خرُوج 35

سبت دا ڈینہہ

1مُوسیٰ اِسرائیل دی پُوری جماعت کُوں کٹھا کر تے آکھیا، ”رب العالمین تُہاکُوں جِنہاں ہدایتاں اُتے عمل کرݨ دا حُکم ڈِتے، او ایہ ہِن : 2چِھی ڈینہہ کم کار کیتا ونجے پر ستواں ڈینہہ مخصوص تے مُقدّس ہووے، او رب العالمین کیتے آرام دا سبت ہے۔ جیہڑا وی اِیں ڈینہوار کم کرے اُونکُوں مار ڈِتا ونجے۔ 3سبت دے ڈینہہ آپنڑے گھراں ءچ بھاہ تئیں نہ بلائے۔“

اِجتماع آلے تمبُو کیتے نذرانے

4مُوسیٰ بنی اِسرائیل دی پُوری جماعت کُوں آکھیا، ”رب العالمین حُکم ڈِتے جو 5جیہڑا کُجھ تُہاڈے کولھ ہے اُوندے ءچوں ہدیے گِھن آؤ تے رب العالمین کُوں نذرانے دے طور تے پیش کرو۔ جیہڑا دل نال ڈیونڑا چاہوے او ایہ شیواں ڈیوے: سونا، چاندی تے پِتّل، 6نیلا، جامنی تے رتّے رنگ دا دھاگا، باریک لینن، بکری دے وال، 7چھترے دیاں رنگ کیتیاں ہوئیاں رتّیاں کَھلاں، اعلیٰ قِسم دیاں کَھلاں، کِکر دی لکڑ، 8چراغ دان کیتے زیتون دا تیل، مسح کرݨ آلے تیل کیتے تے خوشبودار دُھونڑی کیتے مصالحے، 9لال عقیق تے بئے قیمتی پتھر جیہڑے کاہِن ِ اعظم دے بالاپوش تے سینے دے کپڑے اُتے لائے ویسن۔

10تُہاڈے ءچوں جِتّی ماہر کاریگر ہِن، او آ تے ایہ سبھ کُجھ بنڑاوݨ جِنہاں دا حُکم رب العالمین ڈِتے 11یعنی مُقدّس تمبُو تے اُوندے غلاف، ہُکاں، تختے، شتِیر، تھمبے تے خانے آلیاں چوکیاں، 12عہد دا صندوق، اُونکُوں چاوݨ آلیاں سوٹیاں، اُوندا ڈھکنڑ، سبھ تُوں مُقدّس کمرے دا پڑدہ، 13نذر دیاں روٹیاں دی میز، اُونکُوں چاوݨ آلیاں سوٹیاں، اُوندا سارا سامان تے نذر دیاں روٹیاں، 14روشنی کیتے چراغ دان تے اُوندے اُتے رکھنڑ آلے ڈیوے اُوندے سامان سمیت، چراغ دان کیتے تیل، 15خوشبودار مصالحہ ساڑن آلی قُربان گاہ، اُونکُوں چاوݨ آلیاں سوٹیاں، مسح کرݨ آلے تیل، خوشبودار مصالحہ، مُقدّس تمبُو دے دروازے دا پڑدہ، 16ساڑے ونجنڑ آلیاں قُربانیاں پیش کرݨ دی قُربان گاہ پِتّل دے جنگلے سمیت، اُونکُوں چاوݨ آلیاں سوٹیاں تے باقی سارا سامان، غُسل آلے حوض تے او چوکی جیندے اُتے حوض رکھیا ویندے، 17صحن دے پڑدے، اُوندے تھمبے تے اُوندیاں چوکیاں، اُوندے دروازے دا پڑدہ، 18تمبُو تے صحن دے پڑدیاں دے کِل تے رسے 19تے او مُقدّس کپڑے جیہڑے ہارُون کاہِن تے اُوندے پوتر کاہِن دے طور تے مُقدّس جاہ اُتے خدمت کرݨ کیتے پیندے ہِن۔“

