احبار 7

قصُور تُوں رہائی دی قُربانی

1قصُور دی قُربانی جیہڑی بہُوں مُقدّس ہے، اُوندے بارے ءچ شرع ایہ ہے جو 2قصُور دی قُربانی اُتھاں ذبح کرائے جِتھاں ساڑے ونجنڑ آلی قُربانی ذبح کیتی ویندی ہے۔ اُوندی رَت قُربان گاہ دے چارے پاسُوں چِھنڈکی ونجے۔ 3اُوندی یکی چربی کڈھ تے قُربان گاہ اُتے چڑھائی ونجے یعنی اُوندی پُچھڑ تے آندراں دی یکی چربی، 4گُردے اُوں چربی سمیت جیہڑی اُنہاں اُتے تے کَنڈ دے نیڑے ہوندی ہے تے جِگر دی چربی۔ اُنہاں شیواں کُوں گُردیاں دے نال ای اَنج کرائے۔ 5کاہِن ایہ سبھ کُجھ رب العالمین کُوں قُربان گاہ اُتے ساڑے ونجنڑ آلے نذرانے دے طور تے پیش کرے۔ ایہ قصُور دی قُربانی ہے۔ 6کاہِناں دے خانداناں دے یکے مرد اُونکُوں کھا سگدے ہِن پر اُونکُوں مُقدّس جاہ اُتے کھادا ونجے۔ ایہ بہُوں پاک ہے۔

7گُناہ تُوں پاک کرݨ آلی تے قصُور دی قُربانی کیتے ہِکو شرع ہے۔ جیہڑا کاہِن قُربانی پیش کر تے کفارہ ڈیسی، اُونکُوں اُوندا گوشت مِلسی۔ 8تے جیہڑا کاہِن کہیں دی ساڑے ونجنڑ آلی قُربانی پیش کریسی، اُونکُوں جانور دی کَھل مِلسی۔ 9تے تنُور ءچ یا کڑاہی ءچ یا توّے اُتے پکائے گئے غلے دا ہر نذرانہ اُوں کاہِن کُوں مِلسی جیہڑا اُونکُوں پیش کریسی۔ 10پر غلے دے باقی نذرانے بھانویں او سُکے ہووݨ یا اُنہاں ءچ تیل رَلایا گِیا ہووے، ہارُون دے یکے پوتراں کُوں برابر مِلدے راہسن۔

سلامتی دی قُربانی

11سلامتی دی قُربانی جیہڑی رب العالمین کُوں پیش کیتی ویندی ہے، اُوندے بارے ءچ شرع ایہ ہے جو 12جیکر کوئی اِیں قُربانی کُوں شُکرگزاری دے طور تے پیش کرے تاں او قُربانی دے جانور نال بے خمیری روٹی جیندے ءچ تیل پاتا گِیا ہووے تے بے خمیری پتلی روٹی جیندے اُتے تیل لایا گِیا ہووے تے او روٹی وی جیندے ءچ بہترین میدہ تے تیل رَلا یا گِیا ہووے پیش کرے۔ 13اِیندے علاوہ او آپنڑی قُربانی نال خمیری روٹی وی پیش کرے۔ 14پیش کرݨ آلا آپنڑے نذرانے دی ہر قسم دی روٹی ءچوں ہِک ہِک روٹی رب العالمین کیتے نذ ر کرے۔ ایہ اُوں کاہِن دا حصہ ہوسی جئیں سلامتی دی قُربانی دی رَت قُربان گاہ اُتے چِھنڈکی ہوسی۔ 15شُکرگزاری دے طور تے کیتی گئی سلامتی دی قُربانی دا گوشت اُوں ڈینہہ ای کھادا ونجے۔ آندی سویل تئیں کُجھ باقی نئیں بچنڑاں چاہیدا۔

16جے قُربانی کُوں کہیں مَنت مَن تے یا خوشی نال پیش کیتا ہووے تاں اُوندا گوشت اُونہئی ڈینہہ کھادا ونجے پر جے بچ ونجے تاں ولدی ڈینہوار وی کھادا وَنج سگدے۔ 17پر جیکر کُجھ گوشت تریجھی ڈینہوار تئیں بچ ونجے تاں اُونکُوں ساڑ ڈِتا ونجے۔ 18جیکر اُونکُوں تریجھی ڈینہوار کھادا ونجے تاں رب العالمین اِیں قُربانی کُوں قبول نہ کریسی تے نہ ای پیش کرݨ آلے دے حساب ءچ شامل کریسی۔ بلکہ قُربانی دا گوشت ناپاک قرار ڈِتا ویسی۔ جیہڑا وی اُونکُوں کھاسی، اُونکُوں آپنڑے گُناہ دی سزا بُھگتنڑی پوسی۔

