خرُوج 18

یِترو نال مُلاقات

1جِیں ویلے یِترو جیہڑا مُوسیٰ دا سوہرا تے مِدیان دا کاہِن ہا، او سبھ کُجھ سُنڑیا جیہڑا خُدا مُوسیٰ تے اُوندی قوم بنی اِسرائیل کیتے کیتا ہا جو او اُنہاں کُوں مِصر ءچوں کڈھ آئے، 2تاں او مُوسیٰ دی ذال صفورہ کُوں آپنڑے نال گِھن آیا کیوں جو مُوسیٰ اُونکُوں آپنڑے پوتراں سمیت پیکے بھیج ڈِتا ہا۔ 3یِترو مُوسیٰ دے ڈوہائیں پوتراں کُوں وی نال گِھن آیا۔ پہلے پوتر دا ناں موسیٰ جیرسوم1 رکھیا ہا کیوں جو جِیں ویلے او جمیا تاں اُوں آکھیا ہا، ”مَیں غیر مُلک ءچ پردیسی ہاں۔“ 4ڈُوجھے پوتر دا ناں الِیعزر2 رکھیا ہا کیوں جو مُوسیٰ آکھیا ہا، ”میڈے پِیُو دے خُدا میڈی مدد کر تے میکُوں فرعون دی تلوار تُوں بچائے۔“

5یِترو مُوسیٰ دی ذال تے پوتراں کُوں نال گِھن تے اُوں ویلے مُوسیٰ دے کولھ پُجیا جِیں ویلے اُوں بیابان ءچ خُدا دے پہاڑ3 دے کولھ تمبُو لایا ہویا ہا۔ 6اُوں مُوسیٰ کُوں سنیہا بھیجیا جو، ”مَیں تیڈا سوہرا یِترو تیڈی ذال تے تیڈے ڈوہائیں پوتراں کُوں نال گِھن تے تیڈے کولھ آندا پِیا ہاں۔“

7مُوسیٰ آپنڑے سوہرے کُوں مِلنڑ کیتے باہر نِکلیا تے اُوندے سامنڑے جُھکیا تے اُونکُوں چُمیا۔ اُنہاں ہِک ڈُوجھے دی خیریت پُچھی تے وَل تمبُو ءچ آئے۔ 8مُوسیٰ یِترو کُوں ڈسایا جو رب العالمین بنی اِسرائیل دی خاطر فرعون تے مِصریاں نال کیا کُجھ کیتے۔ اُوں اُنہاں مُشکلاں دا وی ذِکر کیتا جیہڑیاں رستے ءچ اُنہاں اُتے آئیاں ہَن تے ایہ وی جو رب العالمین کِیں طرحاں اُنہاں کُوں بچایا۔

9یِترو اُنہاں سارے چنگے کماں دے بارے ءچ سُنڑ تے خوش تھیّا جیہڑے رب العالمین بنی اِسرائیل واسطے کیتے ہَن جڈاں اُوں اُنہاں کُوں مِصریاں دے ہتُھوں بچایا ہا۔ 10اُوں آکھیا ”رب العالمین دی تعریف تھیوے جئیں تُہاکُوں مِصریاں تے فرعون دے قبضے تُوں نجات بخشی تے جئیں آپنڑی قوم کُوں مِصریاں تُوں چُھڑایا۔ 11ہُنڑ مَیں جاݨ گِھدے جو رب العالمین سارے معبُوداں تُوں وڈا ہے کیوں جو اُوں ایہ سبھ کُجھ اُنہاں لوکاں نال کیتے جِنہاں آپنڑے غرور ءچ بنی اِسرائیل نال بُرا سلوک کیتا ہا۔“ 12وَل مُوسیٰ دا سوہرا یِترو خُدا دے ناں کیتے ساڑے ونجنڑ آلی قُربانی تے بئے قُربانیاں گِھن آیا تے ہارُون تے بنی اِسرائیل دے سارے بزُرگ مُوسیٰ دے سوہرے نال خُدا دے حضُور کھانڑا کھاوݨ آئے۔

