احبار 4

گُناہ تُوں پاک کرݨ آلی قُربانی

1رب العالمین مُوسیٰ کُوں آکھیا، 2”بنی اِسرائیل کُوں ڈسا جو جیہڑا وی غیر اِرادی طور تے گُناہ کر تے رب العالمین دے کہیں حُکم کُوں تروڑے او ایہ کرے:

3جیکر کاہِنِ اعظم گُناہ کرے تے نتیجے ءچ یکی قوم قصُوروار تھیوے تاں وَل او ہِک بے عیب جوان ڈاند گِھن تے رب العالمین کُوں گُناہ تُوں پاک کرݨ آلی قُربانی دے طور تے پیش کرے۔ 4او جوان ڈاند کُوں اِجتماع آلے تمبُو دے دَر تے گِھن آوے تے آپنڑا ہتھ اُوندے سر اُتے رکھ تے اُونکُوں رب العالمین دے حضُور ذبح کر ڈیوے۔ 5وَل او ڈاند دی کُجھ رَت گِھن تے تمبُو ءچ گِھن آوے۔ 6اُتھاں او آپنڑی انگل رَت ءچ بوڈ تے اُونکُوں سَت پھیری رب العالمین دے حضُور سبھ تُوں مُقدّس کمرے دے پڑدے دے سامنڑے چِھنڈکے۔ 7وَل او رب العالمین دے حضُور خوشبودار مصالحہ ساڑن آلی اُوں قُربان گاہ دے سینگاں اُتے رَت لاوے جیہڑی تمبُو ءچ ہے۔ باقی رَت او باہر تمبُو دے دَر دے کولھ ساڑے ونجنڑ آلیاں قُربانیاں دی قُربان گاہ دے تلے آلے حصے اُتے وِیٹے۔ 8جوان ڈاند دی یکی چربی، آندراں دی یکی چربی، 9گُردے اُوں چربی سمیت جیہڑی اُنہاں دے اُتے تے کَنڈ دے نیڑے ہوندی ہے تے جِگر دی چربی کُوں گُردیاں دے نال ای اَنج کرے۔ 10ایہ بالکل اُوں طریقے نال کیتا ونجے جِیں طریقے نال اُوں ڈاند نال کیتا ویندے جیہڑا سلامتی دی قُربانی کیتے پیش کیتا ویندے۔ کاہِن ایہ سبھ کُجھ ساڑے ونجنڑ آلیاں قُربانیاں دی قُربان گاہ اُتے ساڑ ڈیوے۔ 11پر اُوندی کَھل، اُوندا سارا گوشت، سر تے پاوے، آندراں تے اُنہاں دا گوبر 12ڈیرے دے باہر گِھن ونجے۔ او ایہ شیواں اُوں پاک صاف جاہ اُتے جِتھاں قُربانیاں دی سواہ سٹی ویندی ہے، لکڑیاں اُتے رکھ تے ساڑ ڈیوے۔

قوم کیتے گُناہ تُوں پاک کرݨ آلی قُربانی

13جیکر بنی اِسرائیل دی پُوری جماعت غیر اِرادی طور تے گُناہ کر تے رب العالمین دے کہیں حُکم کُوں تروڑیا ہووے تے جماعت کُوں اِیں گالھ دا احساس وی نہ ہووے، تاں وی او قصُوروار ہے۔ 14جِیں ویلے لوکاں کُوں پتہ لگے جو اساں گُناہ کیتے تاں جماعت اِجتماع آلے تمبُو دے کولھ ہِک جوان ڈاند گِھن آوے تے اُونکُوں گُناہ تُوں پاک کرݨ آلی قُربانی دے طور تے پیش کرے۔ 15جماعت دے بزُرگ رب العالمین دے حضُور آپنڑے ہتھ ڈاند دے سر اُتے رکھنڑ تے اُونکُوں رب دے حضُور ذبح کر ڈیوݨ۔ 16وَل کاہِنِ اعظم ڈاند دی کُجھ رَت گِھن تے اِجتماع آلے تمبُو ءچ گِھن آوے۔ 17اُتھاں او آپنڑی انگل رَت ءچ بوڈ تے اُونکُوں سَت پھیری رب العالمین دے حضُور سبھ تُوں مُقدّس کمرے دے پڑدے دے سامنڑے چِھنڈکے۔ 18وَل او رب العالمین دے حضُور خوشبودار مصالحہ ساڑن آلی اُوں قُربان گاہ دے سینگاں اُتے رَت لاوے جیہڑی تمبُو ءچ ہے۔ باقی رَت او باہر تمبُو دے دَر دے کولھ ساڑے ونجنڑ آلیاں قُربانیاں دی قُربان گاہ دے تلے آلے حصے اُتے وِیٹے۔ 19اِیندے بعد اُوندی یکی چربی کڈھ تے قُربان گاہ اُتے ساڑ ڈیوے۔ 20اِیں ڈاند دے نال کاہِن اُوہو سبھ کُجھ کرے جیہڑا اُوں آپنڑے ذاتی گُناہ دی قُربانی دے ڈاند نال کیتا ہا۔ اِینویں او جماعت دا کفارہ ڈیسی تے اُنہاں کُوں معافی مِل ویسی۔ 21وَل او اُوں ڈاند کُوں ڈیرے دے باہر گِھن تے اِینویں ساڑ ڈیوے جِینویں اُوں پہلے آلے ڈاند کُوں ساڑیا ہا۔ ایہ جماعت کُوں گُناہ تُوں پاک کرݨ آلی قُربانی ہے۔

