Santhali Project
लुक 2
जिसुवाक् जोनोम
(माथाय १:१८-२५)
ओना जोखेच्गे आ़गुसतुस का़इसा़र ठेन खोन मित्टेन पारवाना ओडोकेना, गोटा धा़रतिरे होड़ लेखा होयोक् ला़गित्। नोवा होड़ लेखा दो पा़हिल धाव होयलेना कुरेनियुस दो सुरिया़रेन दिसा़म चाक्लाविच्ए ताहेंकानरे। आर जोतो होड़ ञुतुम ओल ओचोयताको ला़गित्को चालावेना, मिमित् होड़ आपान आ़पिन नागराहाते।
आर जोसेफ हों गा़लिल रेयाक् नासारेत नागराहा खोन जिहुदा़ते बेथलेहेमको मेताक् दा़उद रेयाक् नागराहातेये राकाप् चालावेना, दा़उद दा़हङगि आर बुदा़रेने ताहेंकान इया़ते। ञुतुम ओल राकाप् ओचोयताया मेनते, आच्ए होरोक् चिखना़आकादे मा़रिया़म तुलुच्, ओने ओकोय भा़रति होड़मोय ताहेंकान। आर ओंडेकिन ताहेंकानरेगे उनियाक् दुड़ुप् दिन दो तिया़क्एनताया। आर आच्रेन पा़हिला़उठा कोड़ा गिदरा़इ जानामकेदेया आर किचरिच्तेये बेदहावकेदेते मित्टेच् गोड़ा नाँदवारेये गितिच्कादेया, डेराक् ओड़ाक्रे उनकिन ला़गित् ठा़ँइ बाङ ताहेंकान इया़ते।
गुपिको ठेन दुतको
आर ओना टोठारे दो भिडि गुपिको बाथान टा़न्डिरेको ताहेनकान आर आकोरेन खा़ड़ भिडि ञिंदा़को होरहोयेत्कोकान ताहेंकाना। खानगे प्रोभुरेन मित्टेन दुत ओनको ठेने तेङगोयेना आर ओनको बेड़हायते प्रोभुवाक् ठोनोक बामबेरेना आर बा़ड़िच् बोतोरको बोतोरेना। आदो दुते मेतात्कोवा, “आलोपे बोतोरोक्आ, एनते ञेलपे, आ़डि रा़सका़ रेयाक् भागे सोमबात इञ जा़हिरापेकाना। ओना दो जोतो दिसा़म होड़को ला़गित् होयोक्आ। एनते आपे ला़गित् तेहेञ दो दा़उद नागराहारे मित्टेन बाबाञचाविच्ए जानामाकाना, ओने उनि दोए प्रोभु मा़सिकान। आर आपे ला़गित् चिनहा़ दो नोक्ओंय, आपे दो मित्टेन बाले गिदरा़ किचरिच्ते बेदहाव आकान आर मित्टेन गोड़ा नाँदवारे गितिच् आकानपे ञामेया।”
खान आचकागे सेरमारेन दुङगुत् दुङगुत् फा़द उनि दुत साँवतेयेनाको आर इसोर सारहावातेको मेनकेदा,
“चोट उता़ररे इसोराक् ठोनोक आर धा़रतिरे सुलुक, मानवाकोरे कुसि,”
आदो दुत ओनको ठेन खोन सेरमातेको राकाप् चालावेन खान, भिडि गुपिकोको मेपेनेना, “मे देलाबोन बेथलेहेमतेबो चालाक्आ आर नोवा होय आकान काथा रेयाक्बो ञेल आ़गुइमा, ओकाटाक् प्रोभुइ बाड़ाय ओचोकेत्बोन।”
