Modern Central Saraiki Bible
احبار 6
وَل رب العالمین مُوسیٰ کُوں آکھیا، ”جے کہیں گُناہ کر تے رب العالمین نال بے اِیمانی کیتی ہووے، مثلاً امانت یا گِروی رکھی ہوئی کہیں شے دے بارے ءچ آپنڑے ہمسائے کُوں دوکھا ڈِتا ہووے یا اُوندی چوری کیتی ہووے یا اُوندے اُتے ظلم کیتا ہووے، یا کہیں دی گُم تھئی شے اُونکُوں مِلی ہووے پر اُوں جھوٹ بولیا ہووے، یا قَسم کھا تے کُوڑ بولیا ہووے یا اِیں طرحاں دا کوئی بِیا گُناہ کیتا ہووے۔ جے او اِیں طرحاں دا کوئی گُناہ کر تے قصُوروار تھیّا ہووے تاں لازم ہے جو او اُوہو شے واپس کرے جیہڑی اُوں ظلم کر تے چِھکی یا چوری کیتی ہئی یا جیہڑی اُوندے کولھ امانت دے طور تے ہئی یا او گُمشدہ شے جیہڑی اُونکُوں مِلی ہئی، یا او شے جیندے بارے ءچ اُوں قَسم کھا تے کُوڑ بولیا ہا۔ او اُوندا اُتنا ای واپس کر تے وِیہہ فیصد زیادہ ڈیوے تے او ایہ سبھ کُجھ اُوں ڈینہہ واپس کرے جِیں ویلے او آپنڑے قصُور دی قُربانی پیش کرے۔ قصُور دی قُربانی دے طور تے او ہِک بے عیب تے مقررہ قیمت آلا چھترا کاہِن دے کولھ گِھن آوے تے رب العالمین کُوں پیش کرے۔ وَل کاہِن رب العالمین دے حضُور اُوندا کفارہ ڈیسی تے اُونکُوں آپنڑے قصُوراں تُوں معافی مِل ویسی۔“
ساڑے ونجنڑ آلی قُربانی
رب العالمین مُوسیٰ کُوں آکھیا، ”ہارُون تے اُوندے پوتراں کُوں ایہ حُکم ڈے جو ساڑے ونجنڑ آلیاں قُربانیاں دے بارے ءچ شرع ایہ ہے جو ساڑے ونجنڑ آلیاں قُربانیاں پُوری رات سویل تئیں قُربان گاہ اُتے راہوݨ تے اُوندی بھاہ کُوں وِسمنڑ نہ ڈیوائے۔ سویلے کاہِن لینن دا لباس تے لینن دا پجامہ پا تے ساڑی ہوئی قُربانی دی سواہ قُربان گاہ تُوں چا تے اُوندے کولھ زمین اُتے سٹے۔ وَل او کپڑے لہا تے عام کپڑے پاوے تے سواہ کُوں ڈیرے تُوں باہر کہیں پاک صاف جاہ تے گِھن ونجے۔ قُربان گاہ اُتے بھاہ بلدی راہوے، او کڈھائیں نہ وِسمے۔ ہر سویل کاہِن لکڑیاں چُنڑ تے اُوندے اُتے ساڑے ونجنڑ آلی قُربانی ترتیب نال رکھے تے اُوندے اُتے سلامتی دی قُربانی دی چربی ساڑ ڈیوے۔ قُربان گاہ اُتے بھاہ ہمیشاں بلدی راہوے، او کڈھائیں نہ وِسمے۔
غلے دا نذرانہ
غلے دے نذرانے دے بارے ءچ شرع ایہ ہے جو ہارُون دے پوتر اُونکُوں قُربان گاہ دے سامنڑے رب العالمین دے حضُور پیش کرݨ۔ وَل کاہِن نذرانے ءچوں تیل رَلیا ہویا مُٹھ جِتّی بہترین میدہ تے یکا لُبان گِھن تے یادگار دے حصے دے طور تے قُربان گاہ اُتے ساڑ ڈیوے۔ ایہ خوشبو رب العالمین کُوں پسند ہے۔ ہارُون تے اُوندے پوتر قُربانی دا باقی حصہ کھا گِھننڑ، پر او مُقدّس جاہ اُتے کھاوݨ یعنی اِجتماع آلے تمبُو دے صحن دے اندر۔ تے اُوندے ءچ خمیر نہ ہووے۔ اُونکُوں پکاوݨ ویلے اُوندے ءچ خمیر نہ ہووے۔ مَیں ساڑے ونجنڑ آلے نذرانیاں ءچوں ایہ حصہ اُنہاں کیتے مقرر کیتے۔ ایہ گُناہ تُوں پاک کرݨ آلی قُربانی تے قصُور دی قُربانی آلی کار بہُوں پاک ہے۔ ہارُون دی اولاد دے یکے مرد اُونکُوں کھا سگدے ہِن۔ رب العالمین دے ساڑے ونجنڑ آلے نذرانیاں ءچوں نسل در نسل ایہ اُنہاں دا حصہ ہوسی۔ جیہڑا وی اُونکُوں ہتھ لیسی، او مخصوص تے مُقدّس تھی ویسی1۔“
وَل رب العالمین مُوسیٰ کُوں آکھیا، ”جیہڑے ڈینہہ ہارُون تے اُوندے پوتراں کُوں کاہِن بنڑاوݨ کیتے تیل نال مسح کیتا ونجے تاں او ڈیڈھ کلو بہترین میدہ پیش کرݨ۔ اُوندا ادھا حصہ سویل کُوں تے ادھا حصہ شام ویلے پیش کیتا ونجے۔ اُوندے ءچ تیل رَلا تے توّے اُتے پکاونڑیں۔ وَل اُونکُوں ٹوٹے ٹوٹے کر تے غلے دے نذرانے دے طور تے پیش کیتا ونجے۔ اُوندی خوشبو رب العالمین کُوں پسند ہے۔ ایہ نذرانہ ہمیشاں ہارُون دی نسل دا او بندہ پیش کرے جِینکُوں مسح کر تے کاہِنِ اعظم دا عُہدہ ڈِتا گِیا ہووے تے او اُونکُوں پُورے طور تے رب العالمین کیتے ساڑ ڈیوے۔ ایہ شرع ہمیشاں کیتے ہے۔ کاہِن دے غلے دے نذرانے کُوں ہمیشاں پُورے طور تے ساڑیا ونجے۔ اُونکُوں کڈھائیں نہ کھادا ونجے۔“
گُناہ تُوں پاک کرݨ آلی قُربانی
رب العالمین مُوسیٰ کُوں آکھیا، ”ہارُون تے اُوندے پوتراں کُوں ڈسا جو گُناہ تُوں پاک کرݨ آلی قُربانی دے بارے ءچ شرع ایہ ہے جو گُناہ تُوں پاک کرݨ آلی قُربانی کُوں رب العالمین دے حضُور اُتھائیں ذبح کرائے جِتھاں ساڑے ونجنڑ آلی قُربانی ذبح کیتی ویندی ہے۔ او بہُوں پاک ہے۔ اُونکُوں پیش کرݨ آلا کاہِن مُقدّس جاہ اُتے یعنی اِجتماع آلے تمبُو دے صحن دے اندر کھاوے۔ جیہڑا وی اِیں قُربانی دے گوشت کُوں ہتھ لا گِھندے، او مخصوص تے مُقدّس تھی ویندے۔ جیکر قُربانی دی رَت دیاں چِھنڈاں کہیں لباس اُتے لگ ونجنڑ تاں اُونکُوں مُقدّس جاہ اُتے دھوائے۔ جیکر گوشت کُوں مِٹی دی ہانڈی ءچ پکایا گِیا ہووے تاں اُوں تھاں کُوں بعد ءچ بَھن ڈیوائے۔ جیکر اُونکُوں پِتّل دے تھاں ءچ پکایا گِیا ہووے تاں اُونکُوں چنگی طرحاں مانج تے پانڑی نال دھوائے۔ کاہِناں دے خانداناں دے یکے مرد اُونکُوں کھا سگدے ہِن۔ ایہ کھانڑا بہُوں پاک ہے۔ پر گُناہ تُوں پاک کرݨ آلی ہر او قُربانی جیندی رَت مُقدّس کمرے ءچ کفارہ ڈیوݨ کیتے اِجتماع آلے تمبُو ءچ گِھن آئی گئی ہووے، نہ کھادی ونجے بلکہ اُونکُوں ساڑ ڈِتا ونجے۔
Source notes (1)
- Footnote ایہ کوئی شرف یا بھلائی آلی گالھ نئیں بلکہ اِیندے پارُوں او نقصان چیسی۔
Modern Central Saraiki Bible. Copyright © Strategic Resource Group. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.