احبار 5

گُناہ تُوں پاک کرݨ آلیاں قُربانیاں کیتے ہدایتاں

1جے کوئی اِینویں گُناہ کرے جو اُوں کوئی جُرم ڈِٹھا ہووے یا اُوندے بارے ءچ کُجھ جانڑدا ہووے پر جڈاں آکھیا ونجے جو گواہ سامنڑے آوݨ تاں او گواہی نئیں ڈینڈا، تاں اِیں صورت ءچ اُونکُوں آپنڑے گُناہ دی سزا بُھگتنڑی پوسی۔

2یا جے کوئی بندہ کہیں ناپاک شے کُوں نہ جانڑدے ہوئے ہتھ لا ڈیوے بھانویں او کہیں جنگلی جانور، مال مویشی یا ریڑھن آلے جانور دی لاش ای کیوں نہ ہووے، تاں اِیں صورت ءچ او ناپاک ہے تے قصُوروار کھڑسی۔

3یا جے کوئی بندہ اِنسانی گندگی کُوں نہ جانڑدے ہوئے ہتھ لا ڈیوے، یعنی کہیں ایجھی شے کُوں جیندے نال اِنسان ناپاک تھی ویندے تاں جِیں ویلے اُونکُوں اِیں گالھ دا پتہ لگے، اُوں ویلے او قصُوروار کھڑسی۔

4یا جے کہیں بندے بے پرواہی ءچ کُجھ کرݨ دی قَسم چاتی ہووے، بھانویں او کم چنگا ہا یا مندا، جِیں ویلے اُونکُوں آپنڑی بے پرواہی دا پتہ لگ ویندے تاں او قصُوروار کھڑسی۔

5جیہڑا اِیں طرحاں دے کہیں گُناہ پارُوں قصُوروار ہووے، لازم ہے جو او آپنڑا گُناہ تسلیم کرے۔ 6وَل او رب العالمین دے حضُور آپنڑے گُناہ دے عِوض، گُناہ تُوں پاک کرݨ آلی قُربانی دے طور تے ہِک بھیڈ یا بکری پیش کرے۔ اِینویں کاہِن اُوں بندے دے گُناہ دا کفارہ ڈیسی۔

7جے قصُوروار بندہ غریبی پارُوں آپنڑے گُناہ دے جرمانے دے طور تے بھیڈ یا بکری نہ ڈے سگے، تاں او رب العالمین کُوں ڈُو گُھگیاں یا ڈُو جوان کبوتر پیش کرے۔ ہِک گُناہ تُوں پاک کرݨ آلی قُربانی کیتے تے ہِک ساڑے ونجنڑ آلی قُربانی کیتے۔ 8او اُنہاں کُوں کاہِن دے کولھ گِھن آوے۔ کاہِن پہلے اُوں پکھی کُوں پیش کرے جیہڑا گُناہ تُوں پاک کرݨ آلی قُربانی کیتے ہے۔ او اُوندی گِچی مروڑ ڈیوے پر اِینویں جو سر اَنج نہ تھیوے۔ 9وَل او اُوندی رَت ءچوں کُجھ قُربان گاہ دے ہِک پاسے چِھنڈکے، باقی رَت او قُربان گاہ دے تلے آلے حصے اُتے ڈھاوݨ ڈیوے۔ ایہ گُناہ تُوں پاک کرݨ آلی قُربانی ہے۔ 10وَل کاہِن ڈُوجھے پکھی کُوں حُکم دے مطابق ساڑے ونجنڑ آلی قُربانی دے طور تے پیش کرے۔ اِینویں کاہِن اُوں بندے دے گُناہ دا کفارہ ڈیسی تے اُونکُوں معافی مِل ویسی۔

11جے او بندہ غریبی پارُوں ڈُو گُھگیاں یا ڈُو جوان کبوتر وی نہ ڈے سگے تاں وَل او گُناہ تُوں پاک کرݨ آلی قُربانی کیتے ڈیڈھ کلو1 بہترین میدہ پیش کرے۔ او اُوندے اُتے نہ تیل وِیٹے تے نہ لُبان رکھے کیوں جو ایہ گُناہ تُوں پاک کرݨ آلی قُربانی ہے۔ 12او اُونکُوں کاہِن دے کولھ گِھن آوے تے کاہِن اُوندے ءچوں ہِک مُٹھ میدہ یادگاری دے طور تے اُنہاں نذرانیاں دے نال ساڑ ڈیوے جیہڑے رب العالمین کیتے ساڑے ویندے ہِن۔ ایہ گُناہ تُوں پاک کرݨ آلی قُربانی ہے۔ 13اِینویں کاہِن اُوں بندے دے گُناہ دا کفارہ ڈیسی تے اُونکُوں معافی مِل ویسی۔ باقی میدہ غلے دے نذرانے آلی کار کاہِن دا حصہ ہے۔“

قصُور تُوں رہائی دی قُربانی

14رب العالمین مُوسیٰ کُوں آکھیا، 15”جے کہیں رب العالمین دیاں مخصوص تے مُقدّس شیواں دے بارے ءچ غیر اِرادی طور تے گُناہ کیتا ہووے ت اں او بندہ قصُور دی قُربانی دے طور تے رب العالمین کُوں بے عیب چھترا یا بکرا پیش کرے۔ اُوندی قیمت مُقدّس تمبُو دے سِکے دے مطابق چاندی دے مقررہ سِکے دے برابر ہوونڑی چاہیدی ہے۔ 16جِتنا نُقصان مُقدّس تمبُو کُوں تھیّا ہووے، اُتنا ای او ڈیوے۔ اِیندے علاوہ وِیہہ فیصد بِیا ڈیوے تے کاہِن دے حوالے کر ڈیوے تے کاہِن چھترے کُوں قصُور دی قُربانی دے طور تے پیش کر تے اُوندا کفارہ ڈیوے۔ اِینویں اُونکُوں معافی مِل ویسی۔

17جے کوئی غیر اِرادی طور تے گُناہ کر تے رب العالمین دا کوئی حُکم تروڑے تاں او قصُوروار ہے تے اُوندا ذمہ دار ہوسی۔ 18او قصُور دی قُربانی دے طور تے کاہِن دے کولھ بے عیب تے مقررہ قیمت آلا چھترا گِھن آوے۔ وَل کاہِن ایہ قُربانی اُوں قصُور دے کفارہ کیتے پیش کرے جیہڑا اُوں بندے غیر اِرادی طور تے کیتا ہووے۔ اِینویں اُونکُوں معافی مِل ویسی۔ 19ایہ قصُور دی قُربانی ہے کیوں جو او گُناہ کر تے رب العالمین دا قصُوروار بنڑے۔“