خرُوج 40

مُقدّس تمبُو کھڑا کرݨ دیاں ہدایتاں

1وَل رب العالمین مُوسیٰ کُوں آکھیا، 2”پہلے مہینے دی پہلی تاریخ کُوں اِجتماع آلا تمبُو کھڑا کریں۔ 3عہد دا صندوق اندر رکھ تے اُونکُوں لُکاوݨ کیتے پڑدہ لاویں۔ 4اِیندے بعد مخصوص روٹیاں دی میز اندر گِھن آ تے اُوندا سامان اُوندے اُتے رکھیں۔ وَل چراغ دان وی گِھن آنویں تے اُوندے ڈیوے اُوندے اُتے رکھیں۔ 5خوشبودار مصالحہ ساڑن کیتے سونے دی قُربان گاہ عہد دے صندوق دے سامنڑے رکھیں تے وَل تمبُو ءچ وڑن آلی جاہ اُتے پڑدہ لانویں۔ 6ساڑے ونجنڑ آلیاں قُربانیاں پیش کرݨ دی قُربان گاہ، اِجتماع آلے تمبُو دے دروازے دے سامنڑے رکھی ونجے۔ 7مُقدّس تمبُو تے اِیں قُربان گاہ دے وچال غُسل آلا حوض رکھ تے اُوندے ءچ پانڑی بھریں۔ 8صحن کیتے چاردیواری دے پڑدے لانویں تے اُوندے دروازے دا پڑدہ وی لانویں۔

9وَل مسح کرݨ آلا تیل گِھن تے اُونکُوں تمبُو، تے اُوندے یکے سامان اُتے لا ڈیویں۔ اِینویں تُوں تمبُو تے اُوندا یکا سامان میڈے کیتے مخصوص کریسیں تے او مُقدّس ہوسی۔ 10وَل ساڑے ونجنڑ آلیاں قُربانیاں پیش کرݨ دی قُربان گاہ تے اُوندے سامان اُتے مسح کرݨ کیتے تیل لانویں۔ اِینویں تُوں قُربان گاہ میڈے کیتے مخصوص کریسیں تے او بہُوں مُقدّس ہوسی۔ 11اِینویں ای غُسل آلے حوض تے اُوندی چوکی کُوں وی مخصوص تے مُقدّس کریں۔

12ہارُون تے اُوندے پوتراں کُوں اِجتماع آلے تمبُو دے دروازے اُتے گِھن آ تے پانڑی نال غُسل ڈیویں۔ 13وَل ہارُون کُوں مُقدّس کپڑے پوا تے، تے اُونکُوں مسح کر تے میڈے کیتے مخصوص تے مُقدّس کریں تاں جو او کاہِن دے طور تے میڈی خدمت کر سگے۔ 14اُوندے پوتراں کُوں گِھن آ تے اُنہاں کُوں زیر جامے پواویں۔ 15اُنہاں کُوں اُنہاں دے پِیُو آلی کار مسح کریں تاں جو او وی کاہِن دے طور تے میڈی خدمت کرݨ۔ جِیں ویلے اُنہاں کُوں مسح کیتا ویسی تاں او تے اُنہاں دی اولاد نسل در نسل کاہِن دی خدمت کیتے مخصوص ہوسن۔“

مُقدّس تمبُو کھڑا کیتا ویندے

16موسیٰ سبھ کُجھ بالکل اُوں حُکم دے مطابق کیتا جیہڑا رب العالمین اُونکُوں ڈِتا ہا۔ 17مِصر تُوں نِکلنڑ دے ڈُوجھے سال دے پہلے مہینے دی پہلی تاریخ کُوں مُقدّس تمبُو کھڑا کیتا گِیا۔ 18مُوسیٰ مُقدّس تمبُو اِینویں کھڑا کیتا: اُوں دیواراں کیتے تختیاں کُوں اُنہاں دیاں چوکیاں ءچ کھڑا کر تے اُنہاں دے نال شتِیر لائے، تے پڑدے کیتے تھمبے وی کھڑے کیتے۔ 19وَل تمبُو اُتے ڈُوہائیں پڑدے لائے تے اُنہاں اُتے غلاف رکھے، جِینویں رب العالمین اُونکُوں حُکم ڈِتا ہا۔

