احبار 23

بنی اِسرائیل دیاں عیداں

1وَل رب العالمین مُوسیٰ کُوں آکھیا، 2”بنی اِسرائیل کُوں ڈسا جو ’مَیں رب العالمین دیاں مقرر عیداں ایہ ہِن، جِنہاں دا اعلان کر تے تُہاکُوں مُقدّس اِجتماع کیتے لوکاں کُوں کٹھا کرنڑا ہے۔

سبت دا ڈینہہ

3ہفتے ءچ چِھی ڈینہہ کم کرائے پر ستواں ڈینہہ سبت دا ڈینہہ ہے، جیندے ءچ خاص ارام تے مُقدّس اِجتماع کرنڑا ہے۔ اُوں ڈینہوار کوئی کم نہ کرائے۔ جِتھاں وی تُساں راہو، ایہ ڈینہہ رب العالمین دا سبت منیا ونجے۔

فسح تے بے خمیری روٹی دی عید

4ایہ رب العالمین دیاں عیداں ہِن جِنہاں دا اعلان کر تے تُہاکُوں مُقدّس اِجتماع کیتے لوکاں کُوں مقررہ وقت اُتے کٹھا کرنڑا ہے۔

5فسح دی عید پہلے مہینے دے چوڈھویں ڈینہہ کُوں سِجھ لہندے ویلے رب العالمین کیتے منائی ونجے۔ 6اگلی ڈینہوار یعنی پندھرویں ڈینہہ رب العالمین کیتے بے خمیری روٹی آلی عید منائی ونجے۔ سَت ڈینہہ تئیں تُہاڈی روٹی ءچ خمیر نہ ہووے۔ 7پہلے ڈینہہ تُہاڈا مُقدّس اِجتماع ہووے تے تُساں آپنڑے روزمرہ دے کم نہ کرائے۔ 8اُنہاں سَت ڈینہاں ءچ روزانہ رب العالمین کُوں ساڑے ونجنڑ آلے نذرانے پیش کرائے۔ ستویں ڈینہوار وَل مُقدّس اِجتماع ہووے تے تُساں آپنڑے روزمرہ دے کم نہ کرائے‘۔“

پہلے پھلاں دی عید

9رب العالمین مُوسیٰ کُوں آکھیا، 10”بنی اِسرائیل کُوں ڈسا جو ’جِیں ویلے تُساں اُوں مُلک ءچ داخل تھیؤ جیہڑا مَیں تُہاکُوں ڈیندا ہاں تے غلے دی فصل کپو تاں کاہِن کُوں پہلے پھل دا ہِک گٹھا ڈیوائے۔ 11سبت تُوں اگلی ڈینہوار کاہِن ایہ گٹھا رب العالمین دے حضُور ہلاوے تاں جو او تُہاڈی طرفُوں منظور تھی ونجے۔ 12اُونہئی ڈینہوار بھیڈ دا ہِک سال دا ہِک بے عیب لیلا وی رب العالمین کُوں ساڑے ونجنڑ آلی قُربانی دے طور تے قُربان گاہ اُتے پیش کرائے۔ 13تے اُوندے نال غلے دے نذرانے کیتے تیل رلیا ہویا ترے کلو بہترین میدہ وی پیش کرائے۔ ایہ ساڑے ونجنڑ آلا نذرانہ ہے تے اِیندی خوشبو رب العالمین کُوں پسند ہے۔ اُوندے نال وِیٹے ونجنڑ آلی نذر کیتے ہِک لِیٹر انگُور دا رَس وی پیش کرائے۔ 14جئیں تئیں تُساں آپنڑے خُدا کیتے ایہ نذرانہ نہ گِھن آؤ، اُوں ڈینہہ تئیں نوِیں فصل دی روٹی یا بُھنے ہوئے یا کچے دانڑے ہرگز نہ کھوائے۔ جِتھاں وی تُساں راہندے ہیوے، اِینویں ای کرائے۔ ایہ شرع نسل در نسل قائم راہوے۔

