خرُوج 39

ہارُون دا بالاپوش

1کاریگراں نیلے، جامنی تے رتّے رنگ دا دھاگا گِھن تے مُقدّس تمبُو ءچ خدمت کیتے اُنڑے ہوئے کپڑے بنڑائے۔ اُنہاں ہارُون دے مُقدّس کپڑے عین اُوں حُکم دے مطابق بنڑائے جیہڑا رب العالمین مُوسیٰ کُوں ڈِتا ہا۔ 2اُنہاں کاہِن ِ اعظم دا بالاپوش بنڑاوݨ کیتے سونا، نیلے، جامنی تے رتّے رنگ دا دھاگا تے باریک لینن اِستعمال کیتا۔ 3اُنہاں سونا کُٹ کُٹ تے پتلیاں پتلیاں پتریاں بنڑائیاں، وَل اُنہاں کُوں کپ تے دھاگے وانگُوں بنڑایا۔ جِیں ویلے نیلے، جامنی تے رتّے رنگ دے دھاگے تے باریک لینن نال کپڑا بنڑایا گِیا تاں سونے دا ایہ دھاگا مہارت نال کڈھائی کیتے اِستعمال کیتا گِیا۔ 4اُنہاں بالاپوش کیتے ڈُو پٹیاں بنڑائیاں تے اُنہاں کُوں بالاپوش دے مونڈھیاں اُتے رکھ تے بالاپوش دے سامنڑے تے پِچُھوں دے حصے نال لایا۔ 5تے پٹکا وی بنڑایا جیندے نال بالاپوش کُوں بدھیا ویندا ہا تے جیہڑا بالاپوش نال ہِکو ٹوٹا ہا۔ اِیندے کیتے وی سونا، نیلے، جامنی تے رتّے رنگ دا دھاگا تے باریک لینن اِستعمال کیتا گِیا۔ ایہ عین اُوں حُکم دے مطابق بنڑایا گِیا جیہڑا رب العالمین مُوسیٰ کُوں ڈِتا ہا۔ 6وَل اُنہاں ڈُو لال عقیق گِھن تے اُنہاں کُوں سونے دے خانیاں ءچ جَڑیا تے اُنہاں اُتے بنی اِسرائیل دے قبیلیاں دے ناں کھود تے اِینویں لِکھے جِینویں مُہر کھود تے بنڑائی ویندی ہے۔ 7اِنہاں قیمتی پتھراں کُوں بالاپوش دے مونڈھیاں اُتے بنی اِسرائیل دی یادگاری کیتے لاتا گیا۔ ایہ عین اُوں حُکم دے مطابق کیتا گِیا جیہڑا رب العالمین مُوسیٰ کُوں ڈِتا ہا۔

سینے دا کپڑا

8اِیندے بعد اُنہاں سینے دا کپڑا بنڑایا۔ ماہر کاریگراں اِینکُوں بالاپوش آلی کار سونے تے نیلے، جامنی تے رتّے رنگ دے دھاگے تے باریک لینن نال بنڑایا۔ 9جڈاں کپڑے کُوں ہِک پھیری تہہ کیتا گِیا تاں اِیندی لمبائی تے چوڑائی نؤں نؤں اِنچ ہئی۔ 10تے اُنہاں اُوندے اُتے چار قطاراں ءچ قیمتی پتھر جَڑے۔ ہر قطار ءچ ترے ترے قیمتی پتھر ہَن۔ پہلی قطار ءچ لعل، زبرجد تے زمُرد۔ 11ڈُوجھی ءچ فیروزہ، سنگِ نیلم تے حجر القمر۔ 12تریجھی ءچ زرقون، عقیق تے جامنی یاقُوت۔ 13چوتھی ءچ پکھراج، لال عقیق تے یشب ہئی۔ ہر قیمتی پتھر سونے دے خانے ءچ جَڑیا ہویا ہا۔ 14ایہ بارہاں قیمتی پتھر بنی اِسرائیل دے بارہاں قبیلیاں دی نمائندگی کریندے ہَن۔ ہِک ہِک قیمتی پتھر اُتے ہِک ہِک قبیلے دا ناں کھود تے اِینویں لِکھیا گِیا جِینویں مُہر بنڑائی ویندی ہے۔

15وَل اُنہاں سینے دے کپڑے کیتے خالص سونے دیاں ڈُو زنجیراں بنڑائیاں جیہڑیاں ڈوری آلی کار مِلیاں ہوئیاں ہَن۔ 16نال نال اُنہاں سونے دے ڈُو خانے تے ڈُو کڑے وی بنڑائے تے سینے دے کپڑے دے اُتلے ڈُو کونیاں اُتے لائے۔ 17وَل ڈوہائیں زنجیراں اُنہاں ڈوہاں کڑیاں نال لائیاں۔ 18اِنہاں دے ڈُوجھے سرے بالاپوش دے مونڈھیاں آلیاں پٹیاں دے سامنڑے دے ڈُو خانیاں نال جوڑے۔ 19اُنہاں سینے دے کپڑے دے تلویں ڈُو کونیاں اُتے وی سونے دے ڈُو کڑے لائے۔ او اندر بالاپوش دِر لگے ہوئے ہَن۔ 20وَل ڈُو بئے کڑے بنڑائے تے بالاپوش دے مونڈھیاں آلیاں پٹیاں اُتے لائے۔ ایہ وی سامنڑے لگے ہَن پر تلے بالاپوش دے پٹکے اُتے۔ 21اُنہاں سینے دے کپڑے دے تلویں کڑے نیلی ڈوری نال بالاپوش دے اُنہاں تلویں کڑیاں نال بدھے۔ اِینویں سینے دا کپڑا پٹکے دے اُتے بالاپوش نال چنگی طرحاں لگا راہندا ہا۔ ایہ سبھ کُجھ بالکل اُوں حُکم دے مطابق بنڑایا گِیا جیہڑا رب العالمین مُوسیٰ کُوں ڈِتا ہا۔

