Modern Central Saraiki Bible
خرُوج 37
عہد دا صندوق
بضلی ایل کِکر دی لکڑ دا ہِک صندوق بنڑایا۔ اُوندی لمبائی پونڑے چار فُٹ، تے چوڑائی تے اُچائی ڈوہائیں سوا ڈُو ڈُو فُٹ ہئی۔ اُوں پُورے صندوق دے اندرُوں باہرُوں خالص سونے دی پتلی چادر چڑھائی تے اُوندے اُتے سونے دی کِنگری لوائی۔ صندوق کیتے سونے دے چار کڑے سانچے ءچ بنڑا تے اُنہاں کُوں صندوق دے چارے پاویاں اُتے لاتا۔ ڈوہائیں پاسُوں ڈُو ڈُو کڑے ہَن۔ وَل اُوں کِکر دیاں ڈُو سوٹیاں بنڑائیاں تے اُنہاں اُتے سونا چڑھایا۔ اُوں سوٹیاں کُوں ڈوہائیں پاسُوں کڑیاں ءچ پا ڈِتا تاں جو اُنہاں نال صندوق چاتا وَنج سگے۔
بضلی ایل خالص سونے نال صندوق دا ڈھکنڑ بنڑایا۔ اُوندی لمبائی پونڑے چار فُٹ تے چوڑائی سوا ڈُو فُٹ ہئی۔ وَل اُوں سونے دے ڈُو کروبی فرشتے گھڑ تے بنڑائے جیہڑے ڈھکنڑ دے ڈوہائیں سِریاں اُتے کھڑے ہَن۔ ایہ ڈوہائیں فرشتے تے ڈھکنڑ ہِکو ٹوٹے نال بنڑائے گئے ہَن۔ فرشتیاں دے پر اُتلے پاسُوں اِینویں کِھنڈے ہوئے ہَن جِینویں او ڈھکنڑ کُوں ڈھکی کھڑے ہووݨ۔ اُنہاں دے مُنہ آمنڑے سامنڑے ہَن تے او ڈھکنڑ دو ڈیڈھے پئے ہَن۔
نذر دیاں روٹیاں دی میز
اِیندے بعد بضلی ایل کِکر دی لکڑ دی میز بنڑائی۔ اُوندی لمبائی ترے فُٹ، چوڑائی ڈیڈھ فُٹ تے اُچائی سوا ڈُو فُٹ ہئی۔ اُوندے اُتے خالص سونا چڑھایا تے اُوندے آسُوں پاسُوں سونے دی کنگری لائی۔ میز دے اُتلے پاسُوں پتری لائی جیندی اُچائی ترے اِنچ ہئی تے جیندے اُتے سونے دی جھالر لگی ہوئی ہئی۔ وَل سونے دے چار کڑے ڈھال تے اُنہاں کُوں میز دے چارے کونیاں اُتے لگے ہوئے چار پاویاں نال لایا۔ ایہ کڑے میز دی پتری دے تلے لائے تاں جو اُنہاں ءچ او سوٹیاں پاتیاں ونجنڑ جِنہاں نال میز کُوں چاونڑا ہا۔ بضلی ایل میز کُوں چاوݨ کیتے ایہ سوٹیاں وی کِکر دیاں بنڑائیاں تے اُنہاں اُتے سونا چڑھایا۔
وَل اُوں تھال، پیالے تے نذر دے طور تے وِیٹے ونجنڑ آلیاں چیزاں کیتے جگ تے مُنگر وی خالص سونے نال بنڑائے جیہڑے میز اُتے رکھے ویندے ہَن۔
چراغ دان
وَل بضلی ایل خالص سونے دا چراغ دان بنڑایا۔ اُوندا پاوا تے ڈنڈی گھڑ تے بنڑائے۔ اُوندیاں کٹوریاں جیہڑیاں پُھلاں تے کلِیاں دی شکل دیاں ہَن، پاوے تے ڈنڈی دے نال ہِکو ٹوٹے دیاں ہَن۔ ڈنڈی دے سجے کھبے کُل چِھی شاخاں ہَن، ترے شاخاں سجے تے ترے شاخاں کھبے پاسُوں۔ ہر شاخ اُتے ترے ترے پیالیاں لگیاں ہَن جیہڑیاں بادام دیاں کلِیاں تے پُھلاں دی شکل آلی کار ہَن۔ چراغ دان دی ڈنڈی اُتے وی اِیں قِسم دیاں پیالیاں لگیاں ہوئیاں ہَن پر گِنتری ءچ چار۔ اِنہاں ءچوں ترے پیالے شاخاں نِکلنڑ آلی جاہ تے ہَن یعنی ڈُو شاخاں دے تلے ہِک پیالہ۔ شاخاں تے پیالیاں بلکہ پُورا چراغ دان خالص سونے دے ہِکو ٹوٹے نال گھڑ تے بنڑایا گِیا ہا۔
بضلی ایل چراغ دان کیتے سَت ڈیوے، بتی کُترݨ آلیاں قینچیاں تے چھوٹے تھاں وی خالص سونے دے بنڑائے۔ چراغ دان تے اُوندے یکے سامان کیتے ہِک مَنڑ خالص سونا لایا۔
خوشبودار مصالحہ ساڑن دی قُربان گاہ
بضلی ایل کِکر دی لکڑ دی قُربان گاہ بنڑائی جیہڑی خوشبودار مصالحہ ساڑن کیتے ہئی۔ اُوندی لمبائی تے چوڑائی ڈیڈھ فُٹ تے اُچائی ترے فُٹ ہئی۔ اُوندے چارے کونیاں اُتے سینگ بنڑائے گئے جیہڑے قُربان گاہ دے ہِکو ٹوٹے نال بنڑائے گئے ہَن۔ اُوندے اُتے، اُوندے چارے پاسُوں تے اُوندے سینگاں اُتے خالص سونا چڑھایا۔ اُتے دی جاہ دے آسُوں پاسُوں اُوں سونے دی کنگری بنڑائی۔ سونے دے کڑے بنڑا تے اُنہاں کُوں اِیں کنگری دے تلے ہِک بئے دے آمنڑے سامنڑے لا ڈِتا۔ اُنہاں کڑیاں ءچ قُربان گاہ کُوں چاوݨ آلیاں سوٹیاں پاتیاں ویسن۔ ایہ سوٹیاں کِکر دیاں ہَن تے اِنہاں اُتے وی سونا مڑھیا گیا۔
بضلی ایل مسح کرݨ آلا مُقدّس تیل تے خوشبودار خالص مصالحہ وی بنڑایا۔ ایہ عِطر بنڑاوݨ آلے دا کم ہا۔
Modern Central Saraiki Bible. Copyright © Strategic Resource Group. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.