ہفتیاں دی عید

15سبت تُوں اگلی ڈینہوار یعنی جیہڑی ڈینہوار تُساں اناج دا گٹھا ہلائے ونجنڑ آلی قُربانی دے طور تے پیش کرو، اُوں ڈینہوار تُوں اگلے سَت ہفتے گِنڑو۔ 16پنجھاوِیں ڈینہوار یعنی ستویں سبت دی اگلی ڈینہوار رب العالمین کُوں نویں اناج دے نذرانے پیش کرائے۔ 17ہر گھرانڑے ولُوں رب العالمین کُوں ہلائے ونجنڑ آلی قُربانی دے طور تے ڈُو روٹیاں پیش کیتیاں ونجنڑ۔ روٹیاں ترے کلو بہترین میدے تے خمیر نال پکائیاں ونجنڑ۔ ایہ رب العالمین کیتے نذر دے پہلے پھل ہِن۔ 18اُنہاں روٹیاں نال ہِک جوان ڈاند، ڈُو چھترے تے بھیڈ دے بے عیب تے ہِک ہِک سال دے سَت لیلے پیش کرائے۔ اِنہاں کُوں رب العالمین دے حضُور ساڑے ونجنڑ آلی قُربانی دے طور تے پیش کرائے۔ اِیندے نال غلے دے نذرانے تے وِیٹے ونجنڑ آلی نذر وی پیش کرائے۔ ساڑے ونجنڑ آلے اِیں نذرانے دی خوشبو رب العالمین کُوں پسند ہے۔ 19وَل گُناہ تُوں پاک کرݨ آلی قُربانی کیتے ہِک بکرا تے سلامتی دی قُربانی کیتے بھیڈ دے ہِک ہِک سال دے ڈُو لیلے پیش کرائے۔ 20کاہِن بھیڈ دے ڈُو لیلے اُوں پہلے پھل دیاں روٹیاں سمیت ہلائے ونجنڑ آلی قُربانی دے طور تے رب العالمین دے حضُور ہلاوے۔ ایہ رب العالمین کیتے مخصوص تے مُقدّس ہِن تے قُربانیاں ءچوں کاہِن دا حصہ ہِن۔ 21اُوں ڈینہوار تُساں اعلان کر تے لوکاں دا مُقدّس اِجتماع کرائے۔ تُساں آپنڑے روزمرہ دے کم نہ کرائے تے جِتھاں وی تُساں راہو، ایہ شرع نسل در نسل قائم راہوے۔

22کٹائی دے ویلے آپنڑی فصل پُورے طور تے نہ کٹائے بلکہ رَڑھ دے بنیاں اُتے کُجھ چھوڑ ڈیوائے تے کٹائی کریندے ویلے جیہڑا کُجھ بچ ونجے اُونکُوں چھوڑ ڈیوائے۔ بچیا ہویا اناج غریباں تے پردیسیاں کیتے چھوڑ ڈیوائے۔ مَیں رب العالمین تُہاڈا خُدا ہاں‘۔“

نویں سال دی عید

23رب العالمین مُوسیٰ کُوں آکھیا، 24”بنی اِسرائیل کُوں ڈسا جو ستویں مہینے دا پہلا ڈینہہ سبت دے ارام دا ڈینہہ ہے۔ اُوں ڈینہوار مُقدّس اِجتماع ہووے جیندے ءچ یادگاری کیتے نرسِنگا وجایا ونجے۔ 25اُوں ڈینہوار کوئی وی کم نہ کرائے، پر رب العالمین کُوں ساڑے ونجنڑ آلا نذرانہ پیش کرائے۔“