ہارُون دا چوغہ

22وَل کاریگراں او چوغہ اُنڑیا جیندے اُتے بالاپوش پاونڑا ہا۔ او پُورا نیلے دھاگے نال بنڑایا گِیا۔ 23اُوندا گریبان اُنڑے ہوئے کالر نال مضبوط کیتا گِیا ہا تاں جو او پھٹ نہ ونجے۔ 24اُنہاں نیلے، جامنی تے رتّے رنگ دے دھاگے نال انار بنڑا تے اُنہاں کُوں چوغے دے گھیرے ءچ لا ڈِتا۔ 25اُنہاں دے وچال خالص سونے دیاں ٹلیاں لائیاں گئیاں۔ 26چوغے دے پُورے گھیرے ءچ انار تے ٹلیاں واری واری لائیاں گئیاں۔ ہارُون خدمت کریندے ویلے ایہ چوغہ پاوے۔ ایہ سبھ اُوں حُکم دے مطابق کیتا گِیا جیہڑا رب العالمین مُوسیٰ کُوں ڈِتا ہا۔

خدمت کیتے ڈُوجھے لباس

27کاریگراں ہارُون تے اُوندے پوتراں کیتے باریک لینن دے زیر جامے بنڑائے۔ ایہ اُننڑ آلے دا کم ہا۔ 28نال نال اُنہاں باریک لینن دا عمامہ تے پگاں تے باریک لینن دے پجامے بنڑائے۔ 29کمر بند کُوں باریک لینن تے نیلے، جامنی تے رتّے رنگ دے دھاگے نال بنڑایا گِیا۔ کڈھائی کرݨ آلیاں اِیندے اُتے کڈھائی دا کم کیتا۔ ایہ سبھ کُجھ اُوں حُکم دے مطابق کیتا گِیا جیہڑا رب العالمین مُوسیٰ کُوں ڈِتا ہا۔

30اُنہاں خالص سونے دی مُقدّس پتری بنڑائی تے اُوندے اُتے ایہ الفاظ کھود تے لِکھے، ”رب العالمین کیتے مخصوص تے مُقدّس۔“ ایہ الفاظ کھود تے اِینویں لِکھے گئے جِینویں مُہر بنڑائی ویندی ہے۔ 31وَل اُنہاں اُونکُوں نیلی ڈوری نال عمامے دے سامنڑے آلے حصے اُتے لا ڈِتا۔ ایہ وی اُوں حُکم دے مطابق کیتا گِیا جیہڑا رب العالمین مُوسیٰ کُوں ڈِتا ہا۔

سارا سامان مُوسیٰ کُوں ڈِکھایا ویندے

32اِینویں مُقدّس تمبُو یعنی اِجتماع آلے تمبُو دا کم مکمل تھیّا۔ بنی اِسرائیل سبھ کُجھ اُوں حُکم دے مطابق کیتا جیہڑا رب العالمین مُوسیٰ کُوں ڈِتا ہا۔ 33او مُقدّس تمبُو دیاں سبھ شیواں مُوسیٰ دے کولھ گِھن آئے، یعنی تمبُو تے اُوندا یکا سامان، اُوندیاں ہُکاں، تختے، شتِیر، تھمبے تے خانے آلیاں چوکیاں، 34چھترے دیاں رنگ کیتیاں ہوئیاں رتّیاں کَھلاں دا غلاف تے اعلیٰ قِسم دیاں کَھلاں دا غلاف، سبھ تُوں مُقدّس کمرے دا پڑدہ، 35عہد دا صندوق، اُونکُوں چاوݨ آلیاں سوٹیاں تے اُوندا ڈھکنڑ، 36میز، اُوندا یکا سامان تے اُوندے اُتے رکھنڑ آلیاں نذر دیاں روٹیاں، 37خالص سونے دا چراغ دان تے اُوندے اُتے رکھنڑ آلے ڈیوے اُوندے سامان سمیت، چراغ دان کیتے تیل، 38سونے دی قُربان گاہ، مسح کرݨ آلے تیل، خوشبودار مصالحہ، مُقدّس تمبُو دے دروازے دا پڑدہ، 39پِتّل دی قُربان گاہ اُوندے پِتّل دے جنگلے سمیت، اُونکُوں چاوݨ آلیاں سوٹیاں تے باقی سارا سامان، غُسل آلے حوض تے او چوکی جیندے اُتے حوض رکھنڑا ہا، 40صحن دے پڑدے، اُوندے تھمبے تے اُوندیاں چوکیاں، صحن دے دروازے دا پڑدہ، صحن دے رسے تے کِل، اِجتماع آلے تمبُو ءچ خدمت کرݨ دا یکا سامان، 41تے او مُقدّس کپڑے جیہڑے ہارُون کاہِن تے اُوندے پوتراں کاہِن دے طور تے مُقدّس جاہ اُتے خدمت کرݨ کیتے پاونڑیں ہَن۔

42بنی اِسرائیل سبھ کُجھ اُنہاں حُکماں دے مطابق کیتا جیہڑے رب العالمین مُوسیٰ کُوں ڈِتے ہَن۔ 43مُوسیٰ سارے کم اُتے دِید بھنوائی تے ڈِٹھا جو اُنہاں سبھ کُجھ اُوں حُکم دے مطابق کیتے جیہڑا رب العالمین ڈِتا ہا، تے مُوسیٰ اُنہاں کُوں برکت ڈِتی۔