खानगे आ़डि चाँडाकिको चालावेना, आरको सुटिक ञामकेत्कोवा, मा़रिया़म हों आर जोसेफ हों आर गोड़ा नाँदवारे गितिच् आकान बाले गिदरा़ हों; आर ञेलकाते उनि गिदरा़ रेयाङ ला़इयात्को काथा रेयाङको बाड़ाय ओचोकेत्कोवा। आर आँजोमकेत् जोतो होड़ भिडि गुपिकोको ला़इयात्को काथा रेयाङको हाहाड़ायेना; मेनखान मा़रिया़म दो आयाक् मोनरे गाँडोन तुलुच् नोवाको जोतो काथाय बाय दोहोकादा। आर भिडि गुपिको दो ला़इयात्को काथा लेका, सानामाक्को आँजोम आरको ञेलान खान, इसोर साबासि आर सारहाव सारहावतेको रुवा़ड़ चालावेना।
जिसुको ञुतुमेदे
आर खातनाये ला़गित् इरा़ल माँहाँ पुरा़वेन खान, उनियाक् ञुतुम दो जिसुको दोहोकेत्ताया, ओने ओकाटाक् दुते ञुतुमलेदे कुखिरे आ़उरिये गाड़हावक्रेगे।
कोयजोङ ओड़ाक्रेये हा़जिर ओचोक्कान
आदो मोसेयाक् आ़न लेका ओनकोवाक् छुत मेटावक् दिन पुरा़वेन खान, जेरुसालेमतेकिन इदि केदेया प्रोभु सामाङरे आ़गुये ला़गित्; प्रोभुवाक् आ़नरे ओलआकान लेका, बाङमा, “कुखि होहोर मित्के मित् कोड़ा गिदरा़ दो प्रोभु ला़गित् सोनोतको ञुमोगोक्आ।” आर प्रोभुवाक् आ़नरे मेन आकात्आक् लेका दाँड़ें सामाङ ला़गित् “मित् जुरि पोताम बाङखान बारया पारवा होपोन।”
आर ञेलपे, जेरुसालेमरे सिमियोन ञुतुमान मित् होड़े ताहेंकाना, उनि दो भागे आर इसोर भोकति होड़े ताहेंकाना, इसराएलकोवाक् जिवि राड़ेच्आक् ञेल होहोरकानगे; आर सोनोत जिउ उनि चेतानरेये ताहेंकाना। आर सोनोत जिवे सोदोराकावादे ताहेंकाना, “प्रोभुरेन मा़सि आ़उरिये ञेले हा़बिच् मोरोन बाय ञेला मेनते।” आर जिउ उसकुरते कोयजोङ ओड़ाक्तेये हेच्एना आर एङगात आपात दो आ़न रेयाक् चा़लि लेका उनि रेयाङकिन का़मि ला़गित् जिसु गिदरा़किन आदेरकेदे खान, उनिये होबोरकेदेया, आर इसोर सारहावकेदेतेये मेनकेदा,
“नितोक् दो, ए प्रोभु, इञ आमरेन गुति सुलुकतेम बिदा़का़ञकाना। आमाक् काथा लेका।
एनते इञाक् मेंत्ते आमाक् बाबाञचाव इञ ञेलआकादा,
ओने ओकाटाक् जोतो जा़तको सामाङरेम तेयाराकात्,
जिहुदि बाहरेरेन होड़को ला़गित् सोक्दोराक् मेनते मित्टेन मारसालगे आर आमरेन होड़ इसराएलको रेयाक् ठोनोकगे।”
आर उनिरेन आपात आर एङगात दो उनि रेयाङ रोड़ोगोक्कान काथाकोतेकिन हाहाड़ाक्कान ताहेंकाना। आर सिमियोन दोए भोरात्किना आर एङगाततेत् मा़रिया़मे मेतादेया, “ञेलमे, नुय दो इसराएलरे आ़डि होड़को गुरोक् आरको जिवेत् बेरेदोक् ला़गित्ए दोहोवाकाना आर ओनकान चिनहा़ ला़गित् हों, ओने ओका बिरुदरेको रोड़, आर आमाक् जिवि हों तारवाड़िते सोबोक् ताबोक्आ, जेमोन आ़डि उता़र मोनको रेयाक् हुदिसबुनदिसको सोदोरोक्।”
