خرُوج 16

مَن تے بٹیرے

1اِیندے بعد بنی اِسرائیل دی پُوری جماعت ایلیم تُوں نِکل تے صِین دے بیابان ءچ پُجی جیہڑا ایلیم تے سِینا دے وچال ہے۔ او مِصر ءچوں نِکلنڑ تُوں بعد ڈُوجھے مہینے دے پندھرویں ڈینہہ پُجے۔ 2بیابان ءچ پُوری جماعت مُوسیٰ تے ہارُون دے خلاف بُڑبُڑاوݨ لگی۔ 3اُنہاں آکھیا، ”کاش رب العالمین ساکُوں مِصر ءچ ای مار سٹیندا۔ اُتھاں اساں گھٹ و گھٹ رَج تے گوشت تے روٹی تاں کھا سگدے ہسے۔ تُساں صرف اِیں کیتے ساکُوں بیابان ءچ گِھن آئے ہیوے جو اساں بُکھے مر ونجُوں۔“

4وَل رب العالمین مُوسیٰ کُوں آکھیا، ”مَیں اسمان تُوں تُہاڈے کیتے مینہ آلی کار روٹیاں وسیساں۔ ہر روز لوک باہر وَنج تے اُوں ڈینہہ دی لوڑ دے مطابق روٹی کٹھی کرݨ۔ اِیندے نال مَیں اُنہاں کُوں ازما تے ڈیکھساں جو او میڈی سُنڑدے ہِن یا نئیں۔ 5تے چِھینویں ڈینہہ جِتنا او ہر روز جمع کریندے ہِن، اُوندے تُوں ڈُونڑا جمع کر تے پکاوݨ۔“

6وَل مُوسیٰ تے ہارُون بنی اِسرائیل کُوں آکھیا، ”اَج شام کُوں تُہاکُوں پتہ لگ ویسی جو تُہاکُوں مِصر ءچوں رب العالمین ای کڈھ آیا ہا۔ 7تے سویلے تُساں رب العالمین دا جلال ڈیکھسو۔ اُوں تُہاڈی بُڑبُڑ سُنڑ گِھدی ہے۔ اساں کوݨ ہیں؟ اصل ءچ تُساں ساڈے نئیں بلکہ رب العالمین دے خلاف بُڑبُڑ کریندے پئے ہیوے۔ 8وَل وی رب العالمین تُہاکُوں شام کُوں گوشت تے سویلے وافر روٹی ڈیسی کیوں جو اُوں تُہاڈی بُڑبُڑ سُنڑ گِھدی ہے۔ اساں کوݨ ہیں؟ تُہاڈی بُڑبُڑ ساڈے خلاف نئیں بلکہ رب العالمین دے خلاف ہے۔“

9وَل مُوسیٰ ہارُون کُوں آکھیا، ”بنی اِسرائیل دی ساری جماعت کُوں ڈسا جو او رب العالمین دے سامنڑے حاضر تھی ونجنڑ، کیوں جو اُوں تُہاڈی بُڑبُڑ سُنڑ گِھدی ہے۔“ 10جِیں ویلے ہارُون بنی اِسرائیل دی پُوری جماعت دے سامنڑے گالھ کریندا پِیا ہا تاں لوکاں مُڑ تے بیابان دو ڈِٹھا تے اُتھاں رب العالمین دا جلال بدّل ءچ ظاہر تھیّا۔

11رب العالمین مُوسیٰ کُوں آکھیا، 12”مَیں بنی اِسرائیل دی بُڑبُڑ سُنڑ گِھدی ہے۔ اُنہاں کُوں ڈسا جو جِیں ویلے سِجھ لہوݨ لگسی تاں تُساں گوشت کھاسو تے سویلے رَج تے روٹی۔ وَل تُہاکُوں پتہ لگ ویسی جو مَیں رب العالمین ای تُہاڈا خُدا ہاں۔“

13اُوں شام اِتی بٹیرے آئے جو اُنہاں دے ڈیرے ڈھک ڈِتے تے ولدی سویل تمبُواں دے چودھارُوں تریل پئی ہوئی ہئی۔ 14جِیں ویلے تریل سُک گئی تاں بیابان ءچ چھوٹی چھوٹی تے گول گول چیز جیہڑی کورے آلی کار ہئی، زمین اُتے پئی ہئی۔ 15جِیں ویلے بنی اِسرائیل اُونکُوں ڈِٹھا تاں ہِک بئے تُوں پُچھنڑ لگے، ”مَن؟“ یعنی ”ایہ کیا ہے؟“ کیوں جو اُنہاں کُوں پتہ نہ ہا جو ایہ کیا ہے۔

مُوسیٰ اُنہاں کُوں ڈسایا، ”ایہ او روٹی ہے جیہڑی رب العالمین تُہاکُوں کھاوݨ کیتے ڈِتی ہے۔ 16رب العالمین دا حُکم ہے جو ہر ہِک اِتی جمع کرے جِتّی اُوندے خاندان کُوں لوڑ ہووے۔ ہر بندہ آپنڑے تمبُو دے بندیاں دے حساب دے مطابق ڈیڈھ کلو1 جمع کرے۔“

17بنی اِسرائیل اِینویں ای کیتا، کُجھ گھٹ تے کُجھ ودھ کٹھا کیتا۔ 18پر جِیں ویلے اُونکُوں ناپیا گِیا تاں ہر ہِک بندے کیتے کافی ہا۔ جئیں زیادہ کٹھا کیتا ہا اُوندے کولھ زیادہ نہ بچیا تے جئیں گھٹ کٹھا کیتا ہا اُوندے کولھ وی پُورا تھی گِیا۔ 19مُوسیٰ حُکم ڈِتا، ”اگلی ڈینہوار کیتے کھانڑا نہ بچائے۔“

