خرُوج 17

چٹان ءچوں پانڑی

1وَل اِسرائیل دی پُوری جماعت صِین دے بیابان ءچوں نِکلی تے رب العالمین جِینویں حُکم ڈیندا ریہا، او ہِک جاہ تُوں بئی جاہ سفر کریندے ریہے۔ رفیدیم ءچ اُنہاں ڈیرے لائے پر اُتھاں اُنہاں کُوں پِیوݨ کیتے پانڑی نہ مِلیا۔ 2اِیں کیتے او مُوسیٰ نال ایہ آکھ تے جھیڑا کرݨ لگے جو، ”ساکُوں پِیوݨ کیتے پانڑی ڈے۔“

مُوسیٰ جواب ڈِتا، ”تُساں میڈے نال کیوں جھیڑا کریندے ہیوے؟ تے رب العالمین کُوں کیوں ازمیندے ہیوے؟“

3پر لوک بہُوں ترِسّے ہَن۔ او مُوسیٰ دے خلاف بُڑبُڑ کرݨ تُوں باز نہ آئے تے آکھنڑ لگے، ”تُوں ساکُوں مِصر ءچوں کیوں کڈھ آئیں۔ کیا اِیں کیتے جو اساں آپنڑے بالاں تے اِجڑاں سمیت ترِسّے مر ونجُوں؟“

4وَل مُوسیٰ رب العالمین دے حضُور فریاد کیتی جو، ”مَیں اِنہاں لوکاں نال کیا کراں؟ جے حالات تھوڑے جِیہے وی بئے خراب تھئے تاں ایہ میکُوں سنگسار کر ڈیسن۔“

5رب العالمین مُوسیٰ کُوں آکھیا، ”اِسرائیل دے کُجھ بزُرگ نال گِھن تے لوکاں دے اگُوں اگُوں ٹُر۔ او سوٹی وی نال گِھن وَنج جیندے نال تَیں نیل دریا کُوں ماریا ہا۔ 6مَیں تیڈے سامنڑے حورِب1 دی چٹان اُتے کھڑا راہساں۔ تُوں سوٹی چٹان اُتے ماریں تاں اُوندے ءچوں پانڑی نِکلسی تے لوک پانڑی پی گِھنسن۔“ تے مُوسیٰ بنی اِسرائیل دے بزُرگاں دے سامنڑے اِینویں ای کیتا۔

7مُوسیٰ اُوں جاہ دا ناں مسّہ تے مریبہ2 رکھیا کیوں جو بنی اِسرائیل اُتھاں جھیڑا کیتا تے ایہ آکھ تے رب العالمین کُوں ازمایا جو ”او ساڈے وچال ہے یا نئیں؟“

عمالیقی قوم دی شکست

8جِیں ویلے بنی اِسرائیل رفیدیم دی جاہ تے ہَن تاں عمالیقی قوم اُنہاں نال لڑن آئی۔ 9مُوسیٰ یشُوع کُوں آکھیا، ”کُجھ جواناں کُوں چُنڑ تے نِکل، تے عمالیقیاں نال لڑ۔ سویلے مَیں خُدا دی سوٹی آپنڑے ہتھ ءچ پکڑ تے پہاڑ دی چوٹی اُتے چڑھ کھڑا راہساں۔“

10یشُوع مُوسیٰ دی ہدایات دے مطابق عمالیقیاں نال لڑن گِیا تے مُوسیٰ، ہارُون تے حور، پہاڑ دی چوٹی اُتے چڑھ گئے۔ 11جِیں ویلے تئیں مُوسیٰ دے ہتھ اُتاں راہندے ہَن، بنی اِسرائیل جِتدے راہندے ہَن تے جڈاں اُوندے ہتھ تلے تھیندے ہَن تاں عمالیقی جِتدے ہَن۔ 12کُجھ دیر بعد مُوسیٰ دیاں بانہیں تھک گئیاں۔ اِیں کیتے ہارُون تے حور ہِک پتھر گِھن آئے تاں جو مُوسیٰ اُوندے اُتے بہہ ونجے۔ وَل اُنہاں مُوسیٰ دے سجے کھبے کھڑ تے اُوندیاں بانہیں اُتے چاتی رکھیاں تے اِینویں مُوسیٰ دے ہتھ سِجھ لہوݨ تئیں اُتاں ریہے۔ 13اِیں طریقے نال یشُوع عمالیقی قوم دے لشکر کُوں تلوار نال شکست ڈِتی۔

14وَل رب العالمین مُوسیٰ کُوں آکھیا، ”ایہ واقعہ یادگاری کیتے کتاب ءچ لِکھ گِھن تے یشُوع کُوں ڈسا ڈے جو مَیں یقیناً عمالیق دا ناں نشان دُنیا تُوں مِٹا ڈیساں۔“ 15تے مُوسیٰ ہِک قُربان گاہ بنڑائی تے اُوندا ناں ”رب العالمین میڈا جھنڈا ہے“ رکھیا3۔ 16اُوں آکھیا، ”رب العالمین دے تخت دے خلاف ہتھ چاتا گئے، اِیں کیتے عمالیقیاں نال نسل در نسل اُوندی جنگ راہسی۔“