20وَل اُوں شریعت دیاں ڈوہائیں تختیاں گِھن تے عہد دے صندوق ءچ رکھ ڈِتیاں، اُونکُوں چاوݨ کیتے سوٹیاں صندوق دے کڑیاں ءچ پا ڈِتیاں، تے اُوندے اُتے ڈھکنڑ لا ڈِتا۔ 21وَل صندوق کُوں سبھ تُوں مُقدّس کمرے ءچ رکھ تے اُوندے اگُوں پڑدہ لا تے عہد دے صندوق کُوں لُکا ڈِتا، جِینویں رب العالمین اُونکُوں حُکم ڈِتا ہا۔

22میز کُوں مُوسیٰ مُقدّس کمرے دے شمالی حصے ءچ اُوں پڑدے دے سامنڑے رکھ ڈِتا جیندے پِچُھوں عہد دا صندوق ہا، 23تے میز اُتے نذر دیاں روٹیاں رکھ ڈِتیاں، جِینویں رب العالمین اُونکُوں حُکم ڈِتا ہا۔

24وَل کمرے دے جنُوبی حصے ءچ اُوں چراغ دان کُوں میز دے سامنڑے رکھ تے 25اُوندے اُتے ڈیوے رکھ ڈِتے جِینویں رب العالمین اُونکُوں حُکم ڈِتا ہا۔

26وَل موسیٰ خوشبودار مصالحہ ساڑن کیتے سونے دی قُربان گاہ وی مُقدّس کمرے ءچ اُوں پڑدے دے سامنڑے رکھی جیندے پِچُھوں عہد دا صندوق ہا، 27تے اُوندے اُتے خوشبودار مصالحہ ساڑیا جِینویں رب العالمین اُونکُوں حُکم ڈِتا ہا۔

28وَل اُوں مُقدّس تمبُو دے دروازہ کیتے پڑدہ لایا۔ 29باہر وَنج تے اُوں ساڑے ونجنڑ آلیاں قُربانیاں پیش کرݨ دی قُربان گاہ، مُقدّس تمبُو یعنی اِجتماع آلے تمبُو دے دروازے دے کولھ رکھ ڈِتی۔ اُوندے اُتے اُوں ساڑے ونجنڑ آلی قُربانی تے غلے دا نذرانہ پیش کیتا، جِینویں رب العالمین اُونکُوں حُکم ڈِتا ہا۔

30وَل مُوسیٰ غُسل آلے حوض کُوں اِجتماع آلے تمبُو تے قُربان گاہ دے وچال رکھ تے اُوندے ءچ پانڑی پا ڈِتا۔ 31مُوسیٰ، ہارُون تے اُوندے پوتراں اُوں پانڑی نال آپنڑے ہتھ پیر دھوتے۔ 32جِیں ویلے وی او اِجتماع آلے تمبُو ءچ وڑدے یا قُربان گاہ دے کولھ آندے تاں پہلے غُسل کریندے جِینویں رب العالمین مُوسیٰ کُوں حُکم ڈِتا ہا۔

33وَل مُوسیٰ تمبُو تے قُربان گاہ دے چودھارُوں صحن دی چاردیواری کھڑی کر تے صحن دے دروازے دا پڑدہ لایا۔ اِینویں مُوسیٰ مُقدّس تمبُو دی تعمیر دا سارا کم ختم کیتا۔

تمبُو ءچ رب دا جلال

34وَل اِجتماع آلے تمبُو اُتے بدّل چھا گِیا تے مُقدّس تمبُو رب العالمین دے جلال نال بھریج گِیا۔ 35مُوسیٰ اِجتماع آلے تمبُو ءچ نہ وڑ سگیا کیوں جو ایہ بدّل تمبُو اُتے کھڑا ہا تے او رب العالمین دے جلال نال بھریج گِیا ہا۔

36بنی اِسرائیل دے یکے سفر دے دوران جِیں ویلے وی مُقدّس تمبُو دے اُتوں بدّل اُٹھدا تاں او اگُوں روانہ تھیندے 37پر جے نہ اُٹھدا تاں او اُوں ڈینہہ تئیں سفر نہ کریندے جئیں تئیں بدّل نہ اُٹھدا ہا۔ 38ڈینہہ ویلے رب العالمین دا بدّل مُقدّس تمبُو دے اُتے کھڑا راہندا تے رات ویلے او یکے بنی اِسرائیل کُوں بھاہ دی شکل ءچ نظر آندا۔ ایہ سلسلہ پورے سفر دے دوران چلدا ریہا۔