اِستثنا 31:8

یشُوع کُوں مُوسیٰ دی جاہ تے مقرر کیتا ویندے

1وَل مُوسیٰ سبھ بنی اِسرائیل کُوں ایہ آکھیا:

2”ہُنڑ مَیں ہِک سو وِیہہ سال دا تھی گِیا ہاں۔ ہُنڑ مَیں تُہاڈی راہنمائی نئیں کر سگدا تے میکُوں رب العالمین ڈسائے جو مَیں یردن دریا دے پار نہ ویساں۔ 3رب العالمین تُہاڈا خُدا خود تُہاڈے اگُوں یردن دےپار ویسی۔ اُوہو تُہاڈے اگُوں اُنہاں قوماں کُوں تباہ کریسی تے تُساں اُنہاں دے مُلک اُتے قبضہ کر سگسو۔ دریا پار کریندے ویلے یشُوع تُہاڈے اگُوں اگُوں ٹُرسی جِینویں رب العالمین فرمائے۔ 4رب العالمین اُتھاں دے لوکاں کُوں اُونویں تباہ کریسی جِینویں اُوں امورِیاں دے بادشاہاں سِیحون تے عوج کُوں اُنہاں دے مُلک سمیت تباہ کیتا ہا۔ 5رب العالمین اُنہاں کُوں تُہاڈے ہتُھوں شکست ڈیسی۔ اُوں ویلے تُساں اُنہاں نال اُونویں سلوک کرنڑیں جِینویں مَیں تُہاکُوں حُکم ڈِتے۔ 6تُساں تگڑے تے دلیر تھی ونجو۔ اُنہاں تُوں نہ ڈرو تے خوف نہ کھاؤ، کیوں جو رب العالمین تُہاڈا خُدا تُہاڈے نال ویندے۔ او تُہاڈے تُوں آپنڑا ہتھ نہ چیسی تے تُہاکُوں کڈھائیں نہ چُھڑیسی۔“

7اِیندے بعد مُوسیٰ سبھ بنی اِسرائیل دے سامنڑے یشُوع کُوں سڈ تے آکھیا، ”تُوں تگڑا تے دلیر تھی وَنج کیوں جو تُوں اِیں قوم کُوں اُوں مُلک ءچ گِھن ویسیں جیندے ڈیوݨ دا وعدہ رب العالمین قَسم کھا تے اِنہاں دے پِیُو ڈاڈے نال کیتا ہا۔ تُوں ہر قبیلے کُوں ہِک علاقہ میراث ءچ ڈیویں۔ 8رب العالمین خود تیڈے اگُوں اگُوں ٹُردے ہوئے تیڈے نال راہسی۔ او تیڈے تُوں آپنڑا ہتھ نہ چیسی تے تیکُوں کڈھائیں نہ چُھڑیسی۔ خوف نہ کھاویں تے نہ گھبراویں۔“

ہر سَت سال بعد شریعت دی تلاوت

9مُوسیٰ ایہ ساری شریعت لِکھ تے بنی اِسرائیل دے سارے بزُرگاں تے لاوی قبیلے دے کاہِناں دے حوالے کیتی جیہڑے سفر کریندے ویلے رب العالمین دے عہد دا صندوق چا تے ٹُردے ہَن۔ 10مُوسیٰ اُنہاں کُوں آکھیا، ”ہر سَت سال بعد بحالی دے سال ءچ جِیں ویلے سارے قرض منسوخ کیتے ویندے ہِن، اِیں شریعت دی تلاوت کرائے۔ 11تلاوت اُوں ویلے کرنڑی ہے جِیں ویلے سبھ بنی اِسرائیل چھپراں آلی عید مناوݨ کیتے رب العالمین آپنڑے خُدا دے حضُور اُوں جاہ تے حاضر تھیوݨ جیہڑی او [مُقدّس تمبُو کیتے] چُنڑسی۔ 12سارے لوکاں کُوں یعنی مرداں، عورتاں، بالاں تے شہراں ءچ راہوݨ آلے پردیسیاں کُوں اُتھاں کٹھا کرائے تاں جو او سُنڑ تے سِکھنڑ تے رب العالمین تُہاڈے خُدا دا خوف مننڑ تے احتیاط نال شریعت دے گالھیں اُتے عمل کرݨ۔ 13لازم ہے جو اُنہاں دی اولاد جیہڑی شریعت تُوں ناواقف ہے اِینکُوں سُنڑے تے سِکھے تاں جو ساری حیاتی اُوں مُلک ءچ رب العالمین تُہاڈے خُدا دا خوف منے جیندے اُتے قبضہ کرݨ کیتے تُساں یردن دریا کُوں پار کریسو۔“

خُدا مُوسیٰ کُوں آخری ہدایت ڈیندے

14رب العالمین مُوسیٰ کُوں آکھیا، ”ہُنڑ تیڈی موت نیڑے ہے۔ یشُوع کُوں سڈ تے اُوندے نال اِجتماع آلے تمبُو ءچ حاضر تھی تاں جو مَیں اُونکُوں تیڈی جاہ تے مُقرر کراں۔“