قوم دے سردار کیتے گُناہ تُوں پاک کرݨ آلی قُربانی

22جیکر کوئی سردار غیر اِرادی طور تے گُناہ کر تے رب العالمین دے کہیں حُکم کُوں تروڑے تے اِیں پارُوں قصُوروار بنڑے تاں 23جِیں ویلے اُونکُوں پتہ لگے جو میڈے تُوں گُناہ تھئے تاں او قُربانی کیتے بے عیب بکرا گِھن آوے۔ 24او آپنڑا ہتھ بکرے دے سر اُتے رکھ تے اُونکُوں اُتھاں ذبح کرے جِتھاں رب العالمین دے حضُور ساڑے ونجنڑ آلیاں قُربانیاں دے جانور ذبح کیتے ویندے ہِن۔ ایہ گُناہ تُوں پاک کرݨ آلی قُربانی ہے۔ 25کاہِن آپنڑی انگل رَت ءچ بوڈ تے اُونکُوں ساڑے ونجنڑ آلیاں قُربانیاں دی قُربان گاہ دے چارے سینگاں اُتے لاوے۔ باقی رَت او قُربان گاہ دے تلے آلے حصے اُتے وِیٹ ڈیوے۔ 26وَل او اُوندی یکی چربی قُربان گاہ اُتے اِینویں ساڑ ڈیوے جِینویں او سلامتی دی قُربانی دی چربی ساڑ ڈیندے۔ اِینویں کاہِن اُوں سردار دا کفارہ ڈیسی تے اُونکُوں معافی مِل ویسی۔

عام لوکاں کیتے گُناہ تُوں پاک کرݨ آلی قُربانی

27جیکر کوئی عام بندہ غیر اِرادی طور تے گُناہ کر تے رب العالمین دے کہیں حُکم کُوں تروڑے، تے قصُوروار تھی ونجے 28تاں جِیں ویلے اُونکُوں پتہ لگے جو میڈے تُوں گُناہ تھئے تاں او قُربانی کیتے ہِک بے عیب بکری گِھن آوے۔ 29او آپنڑا ہتھ بکری دے سر اُتے رکھ تے اُونکُوں اُتھاں ذبح کرے جِتھاں ساڑے ونجنڑ آلیاں قُربانیاں دے جانور ذبح کیتے ویندے ہِن۔ 30کاہِن آپنڑی انگل رَت ءچ بوڈ تے اُونکُوں ساڑے ونجنڑ آلیاں قُربانیاں دی قُربان گاہ دے چارے سینگاں اُتے لاوے۔ باقی رَت او قُربان گاہ دے تلے آلے حصے اُتے وِیٹ ڈیوے۔ 31وَل او اُوندی یکی چربی اُوں طریقے نال کڈھے جِینویں او سلامتی دی قُربانی دی چربی کڈھیندے۔ اِیندے بعد او اُونکُوں قُربان گاہ اُتے ساڑ ڈیوے۔ اِیں قُربانی دی خوشبو رب العالمین کُوں پسند ہے۔ اِینویں کاہِن اُوں بندے دا کفارہ ڈیسی تے اُونکُوں معافی مِل ویسی۔

32جیکر او بندہ گُناہ تُوں پاک کرݨ آلی قُربانی کیتے بھیڈ دا لیلا گِھن آوے تاں او بے عیب مادی ہووے۔ 33او آپنڑا ہتھ اُوندے سر اُتے رکھ تے اُونکُوں اُتھاں ذبح کرے جِتھاں ساڑے ونجنڑ آلیاں قُربانیاں دے جانور ذبح کیتے ویندے ہِن۔ 34کاہِن آپنڑی انگل رَت ءچ بوڈ تے اُونکُوں ساڑے ونجنڑ آلیاں قُربانیاں دی قُربان گاہ دے چارے سینگاں اُتے لاوے۔ باقی رَت او قُربان گاہ دے تلے آلے حصے اُتے وِیٹ ڈیوے۔ 35وَل او اُوندی یکی چربی اُوں طریقے نال کڈھے جِینویں سلامتی دی قُربانی کیتے جوان بھیڈ دی چربی کڈھی ویندی ہے۔ اِیندے بعد کاہِن چربی کُوں قُربان گاہ اُتے اُنہاں نذرانیاں سمیت ساڑ ڈیوے جیہڑے رب العالمین کیتے ساڑے ویندے ہِن۔ اِینویں کاہِن اُوں بندے دا کفارہ ڈیسی تے اُونکُوں معافی مِل ویسی۔