خرُوج 4

1مُوسیٰ جواب ڈِتا، ”پر بنی اِسرائیل نہ میڈی گالھ دا یقین کریسن تے نہ میڈی سُنڑسن۔ او تاں اکھیسن جو رب العالمین تیڈے اُتے ظاہر نئیں تھیّا۔“

2رب العالمین مُوسیٰ کُوں آکھیا، ”تیڈے ہتھ ءچ کیا ہے؟“

مُوسیٰ جواب ڈِتا ”سوٹی۔“

3رب العالمین آکھیا، ”اِینکُوں زمین اُتے سَٹ ڈے۔“ مُوسیٰ زمین اُتے سوٹی سٹی تاں او نانگ بنڑ گئی تے مُوسیٰ ڈر تے بھج پِیا۔

4رب العالمین آکھیا، ”ہُنڑ نانگ دی پُچھڑ کُوں ہتھ نال پکڑ گِھن۔“ مُوسیٰ ہتھ ودھا تے نانگ کُوں پکڑ گِھدا تاں او وَلا سوٹی بنڑ گِیا۔

5رب العالمین آکھیا، ”ایہ ڈیکھ تے لوکاں کُوں یقین آسی جو یہوواہ جیہڑا اُنہاں دے پِیُو ڈاڈے دا خُدا یعنی ابرہام دا خُدا، اِضحاق دا خُدا تے یعقُوب دا خُدا ہے، تیڈے اُتے ظاہر تھئے۔“

6وَل رب العالمین آکھیا، ”ہُنڑ آپنڑا ہتھ چولے ءچ پا تے آپنڑے سینے اُتے رکھ گِھن۔“ مُوسیٰ آپنڑا ہتھ سینے اُتے رکھ گِھدا تے جِیں ویلے اُونکُوں کڈھیا تاں او کوڑھ نال برف آلی کار چِٹا تھی گِیا۔

7رب العالمین آکھیا جو ”ہُنڑ آپنڑا ہتھ وَلا آپنڑے چولے ءچ پا ڈے۔“ مُوسیٰ اِینویں ای کیتا۔ جِیں ویلے اُوں آپنڑا ہتھ ولا کڈھیا تاں او باقی جِسم آلی کار ٹھیک تھی گِیا۔

8رب العالمین آکھیا، ”جیکر لوکاں کُوں پہلا معجزہ ڈیکھ تے یقین نہ آوے تے او تیڈی نہ سُنڑݨ تاں وَل او ڈُوجھا معجزہ ڈیکھ تے یقین کریسن۔ 9جیکر او اِنہاں ڈوہائیں معجزیاں دا وی یقین نہ کرݨ تے تیڈی نہ سُنڑݨ تاں نیل دریا تُوں کُجھ پانڑی گِھن تے اُونکُوں سُکی جاہ تے وِیٹ ڈیویں۔ ایہ پانڑی زمین اُتے ڈھاندے ای رَت بنڑ ویسی۔“

10وَل مُوسیٰ رب العالمین کُوں آکھیا، ”اے مالک! مَیں ٹھیک طریقے نال بول نئیں سگدا۔ نہ تاں پہلے ہم تے نہ اُوں ویلے کنُوں جڈاں تُوں آپنڑے بندے نال کلام کیتا، بلکہ رُک رُک تے بُلیندا ہاں تے میڈی زبان کُند ہے۔“

11رب العالمین آکھیا، ”اِنسان دا مُنہ کئیں بنڑائے؟ کوݨ اِنسان کُوں گُنگا، ڈورا، سُجاکھا یا اندھا بنڑیندے؟ کیا مَیں جیہڑا رب العالمین ہاں ایہ سبھ کُجھ نئیں کریندا؟

12بس ہُنڑ وَنج، تے مَیں تیڈے بولنڑ ءچ تیڈی مدد کریساں تے تیکُوں سکھیندا راہساں جو تُوں کیا آکھنڑیں۔“

13پر مُوسیٰ آکھیا، ”اے مالک! مَیں تیڈی مِنت کریندا ہاں جو کہیں بئے کُوں بھیج ڈے۔“

14وَل رب العالمین مُوسیٰ نال ڈاڈھا کوڑیجیا تے آکھیا، ”کیا ہارُون لاوی تیڈا بِھرا نئیں؟ مَیں جانڑدا ہاں جو او چنگا بول سگدے تے او تیکُوں مِلنڑ کیتے آندا پئے تے تیکُوں ڈیکھ تے او دِلوں خوش تھیسی۔ 15تُوں اُوندے نال گالھ کر تے او سبھ کُجھ ڈسا جیہڑا اُونکُوں آکھنڑیں۔ مَیں تیڈی تے اُوندی زبان دا ذمہ گِھندا ہاں تے تُہاکُوں سکھیندا راہساں جو تُساں کیا کیا کرنڑیں۔ 16ہارُون تیڈی جاہ تے لوکاں نال الویسی تے او تیڈا مُنہ بنڑسی تے تُوں اُوندے کیتے خُدا آلی کار ہوسیں1۔ 17تے تُوں ایہ سوٹی وی نال گِھن ونجیں کیوں جو اِیندے نال تُوں ایہ معجزے کریسیں۔“

