احبار 20

نافرمانی دیاں سزاواں

1رب العالمین مُوسیٰ کُوں آکھیا، 2”بنی اِسرائیل کُوں ایہ ڈسا، ’تُہاڈے ءچوں یا اِسرائیل ءچ راہنڑ آلے پردیسیاں ءچوں جیہڑا وی آپنڑے بال کُوں مولک دیوتا دے سامنڑے قُربانی دے طور تے پیش کرے، او جان تُوں مار ڈِتا ونجے۔ جماعت دے لوک اُونکُوں سنگسار کر ڈیوݨ۔ 3مَیں خود اِیہو جِیہے بندے دے خلاف تھی ویساں تے اُونکُوں اُوندے لوکاں ءچوں کڈھ ڈیساں کیوں جو اُوں آپنڑا بال مولک دیوتا کُوں پیش کر تے میڈے مُقدّس تمبُو کُوں ناپاک کیتے تے میڈے ناں دی بے حُرمتی کیتی ہے۔ 4جیکر جماعت دے لوک اِیہو جِیہے بندے دیاں حرکتاں تُوں آپنڑے اکھیں نُوٹ گِھننڑ تے اُونکُوں سزائے موت نہ ڈیوݨ 5تاں وَل مَیں خود اِیہو جِیہے بندے تے اُوندے گھرانڑے دے خلاف کھڑا تھی ویساں۔ مَیں اُونکُوں تے اُنہاں یکے لوکاں کُوں بنی اِسرائیل ءچوں کڈھ ڈیساں جِنہاں اُوندے پِچُھوں لگ تے مولک دیوتا کُوں سجدہ کر تے بےوفائی1کیتی۔

6جیہڑا بندہ مویاں نال رابطہ کرݨ آلیاں تے فالگیراں دو رجُوع کرے، مَیں اُوندے خلاف تھی ویساں۔ اُنہاں دی پیروی کرݨ نال اِیہو جِیہا بندہ زِنا کریندے۔ مَیں اُونکُوں اُوندے لوکاں ءچوں کڈھ ڈیساں۔ 7آپنڑے آپ کُوں میڈے کیتے مخصوص تے مُقدّس کرو کیوں جو مَیں رب العالمین تُہاڈا خُدا ہاں۔ 8میڈیاں ہدایتاں مَن تے اُنہاں اُتے عمل کرو۔ مَیں رب العالمین ہاں جیہڑا تُہاکُوں مُقدّس کریندا ہاں۔

9جیہڑا وی آپنڑی ماء یا آپنڑے پِیُو اُتے لعنت کرے، او جان تُوں مار ڈِتا ونجے۔ آپنڑے ماء پِیُو اُتے لعنت کرݨ پارُوں او آپنڑی موت دا ذمہ دار خود ہے۔

10جیکر کوئی مرد کہیں بئے دی ذال نال زِنا کرے تاں اُوں مرد تے تریمت ڈوہائیں کُوں جان تُوں مار ڈِتا ونجے۔

11جیہڑا آپنڑے پِیُو دی ذال نال ہمبستری کرے، اُوں آپنڑے پِیُو دی بے حُرمتی کیتی ہے تے ڈوہائیں کُوں جان تُوں مار ڈِتا ونجے۔ او آپنڑی موت دے ذمہ دار خود ہِن۔

12جیکر کوئی مرد آپنڑی نُونہہ نال ہم بِستری کرے تاں ڈوہائیں کُوں جان تُوں مار ڈِتا ونجے۔ اُنہاں بہُوں شرمناک حرکت کیتی ہے۔ او آپنڑی موت دے ذمہ دار خود ہِن۔

13جیکر کوئی مرد کہیں بئے مرد نال جنسی مِلاپ کرے تاں اُنہاں ڈوہائیں مکرُوہ حرکت کیتی ہے تے اُنہاں کُوں جان تُوں مار ڈِتا ونجے۔ او آپنڑی موت دے ذمہ دار خود ہِن۔

14جیکر کوئی بندہ آپنڑی ذال دے علاوہ آپنڑی سس نال وی جنسی مِلاپ کرے تاں اُنہاں بہُوں شرمناک حرکت کیتی ہے۔ اُوں بندے تے ڈوہائیں عورتاں کُوں ساڑ ڈِتا ونجے تاں جو تُہاڈے وچال خباثت باقی نہ راہوے۔

