خرُوج 38

ساڑے ونجنڑ آلیاں قُربانیاں دی قُربان گاہ

1بضلی ایل کِکر دی لکڑ دی ہِک قُربان گاہ بنڑائی جیہڑی ساڑے ونجنڑ آلیاں قُربانیاں کیتے ہئی۔ اُوندی اُچائی ساڈھے چار فُٹ جڈاں جو لمبائی تے چوڑائی ساڈھے سَت سَت فُٹ یعنی چورس ہئی۔ 2اُوندے اُتوں چارے کونیاں ءچوں ہِک ہِک سینگ نِکلدا ہا۔ سینگ تے قُربان گاہ ہِکے ٹوٹے دے ہَن تے ساریاں اُتے پِتّل مڑھیا ہویا ہا۔ 3اُوں اُوندا یکا سامان یعنی بالٹیاں، بیلچے، کٹورے، سیخاں تے بکھدے ہوئے کولیاں کیتے تھاں بنڑایا۔ یکا سامان پِتّل دا ہا۔

4قُربان گاہ کیتے پِتّل دا جنگلا بنڑایا جیہڑا اُتوں کُھلا ہا۔ قُربان گاہ دی ادھی اُچائی اُتے ہِک کنگری لائی تے قُربان گاہ کُوں جنگلے ءچ اِیں کنگری تئیں رکھیا، 5تے قُربان گاہ دے چارے پاسُوں جنگلے دے چارے کونیاں اُتے کڑے لائے۔ 6وَل اُوں کِکر دیاں ڈُو سوٹیاں بنڑا تے اُنہاں اُتے پِتّل مڑھیا 7تے اُنہاں کُوں قُربان گاہ دے ڈوہائیں پاسُوں دے کڑیاں ءچ پا ڈِتا تاں جو اُونکُوں چاتا وَنج سگے۔ پُوری قُربان گاہ لکڑ دے تختیاں نال بنڑائی پر او اندرُوں کھوکھلی ہئی۔

8بضلی ایل پِتّل دی چوکی تے غُسل کرݨ کیتے پِتّل دا حوض بنڑایا۔ ایہ پِتّل اُنہاں عورتاں دے شیشیاں1 دا ہا جیہڑیاں اِجتماع آلے تمبُو دے دروازے اُتے خدمت کریندیاں ہَن۔

تمبُو دا صحن

9وَل بضلی ایل صحن بنڑایا۔ اُوندی چار دیواری باریک لینن دے پڑدے نال بنڑائی۔ چار دیواری دی لمبائی جنُوب دِر ہِک سو پنجھاہ فُٹ ہئی۔ 10پڑدے کُوں لاوݨ کیتے چاندی دیاں کُنڈیاں، پٹیاں، لکڑ دے وِیہہ تھمبے تے اُنہاں دیاں وِیہہ چوکیاں بنڑائیاں گئیاں۔ 11اِینویں ای چاردیواری شمال دِر ہِک سو پنجھاہ فُٹ لمبی تے اِیندے کیتے وِیہہ تھمبے، وِیہہ چوکیاں تے چاندی دیاں کُنڈیاں تے پٹیاں بنڑائیاں۔ 12صحن دے پِچُھوں مغرب دِر دے پڑدیاں دی چوڑائی پنجھتر فُٹ ہئی تے پڑدے کیتے ڈاہ تھمبے تے ڈاہ چوکیاں تے چاندی دیاں ہُکاں تے پٹیاں بنڑائیاں گئیاں۔ 13سامنڑے مشرق دِر وی جِتھاں سِجھ اُبھردے، پڑدیاں دی چوڑائی پنجھتر فُٹ ہئی۔ 14اِتھاں چاردیواری دا دروازہ ہا۔ دروازے دے سجے پاسُوں دے پڑدے ساڈھے باویہہ (22.5) فُٹ چوڑے ہَن۔ 15تے صحن دے دروازے دے کھبے پاسُوں وی اُتنے ای چوڑے ہَن۔ اُونکُوں ڈوہائیں پاسُوں ترے ترے تھمبیاں نال لاتا گِیا ہا، جیہڑے پِتّل دیاں چوکیاں اُتے کھڑے ہَن۔ 16چاردیواری دے یکے پڑدے اُنڑے ہوئے باریک لینن نال بنڑائے گئے ہَن۔ 17تھمبے پِتّل دیاں چوکیاں اُتے کھڑے ہَن تے پڑدے چاندی دیاں ہُکاں تے پٹیاں نال تھمبیاں اُتے لگے ہوئے ہَن۔ تھمبیاں دے اُتے دے سِراں اُتے چاندی مڑھی گئی ہئی۔ صحن دے یکے تھمبیاں اُتے چاندی دیاں پٹیاں لگیاں ہوئیاں ہَن۔

