خرُوج 14

بنی اِسرائیل سمندر کُوں پار کریندن

1رب العالمین مُوسیٰ کُوں آکھیا، 2”بنی اِسرائیل کُوں آکھ جو او پِچھاں مُڑ تے مِجدال تے سمندر دے وچالے یعنی فی ہخِیروت دے کولھ رُک ونجنڑ، او بعل صفون دے نیڑے سمندر دے کنڈے آپنڑے ڈیرے لاوݨ۔ 3ایہ ڈیکھ تے فرعون اکھیسی جو بنی اِسرائیل راہ بُھل تے اوارہ پِھردے ودے ہِن تے بیابان ءچ پَھس گئے ہِن۔ 4وَل مَیں فرعون دے دل کُوں سخت کریساں تے او بنی اِسرائیل دا پِچھا کریسی۔ پر مَیں فرعون تے اُوندے سارے لشکر اُتے آپنڑا جلال ظاہر کریساں تے مِصری جاݨ گِھنسن جو مَیں ای رب العالمین ہاں۔“ بنی اِسرائیل اِینویں ای کیتا۔

5جِیں ویلے مِصر دے بادشاہ کُوں اِطلاع ڈِتی گئی جو بنی اِسرائیل ہجرت کر گئے ہِن تاں اُوں تے اُوندے درباریاں آپنڑے خیال بدلا تے آکھیا، ”ایہ اساں کیا کیتے؟ اساں اُنہاں کُوں ونجنڑ ڈِتے تے ہُنڑ اساں اِنہاں دی خدمت تُوں محروم تھی گئے ہیں۔“ 6وَل بادشاہ آپنڑا جنگی رَتھ تیار کروایا تے آپنڑی فوج کُوں گِھن تے نِکلیا۔ 7او بہترین قِسم دے چِھی سو رَتھ تے مِصر دے باقی یکے رتھاں کُوں نال گِھن تے نِکلیا۔ 8رب العالمین مِصر دے بادشاہ فرعون دے دل کُوں سخت کر ڈِتا۔ اِیں کیتے جِیں ویلے بنی اِسرائیل وڈے رُعب نال نِکلدے پئے ہَن تاں او اُنہاں دے پِچُھوں لگ گِیا۔ 9بنی اِسرائیل دا پِچھا کریندے کریندے فرعون دے یکے گھوڑے، رَتھ، سوار تے فوجی اُنہاں کولھ پُج گئے۔ بنی اِسرائیل بحر قُلزم دے کنڈے تے بعل صفون دے سامنڑے فی ہخِیروت دے کولھ ڈیرے لائے ہوئے ہَن۔

10جِیں ویلے بنی اِسرائیل فرعون تے مِصری فوج کُوں آپنڑے دو آندے ڈِٹھا تاں او ڈر گئے تے رب العالمین تُوں فریاد کرݨ لگے۔ 11اُنہاں مُوسیٰ کُوں آکھیا، ”کیا مِصر ءچ قبراں دی تھوڑ ہئی جو تُساں ساکُوں بیابان ءچ گِھن آئے ہیوے؟ ساکُوں مِصر ءچوں کڈھ تے تُساں ساڈے نال کیا کیتے؟ 12کیا اساں مِصر ءچ تُہاکُوں درخاست نہ کیتی ہئی جو مہربانی کر تے ساکُوں چھوڑ ڈیؤ، ساکُوں مِصریاں دی خدمت کرݨ ڈیؤ؟ اِتھاں بیابان ءچ آ تے مرݨ تُوں تاں چنگا ہا جو اساں مِصریاں دے غُلام راہندے۔“

13وَل مُوسیٰ جواب ڈِتا، ”نہ ڈرو، بس کھڑے راہو تے ڈیکھو جو رب العالمین اَج تُہاکُوں کِینویں بچیندے۔ اَج تُوں بعد تُساں اِنہاں مِصریاں کُوں کڈھائیں نہ ڈیکھسو۔ 14رب العالمین تُہاڈے کیتے لڑسی۔ تُہاکُوں بس چُپ راہونڑیں۔“

15وَل رب العالمین مُوسیٰ کُوں آکھیا، ”تُوں میڈے سامنڑے کیوں فریاد کریندا پئیں؟ بنی اِسرائیل کُوں اگُوں ودھنڑ دا حُکم ڈے۔ 16آپنڑی سوٹی کُوں پکڑ تے اُونکُوں سمندر اُتے چا تاں سمندر ڈُو حصے تھی ویسی تے اِسرائیلی سمندر ءچوں سُکی جاہ تُوں لنگھ ویسن۔ 17مَیں مِصریاں دے دِلاں کُوں سخت کر ڈیساں تے او بنی اِسرائیل دا پِچھا کریسن تے مَیں فرعون، اُوندی ساری فوج، اُوندے رتھاں تے اُوندے سواراں کُوں شکست ڈے تے جلال پیساں۔ 18جِیں ویلے مَیں فرعون، اُوندے رتھاں تے اُوندے سواراں اُتے آپنڑا جلال ظاہر کریساں تاں مِصری قوم کُوں پتہ لگ ویسی جو مَیں ای رب العالمین ہاں۔“