आर आसेर खुँटरेन फा़नुवेल होपोनेरा हान्ना, मित्टेन ना़बि मायजिउ होड़े ताहेंकाना, उनि दो उमेररे ढेरे लाहावाकान ताहेंकाना। डा़ङगुवा़ तायोम एयाय सेरमागे जाँवाँयतेत् तुलुच् दोए भुञजा़उ लाक्आ, आर इरा़लगेल पोन सेरमारेन रा़ँडि मायजिवे ताहेंकाना; उनि दो कोयजोङ ओड़ाक् बाङ बा़गिकाते उपा़स आर नेहोंरजोङते सिञ ञिंदा़ इसोरे सेवावायकान ताहेंकाना। आर इना़ घा़ड़िच्गे हेच्काते इसोरे गुनमानाव जोहारादेया आर जेरुसालेम रेयाक् छाडावाक्को ञेल होहोरकान जोतो होड़ उनि गिदरा़ रेयाङे गालमारावात्कोवा।
नासारेततेये रुवा़ड़ आ़गुयेन
आदो प्रोभुवाक् आ़न लेका सानामाक्को पुरा़उकेत् खान गा़लिलते आकोवाक् नागराहा नासारेततेको रुवा़ड़ चालावेना। आर उनि गिदरा़ दोए हारा इदियेना आरे दाड़े इदियेना आ़किलते पेरेजोक् तुलुच्; आर इसोराक् दाया उनिरे ताहेंकाना।
जिसु गिदरा़ कोयजोङ ओड़ाक्रे
आर उनिरेन एङगात आपात दो जाव सेरमा जेरुसालेमते सेन पारोम पोरोबरेकिन चालाक्कान ताहेंकाना। आर जिसु गेलबार सेरमारेने होयेन खान, पोरोब रेयाक् चा़लि लेका जेरुसालेमतेको राकाप् चालावेना; आर दिनको पुरा़उकेत् खान उनकिनकिन रुवा़ड़ोक्रे जिसु गिदरा़ दो जेरुसालेमरेये तायोम ताहेंयेना आर उनिरेन एङगात आपात दो बाकिन बाडायलाक्आ। मेनखान साँवतेनको तुलुच् मेनाया मेनते बुजहा़उकाते मित् दिन होरकिन चालावेना आर पेड़ा आर ञेपेलओपरोमको तालारेकिन ञाम बाड़ाकेदेया; आर बाकिन ञामलेदेते उनि ञाम ञामते जेरुसालेमतेकिन रुवा़ड़ेना। आर पे माँहाँ तायोम कोयजोङ ओड़ाक्रे गुरुको तालारे दुड़ुप् आकान ओनकोवाक्ए आँजोमकान आर ओनकोय कुक्लिकानकिन ञाम केदेया। आर जोतो आँजोमकेत्तायको दो उनियाक् बुद आर रोड़ रुवा़ड़तेको ठाक एना। आर उनि ञेलकातेकिन भाड़ोयेना आर एङगाततेत् दोए मेतादेया, हेंदा बेटा, चेदाक्एम नोनकाकेत् ताबोना? ञेलमे आ़पुमता़लिञ दो धाँदरा धा़ँदरिलिञ ञामबाड़ायेत्मे ताहेंकाना।
आदोए मेतात्किना, “चाक्बेन ञाम बाड़ायेदिञकान ताहेंकाना? बाबेन बाडायलाक्आ आ़पुञाक् ओड़ाक्कोरे ताहेन होयोक्तिञा मेनते दो?” मेनखान उनिये मेतात्किन काथा दो बाकिन बुजहा़उलाक्आ।
आदो जिसु उनकिन तुलुच् फेड सेनकाते नासारेततेये हेच्एना आर उनकिन गोबोलरेये ताहेंयेना आर उनिरेन एङगात दो जोतो काथा आयाक् मोनरेये दिसा़ दोहोकादा। आर जिसु दोए हारा इदियेना आकेलरे, होड़मोरे आर इसोर आर होड़कोवाक् दायारे।
Santhali Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.