۔ اُوں ہارُون کُوں لینن دا زیر جامہ پوا تے کمر بند بدھیا، وَل اُونکُوں چوغہ پوایا جیندے اُتے اُوں بالاپوش کُوں اُوں پٹکے نال بدھیا جیہڑا مہارت نال اُنڑیا ہویا ہا۔ اِیندے بعد اُوں اُنہاں اُتے سینے دا کپڑا لایا تے اُوندے ءچ ڈوہائیں قُرعے بنام اُورِیم تے تُمیّم رکھے۔ وَل اُوں ہارُون دے سر اُتے عمامہ بدھیا جیندے سامنڑے آلے حصے اُتے اُوں مُقدّس تاج یعنی سونے دی پتری لا ڈِتی۔ سبھ کُجھ اُوں حُکم دے مطابق تھیّا جیہڑا رب العالمین مُوسیٰ کُوں ڈِتا ہا۔
اِیندے بعد مُوسیٰ مُقدّس تمبُو تے اِیندے ءچ جیہڑا کُجھ ہا، اُونکُوں مسح کرݨ آلا تیل لا تے مخصوص تے مُقدّس کیتا۔ اُوں ایہ تیل جانور پیش کرݨ آلی قُربان گاہ دے اُتے سَت پھیری چِھنڈکیا۔ اِینویں اُوں اُونکُوں، اُوندے سامان، غسل آلے حوض تے اُوندی چوکی اُتے تیل لا تے اُنہاں کُوں مخصوص تے مُقدّس کیتا۔ اُوں ہارُون دے سر اُتے مسح کرݨ آلا تیل وِیٹ تے اُونکُوں مسح کیتا۔ اِینویں او مخصوص تے مُقدّس تھی گِیا۔
وَل مُوسیٰ ہارُون دے پوتراں کُوں سامنڑے گِھن آ تے اُنہاں کُوں زیر جامے پوائے تے کمر بند بدھے تے اُنہاں دے سِراں اُتے پگاں بدھیاں۔ سبھ کُجھ اُوں حُکم دے مطابق تھیّا جیہڑا رب العالمین مُوسیٰ کُوں ڈِتا ہا۔
وَل مُوسیٰ گُناہ تُوں پاک کرݨ آلی قُربانی کیتے جوان ڈاند پیش کیتا۔ ہارُون تے اُوندے پوتراں آپنڑے ہتھ اُوندے سر اُتے رکھے۔ مُوسیٰ اُونکُوں ذبح کِیتا تے اُوندی کُجھ رَت گِھن تے آپنڑی انگل نال قُربان گاہ دے سینگاں اُتے لا ڈِتی، تاں جو او پاک تھی ونجے۔ باقی رَت اُوں قُربان گاہ دے تلے آلے حصے اُتے وِیٹ ڈِتی۔ اِینویں اُوں اُونکُوں مُقدّس کر تے قُربانی کیتے مخصوص جاہ بنڑایا۔ مُوسیٰ آندراں دی یکی چربی، جِگر دی چربی تے ڈوہائیں گُردے چربی سمیت گِھن تے قُربان گاہ اُتے ساڑ ڈِتے۔ پر ڈاند دے باقی حصیاں کُوں اُوندی کَھل، گوشت تے آندراں دے گوبر سمیت اُوں ڈیرے تُوں باہر وَنج تے ساڑ ڈِتا۔ سبھ کُجھ اُوں حُکم دے مطابق تھیّا جیہڑا رب العالمین مُوسیٰ کُوں ڈِتا ہا۔
وَل اُوں ساڑے ونجنڑ آلی قُربانی کیتے پہلا چھترا پیش کیتا۔ ہارُون تے اُوندے پوتراں آپنڑے ہتھ اُوندے سر اُتے رکھے۔ مُوسیٰ اُونکُوں ذبح کر تے اُوندی رَت قُربان گاہ دے چارے پاسُوں چِھنڈک ڈِتی۔ اُوں چھترے کُوں ٹوٹے ٹوٹے کر تے اُوندی چربی، سر تے ٹوٹے ساڑ ڈِتے۔ اُوں آندراں تے پِنیاں پانڑی نال دھو تے یکے چھترے کُوں قُربان گاہ اُتے ساڑ ڈِتا۔ ایہ رب العالمین کیتے ساڑے ونجنڑ آلا نذرانہ ہا تے اُوندی خوشبو رب العالمین کُوں پسند ہئی۔ سبھ کُجھ اُوں حُکم دے مطابق تھیّا جیہڑا رب العالمین مُوسیٰ کُوں ڈِتا ہا۔