18صحن دے دروازے دا پڑدہ نیلے، جامنی تے رتّے رنگ دے دھاگے تے باریک لینن نال بنڑایا گِیا ہا تے اُوندے اُتے کڈھائی دا کم کیتا گِیا ہا۔ او ترِیح فُٹ چوڑا تے صحن دے ڈُوجھے پڑدیاں آلی کار ساڈھے سَت فُٹ اُچا ہا۔ 19اُوندے چار تھمبے تے پِتّل دیاں چار چوکیاں ہَن۔ اُوندیاں ہُکاں تے پٹیاں چاندی دیاں ہَن تے تھمبیاں دے اُتے دے سِراں اُتے چاندی مڑھی گئی ہئی۔ 20تمبُو تے صحن دے کِل پِتّل دے ہَن۔

تمبُو دی تعمیر کیتے سامان

21تلے اُوں سامان دی لِسٹ ہے جیہڑا مُقدّس تمبُو دی تعمیر کیتے اِستعمال تھیّا یعنی او تمبُو جیندے ءچ شریعت دیاں تختیاں رکھیاں ہوئیاں ہَن۔ مُوسیٰ دے حُکم اُتے کاہِن ِ اعظم ہارُون دے پوتر اِتمر دی نِگرانی ءچ لاویاں ایہ لِسٹ تیار کیتی۔ 22یہُوداہ دے قبیلے دے بضلی ایل بِن اُوری بِن حور، او سبھ کُجھ بنڑایا جیہڑا رب العالمین مُوسیٰ کُوں ڈسایا ہا۔ 23اُوندے نال دان قبیلے دا اہلیاب بِن اَخیسمک ہا جیہڑا کڈھائی تے کاریگری دے ہر کم دا ماہر ہا۔ او نیلے، جامنی تے رتّے رنگ دے دھاگے تے باریک لینن نال کپڑا بنڑاوݨ ءچ وی ماہر ہا۔

24مُقدّس تمبُو دی تعمیر کیتے اِستعمال تھیوݨ آلا سونا جیہڑا مردم شماری دے حساب نال کٹھا تھیّا ہا، اُوندا وزن مُقدّس تمبُو دے سِکے2 دے حساب نال تقریباً ہزار کلو3 ہا۔

25جماعت دی مردم شماری دے حساب نال جیہڑی چاندی کٹھی تھئی، اُوندا وزن مُقدّس تمبُو دے سِکے دے حساب نال تقریباً ترے ہزار چار سو ترِیح (3,430) کلو4 ہا۔ 26جیہڑے مرداں دی عُمر وِیہہ سال یا اِیں تُوں ودھ ہئی، اُنہاں کُوں ادھا تولہ چاندی ڈیونڑی پئی۔ اُنہاں دی کُل گِنتری چِھی لکھ، ترے ہزار، پنج سو پنجھاہ (6,03,550) ہئی۔

27تمبُو دیاں سو خانے آلیاں چوکیاں یعنی تختے دیاں چوکیاں تے سبھ تُوں مُقدّس کمرے دے دروازے دے تھمبیاں دیاں خانے آلیاں چوکیاں کُوں سانچے ءچ ڈھال تے بنڑاوݨ کیتے چونتریح سو (3,400) کلو5 چاندی لگی یعنی ہِک چوکی کیتے چونتریح کلو 28تے باقی ترِیح کلو چاندی نال اُوں چاردیواری دے تھمبیاں دیاں کُنڈیاں تے پٹیاں بنڑائیاں تے تھمبیاں دے اُتلے سِراں اُتے وی چاندی مڑھی۔

29ہدیے دے پِتّل دا وزن تقریباً ڈُو ہزار چار سو پنجھویہہ (2,425) کلو 6 ہا۔ 30اُوں تمبُو دے دروازے دیاں چوکیاں، ساڑے ونجنڑ آلیاں قُربانیاں دی قُربان گاہ، اُوندا جنگلا تے اُوندا سارا سامان، 31صحن تے اُوندے دروازے دیاں چوکیاں، تمبُو تے صحن دے یکے کِل اِیں پِتّل نال بنڑائے۔