خرُوج 6

1رب العالمین جواب ڈِتا، ”ہُنڑ تُوں ڈیکھسیں جو مَیں فرعون نال کیا کریندا ہاں۔ میڈی عظیم قُدرت تُوں مجبور تھی تے او میڈے لوکاں کُوں ونجنڑ ڈیسی بلکہ اُنہاں کُوں زبردستی آپنڑے مُلک ءچوں کڈھ ڈیسی۔“

2خُدا مُوسیٰ کُوں ایہ وی آکھیا، ”مَیں رب العالمین ہاں۔ 3مَیں ابرہام، اِضحاق تے یعقُوب اُتے قُدرت آلے خُدا دے طور تے ظاہر تھیّا۔ پر مَیں اُنہاں اُتے آپنڑے ’یہوواہ1‘ ناں دے نال ظاہر نہ تھیّا۔ 4مَیں اُنہاں نال عہد کیتے جو اُنہاں کُوں کنعان مُلک ڈیساں جِتھاں او پردیسی ہَن۔ 5ہُنڑ مَیں بنی اِسرائیل دے ہائیں سُنڑ گِھدیاں ہِن جیہڑیاں او مِصریاں دی غُلامی ءچ ڈُکھ پارُوں بھریندے پئے ہِن تے مَیں آپنڑے اُوں عہد کُوں یاد کیتے۔

6اِیں واسطے تُوں بنی اِسرائیل کُوں آکھ، ’مَیں رب العالمین ہاں۔ مَیں تُہاکُوں مِصریاں دی غُلامی تُوں ازاد کریساں تے اُنہاں دی سختی تُوں بچیساں۔ مَیں آپنڑی قُدرت ڈِکھا تے، تے اُنہاں کُوں وڈیاں وڈیاں سزاواں ڈے تے تُہاکُوں چُھڑویساں۔ 7مَیں تُہاکُوں آپنڑے لوک بنڑیساں تے تُہاڈا خُدا ہوساں۔ وَل تُہاکُوں پتہ لگ ویسی جو مَیں رب تُہاڈا خُدا ہاں جئیں تُہاکُوں مِصریاں دی غُلامی تُوں ازاد کیتے۔ 8مَیں تُہاکُوں اُوں مُلک ءچ گِھن ویساں جیندے ڈیوݨ دا وعدہ مَیں قَسم کھا تے ابرہام، اِضحاق تے یعقُوب نال کیتا ہا۔ او مُلک تُہاڈی میراث ہوسی۔ مَیں رب العالمین ہاں‘۔“

9مُوسیٰ ایہ سبھ کُجھ بنی اِسرائیل کُوں ڈسا ڈِتا۔ پر اُنہاں سخت کم، تے بے دِلی دے سببّوں اُوندی گالھ نہ سُنڑی۔

10وَل رب العالمین مُوسیٰ کُوں آکھیا، 11”وَنج، مِصر دے بادشاہ فرعون کُوں ڈسا جو بنی اِسرائیل کُوں آپنڑے مُلک ءچوں ونجنڑ ڈیوے۔“

12پر مُوسیٰ رب العالمین کُوں آکھیا، ”ڈیکھ جڈاں بنی اِسرائیل میڈی گالھ نئیں سُنڑی تاں فرعون میڈی کیا سُنڑسی۔ مَیں تاں پہلے ای اَڑ اَڑ تے بُلیندا ہاں؟“

13پر رب العالمین موسیٰ تے ہارُون نال بنی اِسرائیل تے مِصری بادشاہ فرعون دے بارے ءچ گالھ کیتی تے حُکم ڈِتا جو او بنی اِسرائیل کُوں مِصر ءچوں کڈھ آوݨ۔

مُوسیٰ تے ہارُون دے پِیُو ڈاڈا

14اِسرائیل2 دے آبائی خانداناں دے سردار ایہ ہِن:

اِسرائیل دے پلوٹھے رُوبِن دے چار پوتر حنُوک، فلُّو، حصرون تے کرمی ہَن۔ ایہ رُوبِن ءچوں نِکلے ہوئے خانداناں دے سردار ہَن۔

15شمعون دے چِھی پوتر یموایل، یمِین، اُہد، یکِین، صُحر تے ساؤل ہَن۔ ساؤل کنعانی عورت دا بال ہا۔ ایہ شمعون ءچوں نِکلے ہوئے خانداناں دے سردار ہَن۔

16لاوی دے ترے پوتر جیرسون، قہات تے مراری ہَن۔ لاوی ہِک سو ستتریح (137) سال دی عُمر ءچ فوت تھیّا۔ 17جیرسون دے ڈُو پوتر لِبنی تے سِمعی ہَن۔ ایہ جیرسون ءچوں نِکلے ہوئے خانداناں دے سردار ہَن۔ 18قہات دے چار پوتر عمرام، اِضہار، حبرون تے عُزی ایل ہَن۔ قہات ہِک سو تیتریح (133) سال دی عُمر ءچ فوت تھیّا۔ 19مراری دے ڈُو پوتر مَحلی تے مُوشی ہَن۔ ایہ لاوی قوم ءچوں نِکلے ہوئے خانداناں دے سردار ہَن۔

20عمرا م آپنڑی بُوا یوکبد نال پرنیوا کیتا۔ اُنہاں دے ڈُو پوتر مُوسیٰ تے ہارُون جمّے۔ عمرام ہِک سو ستتریح (137) سال تئیں زندہ رِیہا۔ 21اِضہار دے ترے پوتر قورح، نفج تے زِکری ہَن۔ 22عُزی ایل دے ترے پوتر میسائیل، الصفن تے سِتری ہَن۔

23ہارُون الِیسبَع نال پرنیجیا۔ الِیسبَع عمِینداب دی دِھی تے نحسون دی بھینڑ ہئی۔ اُنہاں دے چار پوتر ندب، ابِیہُو، الِیعزر تے اِتمر ہَن۔ 24قورح دے ترے پوتر اسیر، القانہ تے اَبیاسف ہَن۔ ایہ قورح ءچوں نِکلے ہوئے خانداناں دے سردار ہَن۔ 25ہارُون دا پوتر الِیعزر، فوطی ایل دی ہِک دِھی نال پرنیجیا۔ اُنہاں دا ہِک پوتر فِینحاس ہا۔

ایہ سارے لاوی دے آبائی خانداناں دے سردار ہَن۔

26اِیہو مُوسیٰ تے ہارُون ہِن جِنہاں کُوں رب العالمین حُکم ڈِتا جو بنی اِسرائیل کُوں اُنہاں دے خانداناں دی ترتیب دے مطابق مِصر ءچوں کڈھو۔ 27ایہ اُوہو بندے ہِن جِنہاں مِصر دے بادشاہ فرعون نال بنی اِسرائیل کُوں مِصر ءچوں گِھن ونجنڑ دے بارے ءچ گالھ کیتی ہئی۔

رب ولا مُوسیٰ کُوں حُکم ڈیندے

28مِصر ءچ رب العالمین مُوسیٰ نال الوایا تے ایہ آکھیا، 29”مَیں رب العالمین ہاں! مِصر دے بادشاہ فرعون کُوں او سبھ کُجھ ڈسا جیہڑا مَیں تیکُوں ڈسیندا ہاں۔“

30پر مُوسیٰ آکھیا، ”مَیں تاں اَڑ اَڑ تے بُلیندا ہاں، فرعون کِینویں میڈی گالھ سُنڑسی؟“