مُوسیٰ تے یشُوع اِجتماع آلے تمبُو ءچ حاضر تھئے 15تاں رب العالمین تمبُو دے دَر اُتے بدّل دے تھمبے ءچ ظاہر تھیّا۔ 16اُوں مُوسیٰ کُوں آکھیا، ”تُوں مر تے آپنڑے پِیُو ڈاڈے کُوں مِلنڑ آلا ہیں تے ایہ قوم اُوں مُلک ءچ داخل تھیوݨ دے بعد بے وفائی کر تے اُنہاں دے دیوتیاں دی پُوجا کرݨ لگسی۔ او میکُوں چھوڑ تے اُوں عہد کُوں تروڑ ڈیسی جیہڑا مَیں اُنہاں نال کیتے۔ 17وَل اُنہاں اُتے میڈا غضب نازل تھیسی تے مَیں اُنہاں کُوں چھوڑ ڈیساں۔ مَیں اُنہاں تُوں آپنڑا مُنہ لُکا گِھنساں تے او تباہ تھی ویسن۔ بہُوں ساریاں مُصیبتاں تے آفتاں اُنہاں اُتے آسن۔ اُوں ویلے او اکھیسن، ’کیا ایہ مُصیبتاں اِیں وجہ تُوں تاں نئیں آئیاں جو رب العالمین ساڈے نال نئیں؟‘ 18تے اِینویں ای تھیسی۔ مَیں اُوں ویلے اُوں بدی پارُوں جیہڑی اُنہاں بئے معبُوداں دے پِچُھوں ٹُر تے کیتی ہوسی اُنہاں تُوں آپنڑا مُنہ لُکائی رکھیساں۔

19ہُنڑ ایہ گیت تُساں ڈوہائیں آپنڑے کیتے لِکھ گِھنو تے بنی اِسرائیل کُوں اِینویں سکھاؤ جو اُنہاں کُوں زبانی یاد تھی ونجے تاں جو ایہ گیت بنی اِسرائیل دے خلاف میڈا گواہ راہوے۔ 20کیوں جو مَیں اُنہاں کُوں اُوں مُلک ءچ گِھدی ویندا ہاں جیندے ڈیوݨ دا وعدہ مَیں قَسم کھا تے اُنہاں دے پِیُو ڈاڈے نال کیتا ہا تے جیندے ءچ کھیر تے ماکھی وافر ہے۔ اُتھاں او رَج تے کھاسن تے موٹے تھی ویسن۔ وَل او میکُوں رَد کر تے، تے میڈے عہد کُوں تروڑ تے بئے معبُوداں دے پِچُھوں لگ ویسن تے اُنہاں دی خدمت کریسن۔ 21نتیجے ءچ اُنہاں اُتے بہُوں ساریاں آفتاں تے مُصیبتاں نازل تھیسن۔ وَل ایہ گیت جیہڑا اُنہاں دی اولاد کُوں یاد ہوسی، اُنہاں دے خلاف گواہی ڈیسی۔ مَیں اُنہاں کُوں اُوں مُلک ءچ گِھدی تاں ویندا ہاں جِیندا مَیں وعدہ کیتا ہا پر مَیں جانڑدا ہاں جو ہُنڑ تئیں اُنہاں دی سوچ کیا ہے۔“

22مُوسیٰ اُوہو ڈینہہ ایہ گیت لِکھ تے بنی اِسرائیل کُوں سِکھایا۔

23وَل رب العالمین نُون دے پوتر یشُوع کُوں ہدایت ڈے تے آکھیا، ”مضبوط تے دلیر تھی وَنج، کیوں جو تُوں بنی اِسرائیل کُوں اُوں مُلک ءچ گِھن ویسیں جیندے ڈیوݨ دا وعدہ مَیں قَسم کھا تے اُنہاں نال کیتا ہا تے مَیں تیڈے نال راہساں۔“

24جِیں ویلے مُوسیٰ شریعت دے سبھ گالھیں کُوں ہِک کتاب ءچ لِکھ گِھدا 25تاں اُوں لاویاں کُوں جیہڑے سفر کرݨ ویلے عہد دا صندوق چا تے ٹُردے ہَن، ایہ حُکم ڈِتا، 26”شریعت دی ایہ کتاب گِھن تے رب العالمین آپنڑے خُدا دے عہد دے صندوق دے کولھ رکھو۔ اُتھاں او پئی راہوے تے سبھ بنی اِسرائیل دے خلاف گواہی ڈیندی راہوے۔ 27کیوں جو مَیں جانڑدا ہاں جو تُساں کتنے باغی تے ضِدی ہیوے۔ جِیں ویلے میڈے ہوندے ہوئیاں تُساں رب العالمین نال بغاوت کریندے ریہے ہیوے تاں میڈے مرݨ دے بعد کیا کُجھ نہ کریسو۔ 28ہُنڑ میڈے سامنڑے آپنڑے قبیلیاں دے سارے بزُرگاں تے ناظماں کُوں کٹھا کرو تاں جو او میڈے گالھیں خود سُنڑݨ تے اسمان تے زمین اُنہاں دے خلاف گواہ ہووݨ۔ 29کیوں جو میکُوں پتہ ہے جو میڈی موت دے بعد تُساں وِگڑ ویسو تے اُوں رستے تُوں ہٹ ویسو جیندے اُتے ٹُرݨ دی مَیں تُہاکُوں تاکید کریندا ہاں۔ آخر کار تُہاڈے اُتے آفت ضرور آسی کیوں جو تُساں اُوہو کریسو جیہڑا رب العالمین دی نِگاہ ءچ بُرا ہے۔ تُساں آپنڑے ہتھاں دے کماں نال اُوندے غضب کُوں دعوت ڈیسو۔“

30وَل مُوسیٰ بنی اِسرائیل دی ساری جماعت دے سامنڑے ایہ گیت شروع تُوں اخیر تئیں سُنڑایا۔