Santhali Project
लुक 6
जिरा़उक् माँहाँ मानाव रेयाङ
(माथाय १२:१-१४; मा़रकुस २:२३-२८; ३:१-६)
आदो जिसु जिरा़उक् माँहाँरे फोसोल तालातेये पारोम चालाक्कान ताहेंकाना आर उनिरेन चेलाको दो गेले हुलेच्काते तिते तिरहा़लकातेको जोमेत् ताहेंकाना। खान फा़रिसिको मोदरेन आदोम होड़को मेनकेदा, “जिरा़उक् माँहाँरे हुकुम बिरुदाक् दो चेदाक्पे का़मियेदा?”
आदो जिसुइ रोड़ रुवा़ड़ात्कोवा, “नोवा दो बापे पाड़हाव आकादा, दा़उद चेत्ए चेकालाक्आ रेङगेच्लेदेरे आच् आर आच् सोङगेतेनको हों? चेत्लेका उनि दो इसोराक् ओड़ाक्ते बोलोकाते सामाङाक् पिठा़ हातावकातेये जोमकेदा आर आच् साँवतेनको होंए एमात्कोवा, ओने ओकाटाक् नायकेको मोतो छाडा जोजोम दो हुकुम बिरुदाक्कान?”1
आर जिसुइ मेतात्कोवा, “मानवा होपोन दो जिरा़उक् माँहाँरेन होंए मा़लिक काना।”
आदो एटाक् जिरा़उक् माँहाँरे जिसु सुना़गोगरे बोलोकातेये चेत्आकोकान ताहेंकाना आर ओंडे दो मित् होड़े ताहेंकाना ओने उनियाक् जोजोम ति दो बोरोच्गे ताहेंकानताय। आदो आ़न गुरुको आर फा़रिसिकोको ता़नखियेदेकान ताहेंकाना, जिसु दो जिरा़उक् माँहाँरेये बोगेकोवा से बाङा, जेमोन दोसे ला़गित् लिसिंदको ञाम। मेनखान जिसु दो ओनकोवाक् हुदिस बुनदिसको बाडायकाते उनि ति बोरोच् होड़े मेतादेया, “मा बेरेत्मे आर देला तालारे तेङगोनमे।” खानगे बेरेत्कातेये तेङगोयेना। आदो जिसुइ मेतात्कोवा, “कुलियेत्पे का़ना़ञ, जिरा़उक् माँहाँरे दो भा़ला़इ गानोक्आ से बा़ड़िच्? जिवि बाबाञचाव, से नोनोसटो?” आदो ओनको जोतो बेङगेत् आ़चुरात्कोतेये मेतादेया, “मासे ति तिया़रताम,” आदोए ओनकाकेदा आर उनियाक् ति दो दाड़े रुवा़ड़ेनताया।
आर ओनको दो एदरेतेको सेङगेलेना आर आको मोदरेको गालमारावाना जिसु दो चेत् लेकातेको गोजेया मेनते।
जिसु गेलबार आपोसतोलकोय बाछावेत्को
(माथाय १०:१-४; मा़रकुस ३:१३-१९)
आदो ओनाको दिनरे जिसु कोयजोङ ला़गित् बुरुतेये ओडोक चालावेना आर मित् ञिंदा़ इसोर ठेने कोय आङगाकेदा। आर आङगायेन खान आच्रेन चेलाकोय होहो सोरकेत्कोवा आर ओनको मोदरेन गेलबार होड़े बाछावाना, ओने ओनको आपोसतोल होंए ञुतुमकेत्को। सिमोन ओने उनि पातरासे बाहनाकेदे आर उनिरेन बोयहा आ़न्द्रियास आर जाकोब आर जोहान आर फिलिप आर बारथोलोमाय माथाय आर थोमा, आर आलफायरेन होपोन जाकोब आर सिमोन ओने उनि आक्आँटिच्को मेताय। आर जाकोबरेन होपोन जिहुदा़ आर जिहुदा़ इसकारियोत ओने ओकोय सोसोपरोतिच्ए होयेन।
जिसुइ चेत्आकोकान आरे बोगेयेत्को
(माथाय ४:२३-२५)
