Santhali Project
लुक 1
ओनोड़ काथा
दुला़ड़िया़ थियोफिसल:
ओकाको काथा आबो तालारे पुरा़उ सा़त आकाना, ओनाको रेयाक् जा़ड़ खापे खाप ओल दोहोकात् ला़गित् आ़डि होड़ हातको लागाव आकात्ते। ओनको दो एतोहोप् खोन मेंत्ते ञेल आकात्आक्कोरेन गोहा आर गुतिको ताहेंकाना, ओनको दो ओना आबोको जिमा़वात्बोना। इञ हों, ए आ़डि मानोतान थियोफिलस, ओड़ खोन सानामाक्को खोदेखोद पाँजा आ़गुवाकात्ते ओड़ेओड़ ओलाम बेस इञ मेतात्आ, जेमोन ला़इ चेत्आत्मे काथाको रेयाङ खा़टितेत्एम बाडाय।
जोहान बाबा़प्तिसिच् जानामोक् रेयाङ ला़इ लाहाक्कान
जिहुदा़रेन हेरोद राजा ओकतेरे आ़बिया़ दोलरेन साकारिया़ ञुतुमान मित्टेन नायकेये ताहेंकाना आर उनि ओड़ाक् होड़ दो आरोन बोंसरेने ताहेंकाना, ञुतुमताय दो एलिसाबेत। उनकिन बानाहोड़गे इसोर सामाङरे भागेकिन ताहेंकाना, प्रोभुवाक् सानाम हुकुमको आर आ़रिकोरे बिन दोसानकिन ताड़ामेत् ताहेंकाना। आर गिदरा़ दो बाको ताहेंकानताकिना, एलिसाबेत बा़ँजहिये ताहेंकानते आर बाना होड़गे उमेररे ढेरकिन लाहा आकान ताहेंकाना।
आर आयाक् दोल रेयाक् पा़रिया़रे इसोर सामाङरे नायके रेयाक्ए का़मिकान ताहेंकानरे। नायके का़मि रेयाक् चा़लि लेका प्रोभुवाक् कोयजोङ ओड़ाक्रे बोलोकाते धुधुप दो गुलिबाँटते उनिरेगे पाड़ावेना। आर धुप जेरेद जोखेच् जोतो गादेल होड़ दो बाहरेरेको कोयजोङकान ताहेंकाना। आदो प्रोभुरेन मित्टेन दुत उनि ठेने ञेल ओचोयेना, धुप जेरेद पिंड रेयाक् एतोम सेच्रे तेङगोवाकान। साकारिया़ दो उनि ञेलतेये तोरासेना आर बोतोर चाड़हावादेया। मेनखान दुत दोए मेतादेया, “आलोम बोतोरोक्आ, साकारिया़, एनते आमाक् कोयजोङ दो आँजोमेनतामा आर आम ओड़ाक् होड़ एलिसाबेत दो कोड़ा गिदरा़इ जानामेया आर उनियाक् ञुतुम दो जोहानेम दोहोयताया। आर रा़सका़ आर हुला़स होयोक्तामा आर आ़डि होड़ उनियाक् जोनोमतेको रा़सका़क्आ। एनते उनि दो प्रोभु सामाङरे माराङे होयोक्आ आर दारखा रासा आर बुबुलाक् दो बाङगेये ञुया आर एङगात कुखि खोनगे सोनोत जिउतेये पेरेजोक्आ। आर इसराएल होपोनको मोदरेन आ़डि होड़ प्रोभु आकोरेन इसोर सेच्ए आ़चुर रुवा़ड़कोवा। आर आच् दो एलिया़ ना़बि रेयाक् जिउ आर दाड़ेते उनि सामाङरे लाहा लाहातेये चालाक्आ, आपातकोवाक् मोन होपोनको सेच् आ़चुरताको ला़गित् आर बेबाक्तावको दो भागे होड़कोवाक् बुज सेच्; प्रोभु ला़गित् मित्टेन सापड़ावाकान जा़त तेयारको ला़गित्।”
खान साकारिया़ दो दुते मेतादेया, “चेकाते नोवा दोञ बाडायकेया? एनते इञ दोञ हाड़ामगेया आर इञ ओड़ाक् होड़ उमेरते ढेरे लाहावाकाना।”
दुत दो उनिये रोड़ रुवा़ड़ादेया, “इञ दो गा़ब्रिएल का़ना़ञ, ओने इसोर सामाङरेञ तेङगोनकान आर इञ दो ला़इयाम आर नोवाको भागे सोमबात जा़हिराम ला़गित् इञ कोल एना। आर ञेलमेम हापेक्आ आर बाम रोड़ दाड़ेयाक्आ एनहिलोक् हा़बिच्, ओने उनरे नोवाको होयोक्, एनते आम दो इञाक् काथा बाम पा़तिया़वादा ओने ओकाको ओकते ना़पितरे पुरा़उक्।”