19خُدا دا فرشتہ بنی اِسرائیل دے لشکر دے اگُوں اگُوں ٹُردا پِیا ہا۔ ہُنڑ او اُتھوں ہٹ تے اُنہاں دے پِچُھوں وَنج کھڑا تھیّا۔ بدّل دا تھمبا وی لوکاں دے اگُوں تُوں ہٹ تے اُنہاں دے پِچُھوں وَنج کھڑا تھیّا۔ 20اِینویں او بدّل مِصریاں تے بنی اِسرائیل دے لشکر دے وچال آ گِیا۔ پُوری رات مِصریاں دو اندھارا تے بنی اِسرائیل دو روشنی ہئی۔ اِیں کیتے مِصری پُوری رات بنی اِسرائیل دے نیڑے نہ آ سگے۔

21مُوسیٰ آپنڑا ہتھ سمندر اُتے چاتا تاں رب العالمین مشرق تُوں تیز اندھاری چلائی جیہڑی ساری رات چلدی ریہی۔ اُوں سمندر کُوں پِچُھوں ہٹا تے سُکی جاہ بنڑا ڈِتا تے سمندر ڈُو حصے تھی گِیا۔ 22وَل بنی اِسرائیل سمندر ءچوں سُکی زمین اُتے ٹُردے ہوئے لنگھ گئے۔ اُنہاں دے کھبے تے سجے پاسُوں پانڑی دیوار آلی کار کھڑا ہا۔

23وَل مِصری یعنی فرعون دے یکے گھوڑے، رَتھ تے سوار وی اُنہاں دے پِچُھوں پِچُھوں سمندر ءچ لگے گئے۔ 24رات دے پِچھلے پہر رب العالمین بدّل تے بھاہ دے تھمبے ءچوں مِصر دی فوج اُتے دِید کیتی تے اُنہاں اُتے خوف چھا گِیا۔ 25اُوں اُنہاں دے رتھاں دے پہیاں کُوں جام کر ڈِتا تاں اُنہاں کُوں چلاوݨ مُشکل تھی گِیا۔ وَل مِصریاں آکھیا، ”آؤ اساں بنی اِسرائیل تُوں بھج ونجُوں، کیوں جو رب العالمین اُنہاں کیتے مِصر دے خلاف لڑدا پئے۔“

26وَل رب العالمین مُوسیٰ کُوں آکھیا، ”آپنڑا ہتھ سمندر اُتے چا، تاں جو پانڑی واپس آ تے مِصریاں کُوں تے اُنہاں دے رتھاں تے گُھڑ سواراں کُوں بوڈ ڈیوے۔“ 27مُوسیٰ آپنڑا ہتھ سمندر اُتے چاتا تاں ڈینہہ نِکلدے ویلے پانڑی آپنڑی پہلی حالت ءچ آ گِیا تے مِصری پانڑی دے اگُوں بھجنڑ پے گئے پر رب العالمین اُنہاں کُوں سمندر ءچ وہا تے غرق کر ڈِتا۔ 28پانڑی واپس آ گِیا تے اُوں رتھاں تے گُھڑ سواراں کُوں ڈھک گِھدا تے فرعون دی یکی فوج جیہڑی بنی اِسرائیل دا پِچھا کریندی پئی ہئی، بُڈ تے مر گئی تے اُنہاں ءچوں ہِک وی نہ بچیا۔ 29پر بنی اِسرائیل سمندر ءچوں خشک زمین اُتے ٹُر تے لنگھ گئے۔ پانڑی دیوار آلی کار اُنہاں دے سجے کھبے کھڑا ریہا۔

30اُوں ڈینہوار رب العالمین بنی اِسرائیل کُوں مِصریاں تُوں بچایا تے مِصریاں دیاں لاشاں اُنہاں کُوں سمندر دے کنڈے اُتے نظر آئیاں۔ 31جِیں ویلے بنی اِسرائیل رب العالمین دی ایہ وڈی قُدرت ڈِٹھی جیہڑی اُوں مِصریاں اُتے ظاہر کیتی ہئی، تاں اُنہاں اُتے رب دا خوف چھا گِیا۔ او رب العالمین تے اُوندے خادم مُوسیٰ اُتے اِیمان گِھن آئے۔