احبار 22

قُربانی دا گوشت کھاوݨ کیتے ہدایتاں

1رب العالمین مُوسیٰ کُوں آکھیا، 2”ہارُون تے اُوندے پوتراں کُوں ڈسا جو ’او بنی اِسرائیل دے اُنہاں قُربانیاں تے نذرانیاں دا احترام کرݨ جیہڑے تُساں میڈے کیتے مخصوص تے مُقدّس کیتے ہِن، نہ تاں تُساں میڈے ناں دی بے حُرمتی کریسو۔ مَیں رب العالمین ہاں۔ 3جیہڑا کاہِن ناپاک ہووݨ دے باوجود اُنہاں قُربانیاں تے نذرانیاں دے کولھ آ ونجے، جیہڑے بنی اِسرائیل میڈے کیتے مخصوص تے مُقدّس کیتے ہِن، اُونکُوں میڈے حضُور تُوں کڈھ ڈِتا ونجے۔ ایہ شرع نسل در نسل قائم راہوے۔ مَیں رب العالمین ہاں۔

4ہارُون دی اولاد ءچوں جیہڑا وی چم دی خطرناک بیماری1 یا جریان دا مریض ہووے، جئیں تئیں او پاک صاف نہ تھی ونجے، اُونکُوں مُقدّس قُربانیاں تے نذرانیاں ءچوں آپنڑا حق کھاوݨ دی اِجازت نئیں۔ تے جیہڑا کاہِن ایجھی کہیں شے کُوں ہتھ لاوے جیہڑی لاش پارُوں ناپاک تھی گئی ہووے یا ایجھے بندے کُوں ہتھ لاوے جِیندا نُطفہ واہندا ہووے، او ناپاک تھی ویسی۔ 5یا جے او ریڑھن آلے حرام جانور یا ناپاک بندے کُوں ہتھ لاوے بھانویں اُوندی ناپاکی کہیں وی قِسم دی کیوں نہ ہووے، او ناپاک تھی ویسی۔ 6جیہڑا اِیہو جیہی کہیں وی شے کُوں ہتھ لاوے، او شام تئیں ناپاک راہسی۔ جئیں تئیں او پانڑی نال غُسل نہ کر گِھنے، مُقدّس قُربانیاں ءچوں آپنڑا حصہ نہ کھاوے۔ 7سِجھ لہوݨ تُوں بعد او پاک صاف تھی ویسی تے مُقدّس قُربانیاں ءچوں آپنڑا حصہ کھا سگسی کیوں جو او اُوندی خوراک ہے۔ 8کاہِن اِیہو جِیہے جانوراں دا گوشت نہ کھاوے جیہڑے مر گئے ہووݨ یا جِنہاں کُوں جنگلی جانوراں پھاڑ سٹیا ہووے، نہ تاں او ناپاک تھی ویسی۔ مَیں رب العالمین ہاں۔

9کاہِن میڈیاں ہدایتاں دے مطابق چلنڑ، نہ تاں او قصُوروار بنڑ ویسن تے مُقدّس شیواں دی بے حُرمتی کرݨ پارُوں مر ویسن۔ مَیں رب العالمین ہاں جیہڑا اُنہاں کُوں آپنڑے کیتے مخصوص تے مُقدّس کریندا ہاں۔

10صرف کاہِن دے خاندان دے لوک مُقدّس نذرانے ءچوں کھا سگدے ہِن۔ کہیں مہمان یا مزدُور کُوں اِجازت کائنی۔ 11پر کاہِن دا غُلام یا لونڈی اُوندے ءچوں کھا سگدے ہِن، بھانویں اُنہاں کُوں مُل گِھدا گِیا ہووے یا او اُوندے گھر ءچ جمّے ہووݨ۔ 12جیکر کاہِن دی دِھی کہیں اِیہو جِیہے بندے نال پرنیجی ہووے جیہڑا کاہِن نئیں تاں اُوں دِھی کُوں مُقدّس نذرانے ءچوں کھاوݨ دی اِجازت نئیں۔ 13پر جے او بیوہ یا طلاق یافتہ ہووے تے اُوندے بال نہ ہووݨ تے او آپنڑے پِیُو دے گھر وَنج تے اُتھاں اِینویں راہوے جِینویں آپنڑی جوانی ءچ راہندی ہئی تاں او آپنڑے پِیُو دے مُقدّس کھانڑے ءچوں کھا سگدی ہے پر کہیں غیر بندے کُوں اُونکُوں کھاوݨ دی اِجازت نئیں۔

14جیہڑے بندے نہ جانڑدے ہوئے مُقدّس نذرانیاں ءچوں کاہِن دا حصہ کھادے، او کاہِن کُوں یکا واپس کرݨ تُوں علاوہ وِیہہ فیصد اضافی ڈیوے۔ 15کاہِن بنی اِسرائیل دیاں اُنہاں مُقدّس شیواں دی جیہڑیاں او رب العالمین کُوں پیش کریندے ہِن، بے حُرمتی نہ کرݨ۔ 16یعنی او ڈُوجھے اِسرائیلیاں کُوں ایہ مُقدّس شیواں نہ کھاوݨ ڈیوݨ، نہ تاں او اُنہاں کُوں وڈا قصُوروار بنڑا ڈیسن۔ مَیں رب العالمین ہاں جیہڑا اُنہاں کُوں آپنڑے کیتے مخصوص تے مُقدّس کریندا ہاں‘۔“