مُوسیٰ دی مِصر ءچ واپسی

18وَل مُوسیٰ آپنڑے سوہرے یِترو دے کولھ واپس گِیا تے اُونکُوں آکھیا جو ”میکُوں ذرا اِجازت ڈے جو مِصر ءچ آپنڑے بِھرانواں کولھ وَنجاں تے ڈیکھاں جو او ہُنڑ تئیں زندہ ہِن یا نئیں۔“

یِترو مُوسیٰ کُوں آکھیا ”ٹھیک ہے خیر نال وَنج۔“

19مُوسیٰ اجنڑ مِدیان ءچ ای ہا جو رب العالمین اُونکُوں آکھیا، ”مِصر دو واپس لگا وَنج کیوں جو جیہڑے بندے تیکُوں قتل کرݨ چاہندے ہَن، او مر گئے ہِن۔“ 20وَل مُوسیٰ آپنڑی ذال تے پوتراں کُوں کھوتے اُتے بِلھا تے مِصر دو ٹُر پِیا، تے مُوسیٰ خُدا دی سوٹی آپنڑے ہتھ ءچ گِھن گِھدی۔

21رب العالمین مُوسیٰ کُوں ایہ وی آکھیا، ”مِصر وَنج تے فرعون دے سامنڑے او معجزے ڈِکھا جِنہاں دا مَیں تیکُوں اِختیار ڈِتے۔ پر مَیں اُوندا دل سخت کریساں تے او بنی اِسرائیل کُوں ونجنڑ دی اِجازت نہ ڈیسی۔ 22اُوں ویلے تُوں فرعون کُوں آکھیں، ’رب العالمین فرمیندے جو اِسرائیل میڈا پوتر بلکہ میڈا پلوٹھا ہے۔ 23مَیں تیکُوں ڈسا ڈِتے جو میڈے پوتر کُوں ونجنڑ ڈے تاں جو او میڈی عبادت کرے تے تُوں ہُنڑ تئیں اُونکُوں ونجنڑ ڈیوݨ تُوں اِنکار کیتے۔ اِیں واسطے ہُنڑ مَیں تیڈے پوتر بلکہ تیڈے پلوٹھے کُوں جانُوں مار ڈیساں‘۔“

24رستے ءچ رُکنڑ دی جاہ تے رب العالمین مُوسیٰ کُوں مِلیا تے چاہیا جو اُونکُوں مار ڈیوے۔ 25پر صفورہ ہِک پتھر دی چُھری نال آپنڑے پوتر دا ختنہ کیتا تے اُوں چمڑی کُوں مُوسیٰ دے پیراں تے سَٹ تے آکھیا، ”تُوں میڈے کیتے خونی گھوٹ ہیں۔“ 26وَل خُدا مُوسیٰ دی جان بخش ڈِتی۔ اُوں ویلے صفورہ ختنے پارُوں اُونکُوں خونی گھوٹ آکھیا ہا۔

27رب العالمین ہارُون کُوں آکھیا، ”بیابان ءچ مُوسیٰ کُوں مِلنڑ وَنج۔“ ہارُون ٹُر پِیا تے خُدا دے پہاڑ دے کولھ مُوسیٰ کُوں مِل تے اُونکُوں چُمیا۔ 28مُوسیٰ ہارُون کُوں سبھ کُجھ ڈسایا جیہڑا رب العالمین اُونکُوں آکھنڑ کیتے بھیجیا ہا۔ اُوں اُونکُوں اُنہاں معجزیاں دے بارے ءچ وی ڈسایا جِنہاں دے کرݨ دا حُکم رب اُونکُوں ڈِتا ہا۔

29وَل مُوسیٰ تے ہارُون وَنج تے اِسرائیل دے سارے بزُرگاں کُوں کٹھا کیتا۔ 30ہارُون اُنہاں کُوں او سبھ گالھیں ڈسایاں جیہڑیاں رب العالمین مُوسیٰ کُوں ڈسایاں ہَن، تے لوکاں دے سامنڑے او معجزے وی کیتے جیہڑے خُدا مُوسیٰ کُوں کرݨ کیتے آکھے ہَن۔ 31وَل لوکاں کُوں یقین آیا تے جِیں ویلے اُنہاں سُنڑیا جو رب العالمین کُوں آپنڑے لوکاں دا خیال ہے تے اُوں اُنہاں دی مُصیبت کُوں ڈِٹھے تاں اُنہاں رب العالمین کُوں سجدہ کیتا۔