اِیندے بعد مُوسیٰ ڈُوجھے چھترے کُوں پیش کیتا جِیندے نال کاہِناں کُوں خدمت کیتے مقرر کرنڑا ہا۔ ہارُون تے اُوندے پوتراں آپنڑے ہتھ چھترے دے سر اُتے رکھ ڈِتے۔ مُوسیٰ اُونکُوں ذبح کیتا تے اُوندی کُجھ رَت گھن تے ہارُون دے سجے کَن دی لو، تے اُوندے سجے ہتھ دے انگوٹھے تے سجے پیر دے انگوٹھے اُتے لا ڈِتی۔ وَل اُوں ہارُون دے پوتراں کُوں سامنڑے گِھن آ تے اُنہاں دے سجے کَن دی لو، سجے ہتھ دے انگوٹھے تے سجے پیر دے انگوٹھے اُتے رَت لائی۔ باقی رَت اُوں قُربان گاہ دے چارے پاسُوں چِھنڈک ڈِتی۔ اُوں چھترے دی چربی، پُچھڑ، آندراں دی یکی چربی، جِگر دی چربی، ڈوہائیں گُردے چربی سمیت تے سجی ستھل اَنج کیتی۔ وَل اُوں رب العالمین دے حضُور پئی ہوئی بے خمیری روٹیاں دی ٹوکری ءچوں ہِک سادی روٹی، ہِک تیل رلے اٹّے نال بنڑی ہوئی روٹی تے ہِک پتلی روٹی جیندے اُتے تیل لایا گِیا ہا، گِھن تے سجی ستھل تے چربی اُتے رکھ ڈِتی۔ اُوں ایہ سبھ کُجھ ہارُون تے اُوندے پوتراں دے ہتھاں اُتے رکھ تے اُونکُوں ہلائے ونجنڑ آلی قُربانی دے طور تے رب العالمین کُوں پیش کیتا۔ وَل اُوں ایہ شیواں اُنہاں تُوں واپس گِھن تے قُربان گاہ اُتے ساڑ ڈِتیاں جیندے اُتے پہلے ساڑے ونجنڑ آلی قُربانی پئی ہئی۔ رب العالمین کیتے ساڑے ونجنڑ آلا ایہ نذرانہ کاہِن مقرر کرݨ کیتے پیش کیتا گِیا تے اُوندی خوشبو رب العالمین کُوں پسند ہئی۔
وَل مُوسیٰ سینہ گِھدا تے اُونکُوں ہلائے ونجنڑ آلی قُربانی دے طور تے رب العالمین دے حضُور ہلایا۔ کاہِن مقرر کرݨ دے چھترے ءچوں ایہ حصہ مُوسیٰ دا ہا۔ سبھ کُجھ اُوں حُکم دے مطابق تھیّا جیہڑا رب العالمین مُوسیٰ کُوں ڈِتا ہا۔
اِیندے بعد مُوسیٰ مسح کرݨ آلا کُجھ تیل تے قُربان گاہ دے اتُوں کُجھ رَت گِھن تے ہارُون، اُوندے پوتراں تے اُنہاں دے کپڑیاں اُتے چِھنڈک ڈِتے۔ اِینویں اُوں اُنہاں کُوں تے اُنہاں دے کپڑیاں کُوں مخصوص تے مُقدّس کیتا۔
مُوسیٰ اُنہاں کُوں آکھیا، ”گوشت کُوں اِجتماع آلے تمبُو دے دروازے اُتے اُبال تے اُونکُوں اُنہاں روٹیاں نال کھوائے جیہڑیاں کاہِن مقرر کرݨ آلے نذرانے دی ٹوکری ءچ پئیاں ہِن، جِینویں مَیں حُکم ڈِتے جو ہارُون تے اُوندے پوتر کھاوݨ۔ گوشت تے روٹیاں ءچوں جیہڑا کُجھ بچ ونجے اُونکُوں ساڑ ڈیوائے۔ جئیں تئیں تُہاڈے کاہِن مقرر ہووݨ دے ڈینہہ پُورے نہ تھی ونجنڑ، سَت ڈینہہ تئیں اِجتماع آلے تمبُو دے دروازے تُوں باہر نہ ونجائے کیوں جو تُہاکُوں مقرر ہووݨ کیتے سٹ ڈینہہ لگسن۔ جیہڑا کُجھ اَج تھئے او رب العالمین دے حُکم دے مطابق تھئے تاں جو تُہاڈا کفارہ ڈِتا وَنج سگے۔ تُساں سَت ڈینہہ رات اِجتماع آلے تمبُو دے دروازے دے اندر رہوائے تے رب العالمین دی اِیں ہدایت کُوں منائے نہ تاں مر ویسو کیوں جو میکُوں ایہ حُکم رب العالمین دی طرفوں ڈِتا گئے۔“
ہارُون تے اُوندے پوتراں او سبھ کُجھ کیتا، جیہڑا رب العالمین مُوسیٰ دی معرفت آکھیا ہا۔
Modern Central Saraiki Bible. Copyright © Strategic Resource Group. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.