جانوراں دیاں قُربانیاں دے بارے ءچ ہدایتاں

17رب العالمین مُوسیٰ کُوں آکھیا، 18”ہارُون، اُوندے پوتراں تے بنی اِسرائیل کُوں ڈسا جو ’جیکر تُہاڈے ءچوں کوئی اِسرائیلی یا پردیسی رب العالمین کُوں ساڑے ونجنڑ آلیاں قُربانیاں پیش کرے، بھانویں او ایہ سبھ کُجھ مَنت مَن تے پیش کریندا پِیا ہووے یا خوشی نال 19تاں لازم ہے جو تُساں ہِک بے عیب ڈاند، چھترا یا بکرا پیش کرو۔ وَل ای اُونکُوں قبول کیتا ویسی۔ 20قُربانی کیتے کڈھائیں اِیہو جِیہا جانور پیش نہ کرائے جیندے ءچ نُقص ہووے، نہ تاں او تُہاڈی طرفُوں منظور نہ تھیسی۔ 21جیکر کوئی آپنڑی مَنت پوری کرݨ کیتے یا خوشی نال گاں، ڈانڈ یا بھیڑ بکری سلامتی دی قُربانی دے طور تے رب العالمین کُوں پیش کرے تاں لازم ہے جو جانور بےعیب ہووے۔ وَل اُونکُوں قبُول کیتا ویسی۔ 22رب العالمین کُوں اِیہو جِیہے جانور پیش نہ کرائے جیہڑے اندھے ہووݨ، جِنہاں دے اعضا تروٹے یا کپے ہوئے ہووݨ، جِنہاں کُوں رسولی ہووے یا جِنہاں کُوں چم دی خطرناک بیماری لگی ہووے۔ ایجھے جانوراں کُوں کڈھائیں ساڑے ونجنڑ آلے نذرانے دے طور تے رب العالمین کُوں پیش نہ کرائے۔ 23پر جیہڑے ڈاند یا بھیڈ دے کہیں اَنگ ءچ کمی بیشی ہووے، اُونکُوں خوشی دی قربانی دے طور تے پیش کیتا وَنج سگدے۔ پر جیکر او اُونکُوں آپنڑی مَنت پوری ہووݨ کیتے پیش کرے تاں او قبول نہ کیتی ویسی۔ 24رب العالمین کُوں اِیہو جِیہا جانور پیش نہ کرائے جیندے کپورے پِھسے ہوئے، بَھنّے ہوئے یا کپے ہوئے ہووݨ۔ آپنڑے مُلک ءچ ایجھا کم نہ کرائے۔ 25نہ اِیہو جِیہے جانور کہیں غیر مُلکی تُوں مُل گِھن تے آپنڑے خُدا کُوں کھاوݨ آلے نذرانے دے طور تے پیش کرائے۔ اِیہو جِیہے جانور تُہاڈی طرفُوں منظور نہ تھیسن کیوں جو اُنہاں ءچ نُقص تے کمی ہے‘۔“

26رب العالمین مُوسیٰ کُوں ایہ وی آکھیا، 27”جِیں ویلے کہیں گاں، بھیڈ یا بکری دا بچّہ جمدے تاں لازم ہے جو او پہلے سَت ڈینہوار آپنڑی ماء دے نال راہوے۔ اٹھویں ڈینہہ تُوں رب العالمین اُونکُوں ساڑے ونجنڑ آلے نذرانے دے طور تے قبول کریسی۔ 28کہیں گاں، بھیڈ یا بکری دے لیلے کُوں اُوندی ماء دے نال ہِکو ڈینہوار ءچ ذبح نہ کرائے۔ 29جِیں ویلے تُساں رب العالمین کُوں شُکرگزاری دے طور تے سلامتی دی کوئی قُربانی پیش کرو تاں اُونکُوں اِینویں پیش کرائے جو او تُہاڈی طرفُوں قبول تھی ونجے۔ 30اُونکُوں اُوں ڈینہوار ای کھاونڑا ہے تے آندی سویل تئیں کُجھ وی بچیا نہ راہوے۔ مَیں رب العالمین ہاں۔

31میڈے حُکم مَن تے اُنہاں اُتے عمل کرو۔ مَیں رب العالمین ہاں۔ 32میڈے پاک ناں دی بے حُرمتی نہ کرائے۔ لازم ہے جو میکُوں بنی اِسرائیل دے وچال مُقدّس منیا ونجے۔ مَیں رب العالمین ہاں جیہڑا تُہاکُوں آپنڑے کیتے مخصوص تے مُقدّس کریندا ہاں۔ 33مَیں تُہاکُوں مِصر ءچوں کڈھ آیا ہاں تاں جو تُہاڈا خُدا ہوواں۔ مَیں رب العالمین ہاں۔“