خرُوج 20

ڈاہ حُکم

1تے خُدا ایہ سبھ گالھیں آکھیاں:

2”مَیں رب العالمین تیڈا خُدا ہاں، جیہڑا تیکُوں1 مِصر دی غُلامی ءچوں کڈھ آیا ہاں۔

3تُوں میڈے علاوہ کہیں بئے معبُود دی عبادت نہ کریں۔

4آپنڑے کیتے بُت نہ بنڑاویں۔ کہیں وی شے دی مُورت نہ بنڑاویں، بھانویں او اسمان اُتے یا تلے زمین اُتے یا سمندر ءچ ہووے۔ 5نہ بُتاں کُوں سجدہ کریں تے نہ اُنہاں دی عبادت کریں، کیوں جو مَیں رب العالمین تیڈا خُدا غیور خُدا ہاں۔ جیہڑے میڈے نال نفرت کریندے ہِن، اُنہاں کُوں مَیں تریجھی تے چوتھی پُشت تئیں سزا ڈیندا ہاں۔ 6پر جیہڑے میڈے نال محبت رکھیندے تے میڈے حُکم منیندے ہِن، اُنہاں اُتے مَیں ہزار پُشتاں تئیں مہربان راہندا ہاں۔

7تُوں آپنڑے خُدا رب العالمین دا ناں غلط مقصد کیتے اِستعمال نہ کریں۔ جیہڑا وی اِینویں کریندے، میں رب العالمین اُونکُوں سزا ڈِتے بغیر نہ چُھڑیساں۔

8تُوں سبت دے ڈینہہ کُوں یاد رکھیں تے اُونکُوں مُقدّس منیں۔ 9ہفتے دے پہلے چِھی ڈینہہ تُوں محنت کر تے آپنڑا سارا کم کریں۔ 10پر ستواں ڈینہہ رب العالمین تیڈے خُدا دے سبت دا ڈینہہ ہے۔ اُوں ڈینہوار اصلُوں کم نہ کریں، نہ تُوں نہ تیڈے پوتر، نہ دِھی، نہ نوکر، نہ نوکرانڑی، نہ ڈنگر تے نہ او پردیسی جیہڑا تیڈے نال راہندا ہووے۔ 11کیوں جو میں رب العالمین چِھی ڈینہاں ءچ زمین، اسمان، سمندر تے جیہڑا کُجھ اُنہاں ءچ ہے بنڑایا تے ستویں ڈینہہ ارام کیتا۔ اِیں کیتے میں رب العالمین سبت دے ڈینہہ کُوں برکت ڈے تے اُونکُوں مخصوص تے مُقدّس کیتا۔

12تُوں آپنڑے ماء پِیُو دی عزت کریں، تاں جو اُوں مُلک ءچ تیڈی حیاتی وڈی ہووے جیہڑا میں رب العالمین تیڈا خُدا تیکُوں ڈیوݨ آلا ہاں۔

13تُوں قتل نہ کریں۔

14تُوں زِنا نہ کریں۔

15تُوں چوری نہ کریں۔

16تُوں آپنڑے ہمسائے دے بارے ءچ کُوڑی گواہی نہ ڈیویں۔

17تُوں آپنڑے ہمسائے دے گھر دا لالچ نہ کریں۔ اُوندی ذال، نوکر، نوکرانڑی، ڈاند تے کھوتے بلکہ اُوندی کہیں وی شے دا لالچ نہ کریں۔“

لوک گھبرا ویندے ہِن

18جڈاں سارے لوکاں بدلاں دی گجکار تے نرسِنگے دی اواز سُنڑی تے بجلی دی چمک تے پہاڑ تُوں اُٹھدے دُھوئیں کُوں ڈِٹھا تاں او ڈر نال کمبنڑ لگے تے پہاڑ تُوں دُور کھڑ گئے۔ 19اُنہاں مُوسیٰ کُوں آکھیا، ”تُساں ای ساڈے نال گالھ کیتا کرو تے اساں سُنڑسوں، پر خُدا ساڈے نال گالھ نہ کرے، نہ تاں اساں مر ویسوں۔“

20پر مُوسیٰ اُنہاں کُوں آکھیا، ”ڈرو نہ، کیوں جو خُدا تُہاکُوں ازماوݨ کیتے آئے، تاں جو اُوندا ڈر تُہاڈے اکھیں دے سامنڑے راہوے تے تُساں گُناہ نہ کرو۔“ 21لوک دُور ای ریہے، جڈاں جو مُوسیٰ اُوں گھاٹے اندھارے دے کولھ گِیا جِتھاں خُدا ہا۔

22وَل اُوں ویلے رب العالمین مُوسیٰ کُوں آکھیا، ”بنی اِسرائیل کُوں ڈسا جو تُساں آپ ڈِٹھے جو مَیں اسمان تُوں تُہاڈے نال گالھیں کیتیاں ہِن۔ 23تُساں صرف میڈی عبادت کرائے تے آپنڑے کیتے سونے یا چاندی دے بُت نہ بنڑائے۔ 24میڈے کیتے مِٹی دی قُربان گاہ بنڑائے تے اُوندے اُتے آپنڑیاں بھیڈ بکریاں تے ڈاند، گائیں دیاں ساڑے ونجنڑ آلیاں قُربانیاں تے سلامتی دیاں قُربانیاں پیش کرائے۔ مَیں جِتھاں وی آپنڑے ناں دی تعظیم ءچ قُربانیاں پیش کرویساں، اُتھاں مَیں تُہاڈے کولھ آ تے تُہاکُوں برکت ڈیساں۔

25جے تُساں میڈے کیتے پتھر دی قُربان گاہ بنڑاؤ تاں گھڑے ہوئے پتھر اِستعمال نہ کرائے کیوں جو جے تُساں اوزار اِستعمال کریسو تاں اُونکُوں ناپاک کریسو۔ 26قُربان گاہ اُتے پوڑیاں تُوں نہ چڑھائے، اِینویں نہ تھیوے جو چڑھدے ویلے تُہاڈا ننگ نظر آوے۔“