احبار 1

ساڑے ونجنڑ آلی قُربانی

1رب العالمین اِجتماع آلے تمبُو ءچوں مُوسیٰ کُوں اواز ڈے تے آکھیا، 2”بنی اِسرائیل کُوں ڈسا جو:

جِیں ویلے تُہاڈے ءچوں کوئی رب العالمین کُوں قُربانی پیش کرے تاں او آپنڑے ڈھورڈنگراں یا بھیڈاں بکریاں ءچوں جانور چُنڑ تے گِھن آوے۔

3جیکر او آپنڑے ڈھورڈنگراں ءچوں ساڑے ونجنڑ آلی قُربانی پیش کرے تاں او بے عیب نَر چُنڑ تے اُونکُوں اِجتماع آلے تمبُو دے دَر تے پیش کرے تاں جو رب العالمین اُونکُوں قبول کرے۔ 4قُربانی پیش کرݨ آلا آپنڑا ہتھ جانور دے سر اُتے رکھے تے ایہ قُربانی اُوندا کفارہ ڈیوݨ کیتے قبول کیتی ویسی۔ 5قُربانی پیش کرݨ آلا رب العالمین دے حضُور ڈاند کُوں ذبح کرے، وَل ہارُون دے پوتر جیہڑے کاہِن ہِن، اُوندی رَت رب العالمین کُوں پیش کر تے اِجتماع آلے تمبُو دے دَر دے کولھ قُربان گاہ دے چارے پاسُوں چِھنڈکنڑ۔ 6اِیندے بعد قُربانی ڈیوݨ آلا، کَھل لہا تے جانور دے ٹوٹے ٹوٹے کرے۔ 7ہارُون کاہِن دے پوتر قُربان گاہ اُتے بھاہ لاوݨ تُوں بعد اُوندے اُتے ترتیب نال لکڑیاں رکھنڑ۔ 8او جانور دے ٹوٹے، سر تے چربی اُنہاں لکڑیاں اُتے ترتیب نال رکھنڑ۔ 9قُربانی پیش کرݨ آلا پہلے ڈنگر دیاں آندراں تے لتاں دھووے۔ وَل کاہِن یکے جانور کُوں قُربان گاہ اُتے ساڑ ڈیوے۔ ایہ ساڑے ونجنڑ آلی قُربانی ہے تے اِیں نذرانے دی خوشبو رب العالمین کُوں پسند ہے۔

10جیکر ساڑے ونجنڑ آلی قُربانی بھیڈاں بکریاں ءچوں چُنڑی ونجے تاں او بے عیب نَر ہووے۔ 11پیش کرݨ آلا اُونکُوں رب العالمین دے حضُور قُربان گاہ دے شمال آلے پاسے ذبح کرے۔ وَل ہارُون دے پوتر جیہڑے کاہِن ہِن، اُوندی رَت قُربان گاہ دے چارے پاسُوں چِھنڈکنڑ۔ 12اِیندے بعد قُربانی ڈیوݨ آلا جانور دے ٹوٹے کرے تے کاہِن ایہ ٹوٹے، سر تے چربی قُربان گاہ دیاں بلدیاں لکڑیاں اُتے ترتیب نال رکھے۔ 13قُربانی پیش کرݨ آلا پہلے جانور دیاں آندراں تے لتاں دھووے، وَل کاہِن یکے جانور کُوں رب العالمین دے حضُور پیش کر تے قُربان گاہ اُتے ساڑ ڈیوے۔ ایہ ساڑے ونجنڑ آلی قُربانی ہے تے اِیں نذرانے دی خوشبو رب العالمین کُوں پسند ہے۔

14جیکر رب العالمین کیتے ساڑے ونجنڑ آلی قُربانی پکھی ہووے تاں او گُھگی یا جوان کبوتر ہووے۔ 15کاہِن اُونکُوں قُربان گاہ دے کولھ گِھن آوے تے اُوندی گِچی مروڑ تے سر اَنج کرے تے اُونکُوں قُربان گاہ اُتے ساڑ ڈیوے۔ او اُوندی رَت قُربان گاہ دے ہِک پاسُوں تلے ڈھاوݨ ڈیوے۔ 16او اُوندا پوٹہ تے جیہڑا کُجھ اُوندے اندر ہووے، کڈھ تے قُربان گاہ دے مشرق آلے پاسے سَٹ ڈیوے، جِتھاں سواہ سٹی ویندی ہے۔ 17وَل کاہِن پکھی دے کھمب پکڑ تے اُونکُوں چیرے پر اِینویں جو او ٹوٹے ٹوٹے نہ تھی ونجے۔ وَل کاہِن اُونکُوں قُربان گاہ دیاں بلدیاں ہوئیاں لکڑیاں اُتے ساڑ ڈیوے۔ ایہ ساڑے ونجنڑ آلی قُربانی ہے تے اِیں نذرانے دی خوشبو رب العالمین کُوں پسند ہے۔