احبار 18

ناجائز جنسی تعلقات

1رب العالمین مُوسیٰ کُوں آکھیا، 2”بنی اِسرائیل کُوں ڈسا جو ’مَیں رب العالمین تُہاڈا خُدا ہاں۔ 3مِصریاں جِیہے کم نہ کرائے جِنہاں دے وچال تُساں راہندے ہَوے تے نہ کنعان مُلک دے لوکاں جِیہے جِنہاں دے کولھ مَیں تُہاکُوں گِھن تے ویندا پِیا ہاں۔ اُنہاں دے رسم و رواج اُتے نہ ٹُرائے۔ 4میڈے حُکماں اُتے عمل کر تے میڈیاں ہدایتاں دے مطابق چلائے۔ مَیں رب العالمین تُہاڈا خُدا ہاں۔ 5میڈے حُکماں تے ہدایتاں دے مطابق چلائے کیوں جو جیہڑا اُنہاں اُتے عمل کریسی اُنہاں دے وسیلے زندہ راہسی۔ مَیں رب العالمین ہاں۔

6تُہاڈے ءچوں کوئی وی آپنڑے قریبی رشتے دار نال ہم بستر نہ تھیوے۔ مَیں رب العالمین ہاں۔

7آپنڑی ماء نال ہمبستری نہ کریں نہ تاں تیڈے پِیُو دی بے حُرمتی تھی ویسی۔ او تیڈی ماء ہے، اِیں کیتے اُوندے نال ہمبستری نہ کریں۔

8آپنڑے پِیُو دی کہیں وی ذال نال ہمبستری نہ کریں نہ تاں تیڈے پِیُو دی بے حُرمتی تھی ویسی۔

9آپنڑی بھینڑ نال ہمبستری نہ کریں، بھانویں او تیڈی ماء یا تیڈے پِیُو دی دِھی ہووے تے بھانویں او تیڈے گھر یا کہیں بئی جاہ تے جمی ہووے۔

10آپنڑی پوتری یا ڈوہتری نال ہمبستری نہ کریں، نہ تاں تیڈی آپنڑی بے حُرمتی تھی ویسی۔

11آپنڑے پِیُو دی ذال دی دِھی نال ہمبستری نہ کریں، او تیڈی بھینڑ ہے۔

12آپنڑی بُوا نال ہمبستری نہ کریں، او تیڈے پِیُو دی قریبی رشتہ دار ہے۔

13آپنڑی ماسی نال ہمبستری نہ کریں، او تیڈی ماء دی قریبی رشتہ دار ہے۔

14آپنڑے پِیُو دے بِھرا دی ذال نال ہمبستری نہ کریں، نہ تاں تیڈے پِیُو دے بِھرا دی بے حُرمتی تھی ویسی۔ اُوندی ذال تیڈی چاچی ہے۔

15آپنڑی نُونہہ نال ہمبستری نہ کریں، او تیڈے پوتر دی ذال ہے۔ تُوں اُوندے نال ہمبستری نہ کریں۔

16آپنڑی بھرجائی نال ہمبستری نہ کریں، نہ تاں تیڈے بِھرا دی بے حُرمتی تھی ویسی۔

17جیکر کہیں عورت نال تیڈا جنسی تعلق ہے تاں اُوندی دِھی، پوتری یا ڈوہتری نال ہمبستری نہ کریں کیوں جو او اُوندے قریبی رشتہ دار ہِن تے ایہ بہُوں شرم ناک حرکت ہے۔

18آپنڑی ذال دے جیندے جی اُوندی بھینڑ نال نہ پرنیجیں۔ اُونکُوں آپنڑی ذال دی سوکنڑ نہ بنڑاویں۔

19کہیں عورت نال اُوندی ماہواری دے ڈینہاں ءچ ہمبِستری نہ کریں کیوں جو اِیں دوران او ناپاک ہے۔

20کہیں ڈُوجھے مرد دی ذال نال ہمبِستری نہ کریں نہ تاں تُوں آپنڑے آپ کُوں ناپاک کر گِھنسیں۔

21تُوں آپنڑے کہیں وی بال کُوں مولک دیوتا دے سامنڑے قُربانی دے طور تے پیش نہ کریں۔ ایجھی حرکت نال تُوں آپنڑے خُدا دے ناں کُوں داغ لیسیں۔ مَیں رب العالمین ہاں۔

22مرد ڈُوجھے مرد نال جنسی تعلق نہ رکھے، ایہ حرکت بہُوں مکرُوہ ہے۔

23کہیں جانور نال جنسی تعلق نہ رکھیں نہ تاں تُوں ناپاک تھی ویسیں۔ عورتاں وی اِینویں نہ کرݨ کیوں جو ایہ وڈی شرمناک حرکت ہے۔

24ایجھیاں حرکتاں نال آپنڑے آپ کُوں ناپاک نہ کرائے کیوں جو جِنہاں قوماں کُوں مَیں تُہاڈے اگُوں مُلک ءچوں کڈھیساں، او اِیں طریقے نال ناپاک تھیندیاں ریہیاں ہِن، 25تے مُلک آپ وی ناپاک تھیّا۔ اِیں کیتے مَیں اُوندے قصُور پارُوں اُونکُوں سزا ڈِتی تے نتیجے ءچ اُوں آپنڑے لوکاں کُوں اُگل ڈِتا۔ 26تُساں میڈے حُکماں تے ہدایتاں دے مطابق ٹُرو۔ نہ دیسی تے نہ تُہاڈے وِچال راہوݨ آلے پردیسی اِیہو جیہی کوئی مکرُوہ حرکت کرݨ، 27کیوں جو تُہاڈے تُوں پہلے اِیں مُلک ءچ راہوݨ آلے لوکاں ایہ یکے مکرُوہ کم کیتے ہَن تے اِینویں مُلک ناپاک تھیّا۔ 28تے جیکر تُساں وی مُلک کُوں ناپاک کریسو تاں او تُہاکُوں وی اُونویں ای اُگل ڈیسی جِینویں اُوں تُہاڈے تُوں پہلے موجود قوماں کُوں اُگل ڈِتا ہا۔ 29جیہڑا وی اِنہاں مکرُوہ کماں ءچوں کوئی کم کرے، اُونکُوں اُوندی قوم ءچوں کڈھ ڈِتا ونجے۔ 30میڈے حُکماں دے مطابق ٹُردے رہوائے تے اِیہو جِیہے مکرُوہ رسم و رواج اِختیار نہ کرائے جیہڑے تُہاڈے تُوں پہلے کیتے ویندے ہَن۔ اُنہاں نال آپنڑے آپ کُوں ناپاک نہ کرائے۔ مَیں رب العالمین تُہاڈا خُدا ہاں‘۔“