احبار 2

غلے دا نذرانہ

1جیکر کوئی رب العالمین کُوں غلے دا نذرانہ پیش کرے تاں او اِیندے کیتے بہترین میدہ گِھن آوے، تے اُوندے اُتے زیتون دا تیل ویٹے۔ وَل اُوندے اُتے لُبان1 رکھ تے 2اُونکُوں ہارُون دے پوتراں کولھ گِھن آوے جیہڑے کاہِن ہِن۔ کاہِن تیل رَلیا ہویا ہِک مُٹھ میدہ تے سارا لُبان گِھن تے قُربان گاہ اُتے ساڑ ڈیوے۔ ایہ یادگاری دا حصہ ہے تے اِیں نذرانے دی خوشبو رب العالمین کُوں پسند ہے۔ 3غلے دے نذرانے دا باقی میدہ تے تیل ہارُون تے اُوندے پوتراں دا حصہ ہے۔ ایہ رب العالمین کیتے ساڑے ونجنڑ آلے نذرانیاں ءچوں بہُوں مُقدّس حصہ ہے۔

4جیکر غلے دا نذرانہ تنُور ءچ پکائیاں ہوئیاں روٹیاں ہووݨ تاں او تیل رلے ہوئے بہترین میدے دیاں بے خمیری روٹیاں ہووݨ، یا بے خمیری پتلیاں روٹیاں ہووݨ جِنہاں اُتے تیل لایا گِیا ہووے۔

5جیکر غلے دا نذرانہ توّے اُتے پکائی ہوئی روٹی ہووے تاں او تیل تے بہترین میدے دی بے خمیری روٹی ہووے۔ 6روٹی کُوں ٹوٹے ٹوٹے کر تے اُوندے اُتے تیل وِیٹیا ونجے، ایہ غلے دا نذرانہ ہے۔

7جیکر غلے دا نذرانہ کڑاہی ءچ پکائی ہوئی روٹی ہووے تاں او بہترین میدے تے تیل دی ہووے۔

8تُوں اِنہاں شیواں دا غلے دا نذرانہ رب العالمین دے حضُور گِھن آ تے اُنہاں کُوں کاہِن دے سامنڑے پیش کریں۔ کاہِن اِینکُوں قُربان گاہ دے کولھ گِھن آوے، 9وَل کاہِن غلے دے نذرانے ءچوں یادگاری دا حصہ گِھن تے اُونکُوں قُربان گاہ اُتے ساڑ ڈیوے۔ اِیں نذرانے دی خوشبو رب العالمین کُوں پسند ہے۔ 10غلے دے نذرانے دا باقی حصہ ہارُون تے اُوندے پوتراں کیتے ہے۔ او رب العالمین کیتے ساڑے ونجنڑ آلے نذرانیاں ءچوں بہُوں مُقدّس حصہ ہے۔

11غلے دے جتنے نذرانے تُساں رب العالمین کُوں پیش کریندے ہیوے، اُنہاں ءچ خمیر نہ ہووے۔ تُساں رب العالمین کُوں ساڑے ونجنڑ آلے نذرانے ڈیوݨ ویلے ماکھی تے خمیر نہ سڑائے۔ 12ایہ شیواں فصل دے پہلے پھل دے طور تے رب العالمین کُوں پیش کیتیاں وَنج سگدیاں ہِن۔ پر اِنہاں کُوں قُربان گاہ اُتے خوشبو دے طور تے نہ ساڑیا ونجے۔ 13غلے دے ہر نذرانے ءچ نمک ہووے کیوں جو نمک اُوں عہد دی نمائندگی کریندے جیہڑا تیڈے خُدا تیڈے نال کیتے۔ تُوں ہر نذرانے ءچ نمک پاویں۔

14جیکر تُوں غلے دے نذرانے کیتے فصل دے پہلے پھل رب العالمین کُوں پیش کریں تاں بُھنے ہوئے تازہ سِٹے ہتھاں نال مَل تے پیش کریں۔ 15اِیندے اُتے تیل وِیٹ تے لُبان رکھیں کیوں جو او غلے دا نذرانہ ہے۔ 16کاہِن مِندھے ہوئے سِٹے تے تیل ءچوں یادگاری دا حصہ یکے لُبان نال ساڑے۔ ایہ نذرانہ رب العالمین کیتے ساڑے ونجنڑ آلا نذرانہ ہے۔