خرُوج 36

1بضلی ایل، اہلیاب تے او کاریگر جِنہاں کُوں رب العالمین مُقدّس تمبُو بنڑاوݨ کیتے حِکمت تے سمجھ ڈِتی ہے، او سبھ کُجھ رب العالمین دے حُکم دے مطابق بنڑاوݨ۔“

بنی اِسرائیل ہدیے ڈیندے ہِن

2مُوسیٰ بضلی ایل، اہلیاب تے ہر اُوں کاریگر کُوں سڈیا جِینکُوں رب العالمین مُقدّس تمبُو بنڑاوݨ کیتے حِکمت تے مہارت ڈِتی ہئی تے جیہڑے دل نال آ تے ایہ کم کرنڑا چاہندے ہَن۔ 3اُنہاں کُوں مُوسیٰ تُوں او سارے ہدیے مِلے جیہڑے بنی اِسرائیل مُقدّس تمبُو بنڑاوݨ کیتے گِھن آئے ہَن۔

اِیندے بعد وی لوک ہر سویلے ہدیے گِھن تے آندے ریہے۔ 4تے آخر کار یکے کاریگر جیہڑے مُقدّس تمبُو بنڑاوݨ دے کم ءچ لگے ہَن، آپنڑے کم چھوڑ تے مُوسیٰ دے کولھ آئے تے 5اُونکُوں آکھیا، ”جیہڑے کم دا رب العالمین حُکم ڈِتے، اُوندے کیتے لوک ضرورت تُوں زیادہ گِھدی آندے ہِن۔“

6وَل مُوسیٰ پُورے ڈیرے ءچ اِیں حُکم دا اعلان کروا ڈِتا جو ”ہُنڑ کوئی مرد یا عورت مُقدّس تمبُو دی تعمیر کیتے بئیاں شیواں نہ چا آوے۔“

اِینویں اُنہاں کُوں بئیاں شیواں گِھن آوݨ تُوں روک ڈِتا گِیا 7کیوں جو کم کیتے سامان ضرورت تُوں زیادہ تھی گِیا ہا۔

اِجتماع آلا تمبُو

8جیہڑے ماہر کاریگر ہَن، اُنہاں مُقدّس تمبُو کیتے باریک لینن تے نیلے، جامنی تے رتّے دھاگے نال ڈاہ پڑدے بنڑائے۔ پڑدیاں اُتے کہیں ماہر کاریگر تُوں کڈھائی دا کم کرا تے کروبی فرشتیاں دی صورت بنڑائی۔ 9ہر پڑدے دی لمبائی بِتالیہہ فُٹ تے چوڑائی چِھی فُٹ ہئی تے سبھ پڑدے ہِکو ناپ دے ہَن۔ 10پنج پڑدے لمبائی دے رُخ ہِک بئے نال جوڑے گئے تے اِینویں ای بئے پنج وی۔ اِینویں ڈُو وڈے پڑدے بنڑ گئے۔ 11نیلے دھاگے دے کاج بنڑا تے ہِک پڑدے دے ہِک پاسے لمبائی دے رُخ لائے گئے تے اِینویں ای ڈُوجھے وڈے پڑدے دے ہِک پاسے وی لمبائی دے رُخ۔ 12ہِک وڈے پڑدے دے لمبائی دے رُخ پنجھاہ تے ڈُوجھے اُتے وی اُتنے ای کاج بنڑائے گئے۔ اُنہاں ڈوہائیں پڑدیاں دے کاج ہِک بئے دے آمنڑے سامنڑے ہَن۔ 13وَل بضلی ایل سونے دیاں پنجھاہ ہُکاں بنڑا تے آمنڑے سامنڑے دے کاج ہِک بئے نال جوڑ ڈِتے۔ اِینویں ڈوہائیں وڈے پڑدے جُڑ تے تمبُو بنڑ گِیا۔

14اُوں بکری دے والاں نال وی یارہاں پڑدے بنڑائے جِنہاں کُوں کپڑے آلے تمبُو اُتے رکھیا ونجنڑا ہا۔ 15ہر پڑدے دی لمبائی پِنتالیہہ فُٹ تے چوڑائی چِھی فُٹ ہئی۔ ایہ یارہاں پڑدے ہِکو ناپ دے ہَن۔ 16پنج پڑدے لمبائی دے رُخ ہِک بئے نال جوڑے گئے تے اِینویں ای باقی چِھی وی۔ 17بکری دے والاں دے ڈوہائیں وڈے پڑدیاں دے پِنتالیہہ فُٹ آلے ہِک ہِک پاسے اُتے پنجھاہ پنجھاہ کاج لائے گئے۔ 18وَل پِتّل دیاں پنجھاہ ہُکاں بنڑا تے، اُنہاں نال ڈوہائیں حصے جوڑ تے ہِک بنڑا ڈِتا۔