आर जिसु ओनको साँवते फेडकाते मित्टेच् सोतेल जायगारेये तेङगोयेना आर उनिरेन आ़डि गादेल चेला आर गोटा जिहुदा़ आर जेरुसालेम आर तुर आर सिदोन सेनाक् जालापुरि आड़े खोन आ़डि उता़र होड़, ओने ओनको आँजोमताय ला़गित् आर आकोवाक् रोगको खोन बोगे ओचोक् ला़गित्को हेच् आकान ताहेंकाना आर बेसाफा जिउको होतेते जालाक्कानकोको बोगे ओचोक्कान ताहेंकाना। आर जोतो गादेल होड़ जोटेदे ला़गित्को आ़त बाड़ायेत् ताहेंकाना। एनते उनि खोन दाड़े ओडोकोक्कान ताहेंकाना आर ओना दो जोतोकोय बोगेयेत्कोकान ताहेंकाना।
भा़गानको आर राक्जोङको
आर जिसु दो आच्रेन
चेलाको बेङगेत् राकाप्आत्कोतेये मेनकेदा,
भा़गानगेयापे आपे जिउरे रेङगेजोक्को दो एनते इसोराक् राज दो आपेयाक्गे,
भा़गानगेयापे आपे नित रेङगेच्एत्पेको दो,
एनतेपे बि ओचोक्आ,
भा़गानगेयापे आपे नितपे राक्जोङ कानको दो,
एनतेपे लानदाजोङा।
भा़गानगेयापे होड़को आपेको कुरुदापेरे, आरको बेगार गिडिलेपे, आरको निसड़ा़उपे आर आपेयाक् ञुतुम बा़ड़िच्आक् मेनकातेको गिडिलेतापेरे मानवा होपोन, इया़ते। एन हिलोक् दो रा़सका़क्पे आर हुला़सते दोनपे, एनते सेरमारे आपे दो माराङ कुड़ा़इ मेनाक्तापेया; ओनकोरेन हापड़ामको दो एनते ना़बिकोको ओनकालेत्कोगेया।
मेनखान हाय आपे किसा़ँड़को दो, आपेयाक् जिवि राड़ेच्पे ञाम होरायेदा।
हाय आपे नितोक् बि आकानको दो,
एनते रेङगेच्पेया हापेन,
हाय आपे नितोक् लानदाजोङको दो,
एनतेपे होमोरा आरपे राक्जोङा हापेन।
“हाय आपे दो, जोतो होड़ आपे रेयाङ बोगेको रोड़लेरे एनते ओनका लेकागे ओनकोरेन हापड़ामको दो एड़े ना़बिकोको मेताकोकान ताहेंकाना।”
बा़इरि दुला़ड़को रेयाङ
(माथाय ५:३८-४२)
मेनखान आपे आँजोमेत् कानकोञ मेतापेकाना, आपेरेन बा़इरिको दुला़ड़कोपे कुरुदापेकानको भा़ला़इकोपे, आर सारापापेकानको भोराकोपे आर आपे साँव बा़ड़िच्को बेवहारेत्कानको कोयाकोपे। मित् जोहारे चेटाक्मेयिच् दो दोसाराक् हों आ़चुरायमे आर आमाक् ओयोनाक् रेरेच्इच् दो आङगरोप हों इदि ओचोवायमे। मिमित् कोयमेयिच् दो एमायमे आर मेनाक् तामाक् रेरेच्इच् ठेन खोन दो आलोमकोय रुवा़ड़ा। आर होड़को चेत् लेकावापेपे ञामकान, आपे हों ओनकावाकोपे बाड़े।
“आपेको दुला़ड़ेत्पेकोगेपे दुला़ड़को खान ओकोरतापे दाया दो? एनते का़इ होड़को हों चोङ आको दुला़ड़को दोको दुला़ड़ेत्कोगे। आपेको भा़ला़येत्पेकोगेपे भा़ला़इको खान ओकोरतापे दाया दो? का़इ होड़को हों चोङ एनतेको ओनकायेत्गे। आर ओकोयको ठेन ञाम रुवा़ड़पे आसोक्कान, ओनकोगे पाञ्चापे एमाको खान, ओकोरतापे दाया दो? का़इ होड़को हों चोङ का़इ होड़को पाञ्चाको एमाकोकान, जेमोन उना़क्गेको ञाम रुवा़ड़। मेनखान आपेरेन बा़इरिको दुला़ड़कोपे आर भा़ला़इकोपे आर पाञ्चा एमाकोपे बेगोर आस छुटा़उक्ते, खान आपेयाक् कुड़ा़इ ढेरगे होयोक्तापेया आर चोट उता़रित्रेन होपोनकोपे होयोक्आ, एनते उनि दो गुन बाङ माक्नावको आर बा़ड़िच्को ला़गित्ए बोगेगेया। माँयाँवानको होयोक्पे चेत्लेका आपेरेन बाबाय माँयाँवाना।”