20پر کُجھ لوکاں مُوسیٰ دی گالھ نہ منّی بلکہ کُجھ سویل تئیں بچا گِھدا۔ پر بچّے ہوئے کھانڑے ءچ کیڑے پے گئے ہَن تے اُوندے ءچوں ہواڑ آندی پئی ہئی۔ ایہ سُنڑ تے مُوسیٰ اُنہاں نال کوڑیج پِیا۔

21ہر سویل ہر کوئی اِتنا مَن کٹھا کر گِھندا ہا، جِتنی اُوندی لوڑ ہوندی ہئی۔ دُھپ تیز تھیندے ای بچیا ہویا مَن پگھر ویندا ہا۔

22چِھینوِیں ڈینہوار لوک ڈُونڑا کھانڑا کٹھا کریندے ہَن یعنی ہر ہِک کیتے ترے کلو۔ وَل جماعت دے سبھ بزُرگاں مُوسیٰ دے کولھ آ تے اُونکُوں خبر ڈِتی۔ 23مُوسیٰ اُنہاں کُوں آکھیا، ”رب العالمین دا حُکم ہے جو سویلے ارام دا ڈینہہ ہے، مُقدّس سبت دا ڈینہہ جیہڑا رب العالمین کیتے وقف ہے۔ تُساں تنُور ءچ جیہڑا کُجھ پکاونڑاں چاہندے ہیوے اَج پکا گِھنو، تے جیہڑا کُجھ کاڑھنا چاہندے ہیوے کاڑھ گِھنو۔ جیہڑا بچ ونجے اُونکُوں سویل کیتے محفوظ کر گِھنائے۔“

24لوکاں مُوسیٰ دے حُکم دے مطابق کھانڑا اگلے ڈینہہ کیتے محفوظ کر گِھدا تے اِیندے ءچوں نہ ہواڑ آئی تے نہ اِیندے ءچ کیڑے پئے۔ 25مُوسیٰ آکھیا، ”اَج اِیہو بچیا ہویا کھانڑا کھاؤ، کیوں جو اَج رب العالمین کیتے سبت دا ڈینہہ ہے۔ اَج تُہاکُوں بیابان ءچ کُجھ نہ مِلسی۔ 26چِھی ڈینہوار تئیں ایہ کھانڑا کٹھا کرائے پر ستواں ڈینہہ سبت2 ہے۔ اُوں ڈینہوار زمین تے کُجھ نہ مِلسی۔“

27وَل وی ستویں ڈینہہ کُجھ لوک مَن کٹھا کرݨ گئے، پر اُنہاں کُوں کُجھ نہ مِلیا۔ 28اُوں ویلے رب العالمین مُوسیٰ کُوں آکھیا، ”تُساں لوک کڈݨ تئیں میڈے حُکماں تے میڈی ہدایت اُتے عمل کرݨ تُوں اِنکار کریندے راہسو؟ 29ڈیکھو، رب العالمین سبت کُوں تُہاڈے کیتے ارام دا ڈینہہ مقرر کیتے۔ اِیں واسطے او چِھینوِیں ڈینہوار تُہاکُوں ڈُو ڈینہہ دا کھانڑا ڈیندے۔ ستویں ڈینہہ3 سارے آپنڑے تمبُواں ءچ راہوݨ تے کوئی وی گھرُوں باہر نہ ونجے۔“ 30اِیں کیتے لوکاں سبت آلی ڈینہوار ارام کیتا۔

31بنی اِسرائیل اِیں خوراک دا ناں ”مَن“ رکھیا۔ اُوندے دانڑے دھانڑیئے آلی کار تے چِٹے رنگ دے ہَن تے اُوندا ذائقہ ماکھی نال بنڑی ہوئی پتلی روٹی آلی کار ہا۔

32مُوسیٰ آکھیا، ”رب العالمین فرمیندے، ’ڈیڈھ کلو دے تھاں ءچ مَن بھر تے اُونکُوں آوݨ آلیاں نسلاں کیتے محفوظ کر رکھائے۔ وَل او ڈیکھ سگسن جو جڈاں مَیں تُہاکُوں مِصر ءچوں کڈھ آیا ہم تاں بیابان ءچ تُہاکُوں کیجھا کھانڑاں کھویندا رہ گیاں‘۔“ 33تے مُوسیٰ ہارُون کُوں آکھیا، ”ہِک مرتبان گِھن تے اُونکُوں ڈیڈھ کلو مَن نال بھر تے رب العالمین دے سامنڑے رکھ، تاں جو او آوݨ آلیاں نسلاں کیتے محفوظ راہوے۔“ 34تے جِینویں رب العالمین مُوسیٰ کُوں حُکم ڈِتا ہا، ہارُون اُونویں ای کیتا۔ اُوں مَن دے اُوں مرتبان کُوں عہد دے صندوق دے سامنڑے رکھیا تاں جو او محفوظ راہوے۔ 35بنی اِسرائیل کُوں چالیہہ سال تئیں مَن مِلدا ریہا۔ او اُوں ویلے تئیں مَن کھاندے ریہے جِیں ویلے تئیں بیابان ءچوں نِکل تے کنعان دی سرحد تئیں نہ پُج گئے۔ 36(مَن کُوں ناپنڑ دا تھاں اِیفہ4 دے ڈاہواں حصے دے برابر ہا یعنی ایہ تھاں ڈیڈھ کلو دا ہا۔)