19اُنہاں ڈوہائیں تمبُواں دی حفاظت کیتے بضلی ایل ڈُو غلاف بنڑائے۔ چھتریاں دیاں رنگیاں ہوئیاں رتّیاں کَھلاں دا غلاف تے اعلیٰ قِسم دیاں کَھلاں دا غلاف۔

20اِیندے بعد اُوں کِکر دی لکڑ دے تختے بنڑائے تاں جو مُقدّس تمبُو دیاں کندھاں دا کم ڈیوݨ۔ 21ہر تختے دی اُچائی پندھراں فُٹ تے چوڑائی سوا ڈُو فُٹ ہئی۔ 22ہر تختے دے تلے ڈُو ڈُو چُولاں ہَن جیہڑیاں ہر تختے کُوں اُوندے پاویاں نال جُڑیندیاں ہَن تاں جو تختہ کھڑا راہوے۔ 23تے مُقدّس تمبُو دی جنُوبی کندھ کیتے وِیہہ تختے بنڑائے 24تے نال ای چاندی دے خانے آلیاں چالیہہ چوکیاں وی۔ ہر تختے دے تلے ڈُو چوکیاں ہَن تے ہر چوکی ءچ ہِک چُول۔ 25اِیں طریقے نال مُقدّس تمبُو دی شمالی کندھ کیتے وی وِیہہ تختے بنڑائے۔ 26تے نال ای چاندی دیاں چالیہہ چوکیاں وی بنڑائیاں یعنی ہر تختے دے تلے ڈُو چوکیاں۔ 27مُقدّس تمبُو دی پِچھلی یعنی مغربی کندھ کیتے چِھی تختے بنڑائے۔ 28اِیں کندھ کُوں شمالی تے جنُوبی کندھاں نال جوڑن کیتے کونے آلے ڈُو تختے بنڑائے۔ 29اِنہاں ڈوہائیں تختیاں ءچوں تلُوں گِھن تے اُتے تئیں نُکر ہئی تاں جو ہِک نال شمالی کندھ مغربی کندھ نال جُڑ ونجے تے بئی دے ذریعے جنُوبی کندھ مغربی کندھ نال جُڑ ونجے۔ اُنہاں دے اُتے دے سرے کڑیاں نال مضبوط کیتے گئے۔ 30اِینویں ای پِچھلے یعنی مغربی تختیاں دی پُوری گِنتری اَٹھ ہئی تے اُنہاں کیتے چاندی دیاں چوکیاں دی گِنتری سولہاں ہئی یعنی ہر تختے دے تلے ڈُو چوکیاں۔

31وَل بضلی ایل کِکر دی لکڑ دے شتِیر بنڑائے۔ مُقدّس تمبُو دے جنُوبی پاسے کیتے پنج 32تے شمالی پاسے کیتے پنج، تے پِچھلے یعنی مغربی پاسے کیتے پنج۔ 33اَدھ آلا شتِیر کندھ دی ادھی اُچائی تے کندھ دے ہِک سرے تُوں بئے سرے تئیں لاتا گِیا۔ 34اُوں تختیاں کُوں سونے نال منڈھیا، وَل شتیِراں کُوں تختیاں نال جوڑن کیتے سونے دے کڑے بنڑا تے شتیِراں کُوں وی سونے نال منڈھیا۔

مُقدّس تمبُو دے پڑدے

35وَل بضلی ایل ہِک بِیا پڑدہ بنڑایا۔ اِیندے کیتے وی باریک لینن تے نیلے، جامنی تے رتّے رنگ دا دھاگا اِستعمال کیتا تے اُوندے اُتے وی کہیں ماہر کاریگر تُوں کروبی فرشتیاں دی صورت بنڑوائی۔ 36وَل اِینکُوں لٹکاوݨ کیتے کِکر دی لکڑ دے چار تھمبے، سونے دیاں کُنڈیاں تے چاندی دیاں چار چوکیاں بنڑا تے تھمبیاں اُتے سونا چڑھایا۔

37بضلی ایل تمبُو دے دروازے کیتے باریک لینن تے نیلے، جامنی تے رتّے رنگ دا دھاگا اِستعمال کر تے پڑدہ بنڑایا، تے اِیندے اُتے وی کڈھائی دا کم کیتا۔ 38اِیں پڑدے کُوں ٹنگنڑ کیتے سونے دیاں کُنڈیاں تے کِکر دی لکڑ دے پنج تھمبے بنڑائے۔ تھمبیاں تے اُنہاں دے سِراں دیاں پٹیاں اُتے سونا چڑھایا پر اُوندیاں چوکیاں پِتّل دیاں ہَن۔