کفارے دا ڈینہہ

26رب العالمین مُوسیٰ کُوں آکھیا، 27”ستویں مہینے دا ڈاہواں ڈینہہ کفارے دا ڈینہہ ہے۔ اُوں ڈینہوار مُقدّس اِجتماع ہووے۔ آپنڑی جان کُوں ڈُکھ ڈیوائے1 تے رب العالمین کُوں ساڑے ونجنڑ آلا نذرانہ پیش کرائے۔ 28اُوں ڈینہوار کم نہ کرائے کیوں جو ایہ کفارے دا ڈینہہ ہے جڈاں تُہاڈے خُدا رب العالمین دے حضُور تُہاڈا کفارہ ڈِتا ویسی۔ 29جیہڑا اُوں ڈینہوار آپنڑی جان کُوں ڈُکھ نہ ڈیسی اُونکُوں خُدا دے لوکاں ءچوں کڈھ ڈِتا ویسی۔ 30جیہڑا اُوں ڈینہوار کم کریسی اُونکُوں مَیں اُوندے لوکاں ءچوں ہلاک کر ڈیساں۔ 31کوئی وی کم نہ کرائے۔ ایہ شرع نسل دَر نسل قائم راہسی تے جِتھاں وی تُساں راہندے ہیوے، اِینکُوں مننڑا ہے۔ 32ایہ ڈینہوار سبت دے ارام دا ڈینہہ ہے جیندے ءچ تُہاکُوں آپنڑی جان کُوں ڈُکھ ڈیونڑا ہے۔ مہینے دے ناویں ڈینہہ دی شام تُوں گِھن تے آندی شام تئیں اِینکُوں منائے۔“

چھپراں دی عید

33رب العالمین مُوسیٰ کُوں آکھیا، 34”بنی اِسرائیل کُوں ڈسا جو ستویں مہینے دی پندھرویں ڈینہوار چھپراں آلی عید مَیں رب العالمین دے ناں تے منائی ونجے۔ 35پہلے ڈینہہ مُقدّس اِجتماع ہووے۔ اِیں ڈینہوار کوئی کم نہ کرائے۔ 36اِنہاں سَت ڈینہاں دے دوران رب العالمین کُوں ساڑے ونجنڑ آلے نذرانے پیش کرائے۔ اٹھویں ڈینہہ مُقدّس اِجتماع ہووے تے رب العالمین کُوں ساڑے ونجنڑ آلی قُربانی پیش کرائے۔ اِیں خاص اِجتماع دے ڈینہہ وی کم نہ کرائے۔

37ایہ رب العالمین دیاں عیداں ہِن جِنہاں دا اعلان کر تے تُہاکُوں لوکاں دا مُقدّس اِجتماع کرنڑا ہے تاں جو رب العالمین کُوں ساڑے ونجنڑ آلے نذرانے پیش کیتے ونجنڑ، یعنی روز دیاں مقررہ ساڑے ونجنڑ آلیاں قُربانیاں، غلے دے نذرانے، ذبیحے تے وِیٹے ونجنڑ آلیاں نذراں۔ 38ایہ قُربانیاں اُنہاں قُربانیاں دے علاوہ ہوسن جیہڑیاں سبت دی ڈینہوار پیش کیتیاں ویسن تے جیہڑیاں تُساں ہدیے دے طور تے یا مَنت مَن تے یا خوشی نال پیش کریسو۔

39تے ستویں مہینے دے پندھرویں ڈینہہ فصل دی کٹائی مُکنڑ تے رب العالمین دی تعظیم ءچ چھپراں آلی ایہ عید سَت ڈینہاں تئیں منائے۔ پہلا ڈینہہ سبت دے ارام دا ڈینہہ ہووے تے آخری ڈینہہ وی۔ 40پہلے ڈینہہ آپنڑے کیتے درختاں دے بہترین پھل، کھجور دیاں ٹَہنڑیاں تے گھاٹے درختاں تے سفیدے دیاں ٹَہنڑیاں بَھن تے ستویں ڈینہہ تئیں آپنڑے خُدا رب العالمین دے حضُور خوشی منائے۔ 41ہر سال ستویں مہینے ءچ رب العالمین دی تعظیم ءچ ایہ عید سَت ڈینہاں تئیں منائے۔ ایہ شرع نسل در نسل قائم راہوے۔ 42عید دے ہفتے دے دوران چھپراں ءچ رہوائے۔ یکے مُلک ءچ آباد پیدائشی اِسرائیلی اِینویں کرݨ۔ 43وَل تُہاڈی اولاد کُوں پتہ لگسی جو بنی اِسرائیل کُوں مِصر ءچوں کڈھیندے ویلے مَیں اُنہاں کُوں چھپراں ءچ وسایا ہا۔ مَیں رب العالمین تُہاڈا خُدا ہاں۔“

44مُوسیٰ بنی اِسرائیل کُوں رب العالمین دیاں عیداں دے بارے ءچ ایہ گالھیں ڈسایاں۔