एटाक्को आलो बिचा़रको रेयाङ
(माथाय ७:१-५)
“आलोपे बिक्चा़रा, आदो बाङगेपे बिचा़र ओचोक्आ आर आलोपे दुक्सिया आदो बाङगेपे दोस ओचोक्आ। इका़काकोपे, आदोपे इका़ ओचोक्आ। एमोक्पे, आदो आपे होंको एमापेया, भागे सोसोङाक्ते, ओता खाचाव खाचावते, रुकु रुकुते, चुरुबुरुकातेको गोछावापेया; एनते ओका सोसोङाक्तेपे सोङा इना़तेगेको सोङ रुवा़ड़ापेया।”
आर जिसु मित्टेन फेन होंए ला़इयात्कोवा काँड़ाँ होड़ दो काँड़ाँ होड़े आ़युर दाड़ेकेया? बाना होड़गे घाडलाक्रे बाकिन ञुरुक्आ? चेला दो गुरु खोन बाय माराङा मेनखाने गा़खुड़ उता़रलेनरे मिमित् होड़ दो आच्रेन गुरू लेकाय होयोक्आ।
“बोयहाम मेंत्रे मेनाक् चुबा़क् दो चाक्एम बेङगेत्आक् काना आर आपनार मेंत्रे मेनाक् गाँटके दो बाम ञेलेत्काना? चेकाते आम बोयहाम मेन दाड़ेयाया, हापे बोयहा आमाक् मेंत्रे मेनाक् चुबा़क् ओडोक गिडि ओचोवा़ञमे आर आम दो आपनार मेंत्रे मेनाक् गाँटके दो बाम ञेलञामेदा? ए फा़सिया़रा, आमाक् मेंत् खोन गाँटके ओडोक गिडि माड़ाङलेम, एनडेते आनेच् बोयहामाक् मेंत्रे मेनाक् चुबा़क् ओडोक गिडि ला़गित् दो पुरठा़म ञेञेला।”
दारे आर ओना रेयाक् जो
(माथाय ७:१६-२०; १२:३३-३५)
“एनते बा़ड़िच् जोक्कान भागे दारे बा़नुक्आनेच्; आर भागे जोक्कान बा़ड़िच् दारे हों बा़नुक्आनेच्। एनते मिमित् दारे दो ओना रेयाक् जोरेगे बाडाय ओरोमोक्आ, जा़नुम दारे खोन लोवा दो बाको गोत् जारवाया आर कुँड़िंत्रामा झा़वा़ खोन हों दारखा जो बाको गोत् जारवाया। भागे होड़ दो मोन रेयाक् भागे बाबायाक् खोन भागेयाक्ए ओडोक आ़गुया आर बा़ड़िच् होड़ दो बा़ड़िच् बाबायाक् खोन बा़ड़िच्आक्ए ओडोक आ़गुया; एनते उनियाक् मोन सारेड़ाक् रेयाक्गे उनियाक् मोचा दोए रोड़ा।”
बार लेकान ओड़ाक् रेयाक् फेन
(माथाय ७:२४-२७)
“आर चेदाक् प्रोभु प्रोभुपे मेता़ञकाना, आर इञ मेतापेकानाक् दो बापे का़मियेदा? ओकोय इञ ठेने हिजुक्आ आर इञाक् काथाय आँजोमा आर ओनाकोय सेनाक्आ, ओनकान मित्के मित् होड़ दो ओकोय लेकानाय इञ उदुक्आपेया। उनि दो मित्टेन ओड़ाक् बेक्नाव होड़ लेकानाय, ओने उनि ला खा़न्दरिञकाते धिरि चा़टा़इनि चेतानरे नेव ए बा़इसा़उकेत्, आदो बानबा़सि हेच्एनरे आ़तुक् दाक् ओना ओड़ाक्रे बाजावेना, मेनखान बाय टासाक दाड़ेयादा, एनते काजाकते बेनाव आकान ताहेंकान दो। मेनखान आँजोमकाते बाय सेनाक्इच् दो मित्टेन होड़ लेकानाय, ओने उनि बेगोर नेवतेगे ओत चेतानरे ओड़ाक्ए बेनावकेत्, ओने ओनारे आ़तुक् दाक् बाजावेनरे एकालते रुप्एना आर ओना ओड़ाक् धाङधासेरेन दो हेड़ान बोतोर।”
Source notes (1)
- Cross-reference लेबि २४:९
Santhali Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.