20ایہ سُنڑ تے اِسرائیل دی یکی جماعت مُوسیٰ دے کولُھوں لگی گئی۔ 21تے جیہڑا جیہڑا دل نال رب العالمین کُوں نذرانہ ڈیونڑاں چاہندا ہا، او اِجتماع آلے تمبُو، اُوندے سامان یا کاہِناں دے مُقدّس کپڑیاں کیتے رب العالمین دا ہدیہ گِھن آیا۔ 22رب العالمین دے ہدیے کیتے مرد تے عورتاں دل نال آپنڑے سونے دے زیور مثلاً جَڑن آلیاں سُوئیاں، والیاں، چَھلے تے کنگنڑ گِھن آئے۔ 23جیندے جیندے کولھ نیلا، رَتّا تے جامنی رنگ دا دھاگا، باریک لینن، بکری دے وال، چھتریاں دیاں رنگیاں ہوئیاں رتّیاں کَھلاں، تے اعلیٰ قِسم دیاں کَھلاں، 24چاندی، پِتّل تے کِکر دی لکڑ ہئی، رب العالمین کیتے نذرانہ دے طور تے گِھن آیا۔ 25تے جِتّی عورتاں کتّنڑ ءچ ماہر ہَن او آپنڑے کتّے ہوئے نیلے، رتّے تے جامنی رنگ دے دھاگے تے باریک لینن گِھن آئیاں۔ 26اِینویں جیہڑی جیہڑی عورت بکری دے وال کتّنڑ ءچ ماہر ہئی تے دل نال کم کرݨ چاہندی ہئی، او ایہ کت تے گِھن آئی۔ 27جیہڑے سردار ہَن او لال عقیق تے بئے قیمتی پتھر گِھن آئے جیہڑے کاہِن ِ اعظم دے بالاپوش تے سینے دے کپڑے اُتے لائے ونجنڑے ہَن۔ 28او چراغ دان، مسح کرݨ آلے تیل تے خوشبودار دُھونڑی کیتے مصالحے تے زیتون دا تیل وی گِھن آئے۔

29اِینویں اِسرائیل دے یکے مرد تے عورتاں جیہڑے دل نال رب العالمین کُوں کُجھ ڈیونڑاں چاہندے ہَن، او اُنہاں سبھ کماں کیتے ہدیے گِھن آئے جیہڑے رب العالمین مُوسیٰ دی معرفت کرݨ دا حُکم ڈِتا ہا۔

بضلی ایل تے اہلیاب

30وَل مُوسیٰ بنی اِسرائیل کُوں آکھیا، ”رب العالمین یہُوداہ قبیلے دے بضلی ایل بِن اُوری بِن حور کُوں چُنڑ گِھدے۔ 31رب العالمین اُونکُوں آپنڑے رُوح نال معمُور کر تے حِکمت، سمجھ تے ہر طرحاں دی کاریگری دا علم ڈِتے۔ 32او سونے، چاندی تے پِتّل دیاں شیواں مہارت نال بنڑا سگدے۔ 33او قیمتی پتھر کُوں کٹ تے جَڑن، تے لکڑ کُوں گھڑن دی قابلیت رکھیندے۔ او بہُوں سارے بئے کماں ءچ وی مہارت رکھیندے۔ 34نال ای رب العالمین اُونکُوں تے دان دے قبیلے دے اہلیاب بِن اَخیسمک کُوں ڈُوجھیاں کُوں سِکھاوݨ دی قابلیت وی ڈِتی ہے۔ 35اُوں اُنہاں کُوں او مہارت تے حِکمت ڈِتی ہے جیہڑی ہر کم کیتے چاہیدی ہے یعنی کاریگری دے ہر کم کیتے، کڈھائی دے کم کیتے، نیلے، جامنی تے رتّے رنگ دے دھاگے تے باریک لینن تُوں کپڑا بنڑاوݨ کیتے تے اُنڑائی دے کم کیتے۔ او ہر طرحاں دا کم کرݨ جانڑدے ہِن تے کاریگری ءچ مہارت رکھیندے ہِن۔