Modern Central Saraiki Bible
احبار 21
کاہِناں کیتے ہدایتاں
رب العالمین مُوسیٰ کُوں آکھیا، ”کاہِناں کُوں یعنی ہارُون دے پوتراں کُوں ڈسا جو او آپنڑے آپ کُوں کہیں اِسرائیلی دی لاش کولھ وَنج تے ناپاک نہ کرݨ، سوائے آپنڑے قریبی رشتے داراں دے یعنی ماء، پِیُو، دِھی، پوتر، بِھرا تے جیہڑی کُنواری بھینڑ اُنہاں دے گھر ءچ راہندی ہے۔ اُوندی خاطر او آپنڑے آپ کُوں ناپاک کر سگدے۔ او آپنڑے لوکاں ءچ کہیں بئے پارُوں آپنڑے آپ کُوں ناپاک نہ کرݨ، نہ تاں او آپنڑی بے حُرمتی کریسن۔
ماتم ویلے کاہِن آپنڑے سر کُوں نہ مُنواوݨ، نہ آپنڑی ڈاڑھی بنڑواوݨ تے نہ کٹ لا تے خود کُوں زخمی کرݨ۔
او آپنڑے خُدا کیتے مخصوص تے مُقدّس راہوݨ تے آپنڑے خُدا دے ناں کُوں بے حُرمت نہ کرݨ۔ کیوں جو او ساڑے ونجنڑ آلے نذرانے یعنی کھاوݨ آلیاں چیزاں دے نذرانے رب العالمین آپنڑے خُدا کُوں پیش کریندے ہِن، اِیں کیتے لازم ہے جو او مُقدّس راہوݨ۔ کاہِن کہیں وی زِناکار، طوائف یا طلاق یافتہ عورت کُوں نہ پرناوݨ کیوں جو او آپنڑے خُدا کیتے مخصوص تے مُقدّس ہِن۔ تُساں کاہِن کُوں مُقدّس سمجھائے کیوں جو او مَیں تُہاڈے خُدا کُوں کھاوݨ آلیاں چیزاں دے نذرانے پیش کریندے ہِن۔ او تُہاڈی نظر ءچ مُقدّس ہووݨ کیوں جو مَیں رب العالمین جیہڑا تُہاکُوں مُقدّس کریندا ہاں، قدُّوس ہاں۔
کہیں کاہِن دی دِھی جیہڑی زِنا کاری نال آپنڑی قدُوسیت دی بے حُرمتی کریندی ہے، او آپنڑے پِیُو دی قدُوسیت دی وی بے حُرمتی کریندی ہے۔ اُونکُوں ساڑ ڈِتا ونجے۔
کاہِنِ اعظم جیندے سر اُتے مسح کرݨ آلا تیل وِیٹیا گئے تے جیہڑا کہانت دے مُقدّس کپڑے پاوݨ کیتے مقرر کیتا گئے، او رنج دی حالت ءچ آپنڑے وال کِھنڈݨ نہ ڈیوے تے نہ کڈھائیں آپنڑے کپڑے پھاڑے۔ او کہیں لاش دے کولھ نہ ونجے، بھانویں او اُوندے پِیُو یا ماء دی لاش ای کیوں نہ ہووے، نہ تاں او ناپاک تھی ویسی۔ جئیں تئیں کوئی لاش اُوندے گھر ءچ پئی راہوے، او مُقدّس تمبُو کُوں چھوڑ تے آپنڑے گھر نہ ونجے، نہ تاں او مُقدّس تمبُو کُوں ناپاک کر ڈیسی، کیوں جو اُونکُوں اُوندے خُدا دے خاص تیل نال مسح کر تے مخصوص تے مُقدّس کیتا گئے۔ مَیں رب العالمین ہاں۔ کاہِنِ اعظم کُوں صرف کُنواری نال پرنیجنڑ دی اِجازت ہے۔ او بیوہ، طلاق یافتہ، طوائف یا زِنا کار عورت نال نہ پرنیجے بلکہ آپنڑے قبیلے دی کُنواری نال پرنیجے، نہ تاں اُوندی قوم ءچ اُوندی اولاد ناپاک ہوسی۔ مَیں رب العالمین ہاں جیہڑا اُونکُوں آپنڑے کیتے مخصوص تے مُقدّس کریندا ہاں۔“
رب العالمین مُوسیٰ کُوں ایہ وی آکھیا، ”ہارُون کُوں ڈسا جو ’تیڈی اولاد ءچوں کوئی وی جیندے جِسم ءچ نُقص ہووے، میڈے حضُور آ تے آپنڑے خُدا کُوں کھاوݨ آلے نذرانے پیش نہ کرے۔ ایہ شرع نسل در نسل قائم راہوے۔ کوئی وی معذور، اندھا، لنگڑا، چِیری ہوئی نک آلا یا کہیں وی اَنگ ءچ کمی بیشی آلا میڈے حضُور نہ آوے۔ تے نہ او جِیندا ہتھ یا پیر ترُوٹیا ہووے، نہ کُبڑا، نہ بونڑا، نہ او جیندی اکھ ءچ نُقص ہووے، یا جِینکُوں خارش ہووے یا جیہڑا کھسّی ہووے۔ ہارُون کاہِن دی کوئی وی اولاد جیندے جِسم ءچ نُقص ہووے، مَیں رب العالمین دے حضُور آ تے ساڑے ونجنڑ آلے نذرانے پیش نہ کرے۔ کیوں جو اُوندے ءچ نُقص ہے، اِیں کیتے او میڈے حضُور آ تے آپنڑے خُدا کُوں کھاوݨ آلے نذرانے پیش نہ کرے۔ اُونکُوں خُدا دے مُقدّس تے سبھ تُوں مُقدّس کھانڑے ءچوں تاں کھاوݨ دی اِجازت ہے پر کیوں جو اُوندے ءچ نُقص ہے، اِیں کیتے او سبھ تُوں مُقدّس کمرے دے پڑدے دے کولھ نہ ونجے تے نہ قُربان گاہ دے کولھ آوے، نہ تاں او میڈیاں مُقدّس شیواں کُوں ناپاک کر ڈیسی، کیوں جو مَیں رب العالمین ہاں جیہڑا کاہِناں کُوں آپنڑے کیتے مخصوص تے مُقدّس کریندا ہاں‘۔“
مُوسیٰ ایہ ہدایتاں ہارُون، اُوندے پوتراں تے یکے بنی اِسرائیل کُوں ڈِتیاں۔
Modern Central Saraiki Bible. Copyright © Strategic Resource Group. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.