مُوسیٰ قاضیاں کُوں مقرر کریندے

13ولدی ڈینہوار مُوسیٰ لوکاں دا اِنصاف کرݨ کیتے بیٹھا تے لوک سویل تُوں گِھن تے شام تئیں مُوسیٰ دے سامنڑے کھڑے ریہے۔ 14جِیں ویلے مُوسیٰ دے سوہرے یِترو ایہ سبھ کُجھ ڈِٹھا تاں اُوں پُچھیا، ”ایہ کیا ہے جیہڑا تُوں لوکاں نال کریندا پئیں؟ تُوں کیوں کلھا باہندیں تے لوک تیڈے کولھ سویل تُوں شام تئیں کھڑے راہندن؟“

15مُوسیٰ جواب ڈِتا، ”لوک میڈے کولھ آ تے خُدا دی مرضی پُچھدن۔ 16جِیں ویلے اُنہاں ءچ کوئی جھیڑا تھیندے تاں او میڈے کولھ آندے ہِن تے مَیں فیصلہ کریندا ہاں تے اُنہاں کُوں خُدا دے حُکم تے فرمان ڈسیندا ہاں۔“

17مُوسیٰ دے سوہرے اُونکُوں آکھیا، ”تیڈا اِیں طریقے نال کم کرݨ ٹھیک نئیں۔ 18اِیندے نال تُوں تے تیڈے کولھ آوݨ آلے لوک بُرے طریقے نال تھک ویندے ہِن۔ کم ایڈا وڈا ہے جو تُوں کلھا اِینکُوں نئیں سنبھال سگدا۔ 19میڈی گالھ سُنڑ! مَیں تیکُوں ہِک مشورہ ڈیندا ہاں تے خُدا اُوندے ءچ تیڈی مدد کرے۔ تُوں خُدا دے سامنڑے قوم دا نمائندہ ہوندے ہوئے اُنہاں دے جھیڑے خُدا دے حضُور پیش کیتا کر۔ 20ایہ وی ضروری ہے جو تُوں اُنہاں کُوں خُدا دے حُکم تے ہدایات سِکھا جو او کِینویں زندگی گُزارݨ تے کیا کیا کرݨ۔ 21تے اِیندے نال قوم ءچوں قابل بندے چُنڑ گِھن، او اِیہو جِیہے لوک ہووݨ جِنہاں دے دل ءچ خُدا دا خوف ہووے۔ او سچے ہووݨ تے رشوت تُوں نفرت کریندے ہووݨ۔ اُنہاں کُوں ہزار ہزار، سو سو، پنجھاہ پنجھاہ تے ڈاہ ڈاہ بندیاں اُتے سردار مقرر کر۔ 22اُنہاں بندیاں دی ذمہ داری ایہ ہوسی جو او ہر ویلے اِنصاف کرݨ۔ جیکر کوئی بہُوں ای اوکھا معاملہ ہووے تاں او فیصلے کیتے تیڈے کولھ آوݨ، پر بئے معاملات آپ نبیڑن۔ اِینویں او اِیں کم ءچ تیڈا ہتھ ونڈیسن تے تیڈا بھار ہولا تھی ویسی۔ 23جے تُوں میڈے اِیں مشورے کُوں منیں تے خُدا دی وی اِیہو مرضی ہووے تاں تُوں آپنڑی ذمہ داری نبھا سگسیں تے ایہ یکے لوک اِطمینان نال آپنڑے گھراں کُوں ویسن۔“

24مُوسیٰ آپنڑے سوہرے دا مشورہ مَن تے اِینویں ای کیتا۔ 25اُوں بنی اِسرائیل ءچوں قابل بندے چُنڑ تے اُنہاں کُوں ہزار ہزار، سو سو، پنجھاہ پنجھاہ تے ڈاہ ڈاہ بندیاں اُتے سردار مقرر کر ڈِتا۔ 26تے او ہر ویلے لوکاں دا اِنصاف کرݨ لگے۔ او سوکھے مسئلے خود نبیڑ ڈیندے تے اوکھے معاملے مُوسیٰ کولھ گِھن آندے ہَن۔

27کُجھ عرصے بعد مُوسیٰ آپنڑے سوہرے کُوں رُخصت کیتا تے او آپنڑے وطن چلیا گِیا۔