15جیہڑا مرد کہیں جانور نال جنسی تعلق رکھے، او جان تُوں مار ڈِتا ونجے تے جانور وی مار ڈِتا ونجے۔ 16جیہڑی عورت کہیں جانور نال جنسی مِلاپ کرݨ دی کوشش کرے، او جان تُوں مار ڈِتی ونجے تے جانور وی مار ڈِتا ونجے۔ او آپنڑی موت دے ذمہ دار خود ہِن۔

17جیہڑا مرد آپنڑی بھینڑ نال ہمبستری کرے بھانویں او اُوندے پِیُو دی دِھی ہووے یا ماء دی دِھی، اُوں شرمناک حرکت کیتی ہے۔ اُنہاں ڈوہائیں کُوں بنی اِسرائیل قوم ءچوں کڈھ ڈِتا ونجے۔ اِیہو جِیہے بندے آپنڑی بھینڑ دی بے حُرمتی کیتی ہے۔ اِیں کیتے او آپنڑے قصُور دا ذمہ دار ہوسی۔

18جیکر کوئی مرد ماہواری دے ڈینہاں ءچ کہیں عورت نال ہم بِستری کرے تاں ڈوہائیں کُوں اُنہاں دے لوکاں ءچوں کڈھ ڈِتا ونجے کیوں جو ڈوہائیں عورت دی رَت دے منبع تُوں پڑدہ چاتے۔

19آپنڑی ماسی یا بُوا نال ہمبستری نہ کرائے کیوں جو جیہڑا اِینویں کرے او آپنڑے قریبی رشتے داراں دی بے حُرمتی کریندے۔ ڈوہائیں آپنڑے گُناہ دی سزا پیسن۔

20جیہڑا کوئی آپنڑی چاچی یا تائی نال ہمبستری کرے، او آپنڑے چاچے یا تائے دی بے حُرمتی کریندے۔ ڈوہائیں آپنڑے قصُور دے ذمہ دار ہوسن تے او بے اولاد مرسن۔

21جیہڑا آپنڑی بھرجائی نال ہمبستری کرے، اُوں ہِک بہُوں پلیت حرکت کیتی ہے۔ اُوں آپنڑے بِھرا دی بے حُرمتی کیتی ہے تے او بے اولاد مرسن۔

22میڈے سارے حُکماں تے ہدایتاں کُوں مَن تے اُنہاں اُتے عمل کرائے، نہ تاں جیہڑے مُلک ءچ مَیں تُہاکُوں گِھدی ویندا ہاں او تُہاکُوں اُگل ڈیسی۔ 23اُنہاں قوماں دیاں رسماں رواجاں اُتے نہ ٹُرائے، جِنہاں کُوں مَیں تُہاڈے اگُوں کڈھ ڈیساں۔ میکُوں اِیں پارُوں اُنہاں تُوں نفرت تھی گئی ہے کیوں جو او ایہ سبھ کُجھ کریندے ہِن۔ 24پر مَیں تُہاکُوں آکھے، ”تُساں ای اُنہاں دے مُلک اُتے قبضہ کریسو۔ مَیں او مُلک تُہاکُوں ڈے ڈیساں جیندے ءچ کھیر تے ماکھی وافر ہے۔“ مَیں رب العالمین تُہاڈا خُدا ہاں، جئیں تُہاکُوں ڈُوجھیاں قوماں ءچوں چُنڑ تے اَنج کیتے۔ 25اِیں کیتے لازم ہے جو تُساں زمین اُتے ٹُرݨ آلے جانوراں تے پکھیاں ءچوں حلال تے حرام ءچ فرق کرو۔ آپنڑے آپ کُوں حرام جانور، پکھی یا ریڑھن آلے جانور کھا تے مکرُوہ نہ بنڑائے۔ مَیں ای اُنہاں کُوں تُہاڈے کیتے ناپاک قرار ڈِتے۔ 26تُساں آپنڑے آپ کُوں میڈے کیتے پاک رکھو کیوں جو مَیں رب العالمین پاک ہاں تے مَیں ای تُہاکُوں چُنڑ تے ڈُوجھیاں قوماں ءچوں آپنڑے کیتے اَنج کر گِھدے۔

27تُہاڈے ءچوں جیہڑا مویاں نال رابطہ کرے یا جادُو نال غیب دانی کرے، بھانویں عورت ہووے یا مرد جان تُوں مار ڈِتا ونجے۔ اُونکُوں سنگسار کیتا ونجے۔ او آپنڑی موت دا ذمہ دار خود ہے‘۔“