19جیکر ایہ گوشت کہیں ناپاک شے نال لگ ونجے تاں وَل اِیں گوشت کُوں کھاوݨ دی بجائے ساڑ ڈِتا ونجے۔ جیکر گوشت پاک ہے تاں ہر پاک صاف بندہ اِینکُوں کھا سگدے۔ 20پر جیکر کوئی بندہ رب العالمین کُوں پیش کیتی گئی سلامتی دی قُربانی دا ایہ گوشت ناپاکی دی حالت ءچ کھاوے تاں اُونکُوں بنی اِسرائیل ءچوں کڈھ ڈِتا ونجے۔ 21جیکر کہیں بندے کہیں ناپاک شے کُوں ہتھ لا ڈِتا ہووے، بھانویں او ناپاک بندہ، جانور یا کوئی بئی مکرُوہ ناپاک شے ہووے، جیکر اِیہو جِیہا بندہ رب العالمین کُوں پیش کیتی گئی سلامتی دی قُربانی دا گوشت کھاوے تاں اُونکُوں بنی اِسرائیل ءچوں کڈھ ڈِتا ونجے۔“

چربی تے رَت کھاوݨ منع ہے

22رب العالمین مُوسیٰ کُوں آکھیا، 23”بنی اِسرائیل کُوں ڈسا جو تُساں گاں، ڈاند، بھیڈ تے بکریاں دی چربی نہ کھوائے۔ 24تُساں موئے ہوئے تے پھاڑے ہوئے جانوراں دی چربی بئے کماں کیتے اِستعمال کر سگدے ہیوے پر اُونکُوں ہرگز نہ کھوائے۔ 25جیہڑا وی اُوں ساڑے ونجنڑ آلے نذرانے ءچوں کھاوے جیہڑا رب العالمین کُوں پیش کیتا گِیا ہووے، اُونکُوں بنی اِسرائیل ءچوں کڈھ ڈِتا ونجے۔ 26جِتھاں وی تُساں راہندے ہیوے، اُتھاں پکھیاں یا جانوراں دی رَت نہ کھوائے۔ 27جیہڑا وی رَت کھاوے، اُونکُوں بنی اِسرائیل ءچوں کڈھ ڈِتا ونجے۔“

قُربانیاں ءچوں کاہِن دا حصہ

28رب العالمین مُوسیٰ کُوں آکھیا، 29”بنی اِسرائیل کُوں ڈسا جو ’جیہڑا رب العالمین کُوں سلامتی دی قُربانی پیش کرے او رب العالمین کیتے ہِک حصہ نذر کرے۔ 30او ساڑے ونجنڑ آلا ایہ نذرانہ آپنڑے ہتھیں رب العالمین کُوں پیش کرے۔ اِیندے کیتے او جانور دی چربی تے سینہ رب العالمین دے حضُور ہلائے ونجنڑ آلی قُربانی1 دے طور تے پیش کرے۔ 31کاہِن چربی کُوں قُربان گاہ دے اُتے ساڑ ڈیوے پر سینہ ہارُون تے اُوندے پوتراں دا حصہ ہووے۔ 32سلامتی دی قُربانی دی سجی ستھل کاہِن کُوں ہلاوݨ آلے ہدیے دے طور تے ڈِتی ونجے۔ 33جیہڑا کاہِن سلامتی دی قُربانی دی رَت تے چربی پیش کریسی، اُونکُوں سجی ستھل مِلسی۔

34بنی اِسرائیل دیاں سلامتی دیاں قُربانیاں ءچوں مَیں ہلائے ونجنڑ آلی قُربانی دا سینہ تے چاتے ونجنڑ آلی ستھل کاہِناں کُوں ڈِتی ہے۔ ایہ شیواں ہمیشاں کیتے بنی اِسرائیل ولُوں کاہِناں دا حصہ ہِن‘۔“

35ایہ اُوں ڈینہہ تُوں ساڑے ونجنڑ آلے نذرانیاں ءچوں ہارُون تے اُوندے پوتراں دا حصہ بنڑ گئیاں ہِن جیہڑے ڈینہہ اُنہاں کُوں کاہِن دے طور تے رب العالمین دی خدمت کرݨ کیتے کھڑایا گِیا ہا۔ 36جِیں ویلے اُنہاں کُوں تیل نال مسح کیتا گِیا ہا، اُوں ڈینہوار رب العالمین حُکم ڈِتا ہا جو بنی اِسرائیل ایہ حصہ کاہِناں کُوں ڈِتا کرݨ۔ ایہ نسل در نسل اُنہاں دا حق ہے۔

37ایہ یکی شرع ساریاں قُربانیاں کیتے ہے یعنی ساڑے ونجنڑ آلی قُربانی، غلے دے نذرانے، گُناہ تُوں پاک کرݨ آلی قُربانی، قصُور دی قُربانی، کاہِن مقرر کرݨ دی قُربانی تے سلامتی دی قُربانی کیتے۔ 38رب العالمین مُوسیٰ کُوں ایہ شرع سِینا پہاڑ اُتے اُوں ڈینہوار ڈِتی جِیں ویلے اُوں بنی اِسرائیل کُوں حُکم ڈِتا جو او سِینا دے بیابان ءچ رب العالمین کُوں آپنڑیاں قُربانیاں پیش کرݨ۔