احبار 24

رب دے حضُور چراغ دان تے روٹیاں

1رب العالمین مُوسیٰ کُوں آکھیا، 2”بنی اِسرائیل کُوں حُکم ڈے جو او تیڈے کولھ کُٹے ہوئے زیتون دا خالص تیل گِھن آوݨ تاں جو اِجتماع آلے تمبُو ءچ چراغ دان دے ڈیوے مسلسل بلدے راہوݨ۔ 3ہارُون ڈِیوے کُوں عہد دے صندوق دے پڑدے دے باہر آلے پاسے مُقدّس کمرے ءچ شام تُوں گِھن تے سویل تئیں رب العالمین دے حضُور سنبھالے۔ ایہ شرع نسل در نسل قائم راہوے۔ 4خالص سونے دے چراغ دان اُتے ڈیویاں کُوں رکھ تے او رب العالمین دے حضُور اُنہاں دی باقاعدگی نال ڈیکھ بھال کرے۔

5بہترین میدہ گِھن تے بارہاں روٹیاں پکائے۔ ہر روٹی کیتے ترے کلو میدہ اِستعمال کرائے۔ 6اِنہاں کُوں رب العالمین دے حضُور خالص سونے دی میز اُتے ڈُو ڈھیریاں ءچ رکھائے۔ 7ہر ڈھیری اُتے خالص لُبان رکھائے۔ ایہ لُبان اُوں روٹی کیتے یادگاری دے طور تے ہِک نِشانی ہے جِینکُوں بعد ءچ رب العالمین کیتے ساڑنے۔ 8ہر سبت کُوں رب العالمین دے حضُور تازہ روٹیاں اِیں ترتیب نال میز اُتے رکھڑنیاں ہِن۔ ایہ بنی اِسرائیل کیتے ابدی عہد دی لازمی شرط ہے۔ 9ایہ روٹیاں ہارُون تے اُوندے پوتراں دا حصہ ہِن۔ او اُنہاں کُوں مُقدّس جاہ تے کھاوݨ کیوں جو او ساڑے ونجنڑ آلے نذرانے دا سبھ تُوں مُقدّس حصہ ہِن۔ مَیں رب العالمین کیتے ایہ قُربانیاں ہمیشاں تئیں اِنہاں دا حق راہسن۔“

خُدا دی توہین، قتل یا زخمی کرݨ دیاں سزاواں

10-11ڈیرے ءچ ہِک بندہ ہا جِیندا پِیُو مِصری تے ماء اِسرائیلی ہئی۔ ماء دا ناں سلومِیت ہا، او دِبری دی دِھی تے دان قبیلے دی ہئی۔ ہِک ڈینہوار ایہ بندہ ڈیرے ءچ کہیں اِسرائیلی نال بِھڑن لگا۔ بِھڑدے بِھڑدے اُوں رب العالمین دے ناں اُتے لعنت1 بھیج تے کُفر بَکیا۔ ایہ سُنڑ تے لوک اُونکُوں مُوسیٰ دے کولھ گِھن آئے۔ 12اُنہاں اُونکُوں اُتھاں پہرے ءچ بِلھا تے رب العالمین دی مرضی دا اِنتظار کیتا۔

13وَل رب العالمین مُوسیٰ کُوں آکھیا، 14”لعنت بھیجنڑ آلے کُوں ڈیرے دے باہر گِھن ونجو۔ جِنہاں لوکاں اُونکُوں لعنت کریندے ہوئے سُنڑیا ہے، او یکے آپنڑے ہتھ اُوندے سر اُتے رکھنڑ۔ وَل پُوری جماعت اُونکُوں سنگسار کر ڈیوے۔ 15بنی اِسرائیل کُوں آکھیں جو جیہڑا وی خُدا اُتے لعنت کرے، او آپنڑے گُناہ دی سزا پیسی۔ 16جیہڑا وی رب العالمین دے ناں اُتے کُفر بکے اُونکُوں سزائے موت ڈِتی ونجے۔ یکی جماعت اُونکُوں سنگسار کرے۔ جئیں رب العالمین دے ناں اُتے کُفر بَکیا ہووے بھانویں او دیسی ہووے یا پردیسی، اُونکُوں ہر صورت ءچ موت دی سزا ڈیونڑی ہے۔

17جیہڑا کوئی کہیں دی جان گِھنے، اُونکُوں ہر صورت ءچ موت دی سزا ڈِتی ونجے۔ 18جیہڑا کوئی کہیں جانور کُوں مار سٹے، او اُوندا معاوضہ ڈیوے۔ جان دے بدلے جان ڈِتی ونجے۔ 19جیکر کوئی کہیں کُوں زخمی کر ڈیوے تاں اُوندے نال اُوہو کُجھ کیتا ونجے جیہڑا کُجھ اُوں بئے نال کیتے، 20یعنی ہڈی تروڑن دے بدلے ءچ ہڈی تروڑی ونجے تے اکھ دے بدلے ءچ اکھ تے ڈند دے بدلے ءچ ڈند۔ جیہڑا زخم اُوں بئے کُوں ڈِتے، اُوہو جِیہا زخم اُونکُوں وی ڈِتا ونجے۔ 21جیہڑا کوئی کہیں جانور کُوں مار سٹے، او اُوندا معاوضہ ڈیوے۔ پر جیہڑا کوئی کہیں اِنسان کُوں مارے، اُونکُوں موت دی سزا ڈِتی ونجے۔ 22دیسی تے پردیسی کیتے تُہاڈا قانُون ہِک ہووے کیوں جو مَیں رب العالمین تُہاڈا خُدا ہاں۔“

23وَل مُوسیٰ بنی اِسرائیل نال گالھ کیتی تے اُنہاں رب العالمین اُتے لعنت کرݨ آلے کُوں ڈیرے تُوں باہر کڈھ تے سنگسار کر ڈِتا۔ اُنہاں اُونویں ای کیتا جِینویں رب العالمین مُوسیٰ کُوں حُکم ڈِتا ہا۔