احبار 3

سلامتی دی قُربانی

1جیکر کوئی رب العالمین کُوں سلامتی دی قُربانی پیش کرݨ کیتے ڈھورڈنگر پیش کرے تاں او جانور بے عیب ہووے بھانویں نَر ہووے یا مادہ۔ 2او آپنڑا ہتھ جانور دے سر اُتے رکھ تے اُونکُوں اِجتماع آلے تمبُو دے دَر اُتے ذبح کر ڈیوے۔ ہارُون دے پوتر جیہڑے کاہِن ہِن، اُوندی رَت قُربان گاہ دے چارے پاسُوں چِھنڈکنڑ۔ 3قُربانی کرݨ آلا سلامتی دی قُربانی ءچوں، رب العالمین کیتے ساڑے ونجنڑ آلے نذرانے دے طور تے ایہ شیواں پیش کرے یعنی آندراں دی یکی چربی، 4گُردے اُوں چربی سمیت جیہڑی اُنہاں اُتے تے کَنڈ دے نیڑے ہوندی ہے تے جِگر دی چربی۔ او اِنہاں شیواں کُوں گُردیاں دے نال ای اَنج کرے۔ 5وَل ہارُون دے پوتر ایہ سبھ کُجھ ساڑے ونجنڑ آلی قُربانی دے نال قُربان گاہ دیاں لکڑیاں اُتے ساڑ ڈیوݨ۔ ایہ ساڑے ونجنڑ آلا نذرانہ ہے تے اِیندی خوشبو رب العالمین کُوں پسند ہے۔

6جیکر رب العالمین کُوں سلامتی دی قُربانی پیش کرݨ کیتے جانور بھیڈ بکریاں ءچوں چُنڑیا ونجے تاں او بے عیب نَر یا مادہ ہووے۔

7جیکر او بھیڈ دا لیلا پیش کرے تاں اُونکُوں رب العالمین دے حضُور گِھن آوے 8تے آپنڑا ہتھ اُوندے سر اُتے رکھ تے اُونکُوں اِجتماع آلے تمبُو دے سامنڑے ذبح کرے۔ ہارُون دے پوتر اُوندی رَت قُربان گاہ دے چارے پاسُوں چِھنڈکنڑ۔‏ 9قُربانی کرݨ آلا سلامتی دی قُربانی ءچوں، رب العالمین کیتے ساڑے ونجنڑ آلے نذرانے دے طور تے پُوری چربی پیش کرے یعنی یکی پُچھڑ جیہڑی کَنڈ دے کولُھوں کٹی گئی ہووے، آندراں دے اُتوں دی یکی چربی، 10گُردے اُوں چربی سمیت جیہڑی اُنہاں اُتے تے کَنڈ دے نیڑے ہوندی ہے تے جِگر دی چربی۔ او اِنہاں شیواں کُوں گُردیاں دے نال ای اَنج کرے۔ 11کاہِن ایہ سبھ کُجھ رب العالمین کُوں پیش کر تے قُربان گاہ اُتے ساڑ ڈیوے۔ کھاوݨ آلیاں ایہ شیواں ساڑے ونجنڑ آلا نذرانہ ہے۔

12جیکر رب العالمین کیتے سلامتی دی قُربانی بکری ہووے 13تاں پیش کرݨ آلا اُوندے اُتے ہتھ رکھ تے اُونکُوں اِجتماع آلے تمبُو دے سامنڑے ذبح کرے۔ ہارُون دے پوتر جانور دی رَت قُربان گاہ دے چارے پاسُوں چِھنڈکنڑ۔‏ 14قُربانی کرݨ آلا سلامتی دی قُربانی ءچوں، رب العالمین کیتے ساڑے ونجنڑ آلے نذرانے دے طور تے ایہ شیواں پیش کرے یعنی آندراں دی یکی چربی، 15گُردے اُوں چربی سمیت جیہڑی اُنہاں اُتے تے کَنڈ دے نیڑے ہوندی ہے تے جِگر دی چربی۔ او اِنہاں شیواں کُوں گُردیاں دے نال ای اَنج کرے۔ 16وَل کاہِن ایہ سبھ کُجھ ساڑے ونجنڑ آلی قُربانی دے نال قُربان گاہ اُتے ساڑ ڈیوے۔ کھاوݨ آلیاں ایہ شیواں ساڑے ونجنڑ آلا نذرانہ ہے تے اِیندی خوشبو رب العالمین کُوں پسند ہے۔

یکی چربی رب العالمین دی ہے۔ 17تُہاڈے کیتے رَت یا چربی کھاوݨ منع ہے۔ ہر جاہ جِتھاں تُساں راہسو، ایہ تُہاڈے کیتے نسل در نسل ہِک ابدی قانُون ہوسی۔“