आर होड़को दो साकारिया़को ञेल होरेकान ताहेंकाना आर कोयजोङ ओड़ाक्रेये बिला़मोक्कानतेको हाहाड़ाक्कान ताहेंकाना। आरे ओडोक हेच्एन खान, ओनको ठेन बाय रोड़ दाड़ेयादा, खानगेको बुजहा़उकेदा कोयजोङ ओड़ाक्रे दोरसोने ञेल आकादा मेनते आर उनि दोए डुबुक् डुबुक्आत्कोवा आर गुङगा़गेये ताहेंयेना।
आर सेक्वा का़मि दिन पुरा़वेनताय खान, आच् ओड़ाक्तेये चालावेना। आर ओनाको दिन तायोमते उनि ओड़ाक् होड़ एलिसाबेत दो होड़मोरेये ञामवाना आर मोंड़ें चाँदो दिने बोलो बायेना मेनकेदाय, “प्रोभु दो नोक्ओंये नोनकावादिञा, बेङगेत्आदिञ दिनकोरे होड़को तालारे ताहेंकानतिञ बेमानोते ओचोक् गिडितिञा मेनते।”
जिसु मा़सिये जानामोक् रेयाङ ला़इ लाहाक्कान
आर तुरुयाक् चाँदोरे गा़ब्रिएल दुत दो इसोर ठेन खोन गा़लिल रेयाक् नासारेत नागराहातेये कोलेना। मित्टेन कुँवा़ँरि कुड़ि ठेन सोमबात आनतेये चालावेना, ओने उनि दो दा़उद बोंसरेन जोसेफ ञुतुमान मित् होड़ तुलुच्ए होरोक् चिखना़आकान ताहेंकाना, उनि कुँवा़ँरि कुड़ि दो मा़रिया़माया। आर उनि ठेन बोलोकातेये मेतादेया, “जोहार, ए दाया आकावात्मेयिच्, प्रोभुगे आम तुलुच्।”
मेनखान उनि दो नोवा रोड़ते आ़डिये आ़ँदुक् मा़ँदुक् एना, आरे हुदिस जोङकान ताहेंकाना, नोवा दो चेत्लेकान जोहार कान बाङ? आदो दुते मेतादेया, “आलोम बोतोरोक्आ मा़रिया़म, एनते इसोर ठेन खोन दायाम ञामआकादा। आर ञेलमे होड़मोरेम ञाम जोङा आर कोड़ा गिदरा़म जानामेया आर उनियाक् ञुतुम दो जिसुम दोहोयताया। उनि दो माराङे होयोक्आ आर चोट उता़ररेन होपोने बिका़उक्आ आर प्रोभु इसोर दो उनि आपात दा़उदाक् सिङघा़सोने एमाया। आर जाकोब गुसटिरे जायजुग हा़बिच् राज आकाने ताहेना आर उनियाक् राज रेयाक् मुचा़त् दो बाङ होयोक्आ।”
मेनखान मा़रिया़म दो दुते मेतादेया, “नोवा दो चेत्लेकाते होयकोक्आ, एनते इञमाञ डा़ङगवा़गे?”
दुत दो उनिये मेतादेया, “सोनोत जिउगे आम चेतानरेये हिजुक्आ आर चोट उता़रिच् रेयाक् दाड़ेगेये उमुलकामा, ओना इया़तेगे उनि जानामोक्इच् दो सोनोते बिका़उक्आ, इसोररेन होपोने ञुमोगोक्आ। आर ञेलमे, आमरेन पेड़ा एलिसाबेत हों बुडहि पा़ड़िया़रे कोड़ा गिदरा़ होड़मोरेये ञाम आकावाना आर बा़ँजहिको मेतायिच् रेयाक् नोवा दो तुरुइ चाँदो कानताया। एनते इसोराक् जाहान काथागे बिन दाड़ेयानाक् दो बाङ होयोक्आ।”
आदो मा़रिया़मे मेतादेया, “ञेलमे इञ दो प्रोभुरेन का़ड़मि, आमेम रोड़केत् काथा लेका बाड़े होया़ञमा।” खान दुत दो उनि ठेन खोने चालावेना।
मा़रिया़म एलिसाबेते हिरियेदे
ओनाको दिनरे मा़रिया़म दो ओडोकेनते बुरु दिसा़मते, जिहुदा़ रेयाक् मित्टेन नागराहाते उसा़रातेये चालावेना। आर साकारिया़ ओड़ाक्ते बोलोयेनते एलिसाबेते जोहारादेया। आर एलिसाबेत दो मा़रिया़माक् जोहारे आँजोमकेत् खानगे, गिदरा़ दो उनियाक् कुखिरेये केटेलेना आर सोनोत जिउते पेरेच्एनते, एलिसाबेत दो आ़डि गारते होहोवातेये मेनकेदा, “भोरानगेयाम आम दो मायजिउको मोदरे आर भोरानगेया आमाक् कुखि रेयाक् जो हों। आर नोवा दो चेकाते होयादेञा, इञरेन प्रोभुरेन एङगात दो इञ ठेने हिजुक्? एनते ञेलमे, आमाक् जोहार रेयाक् आड़ाङ इञाक् लुतुररे बाजावतोरागे, गिदरा़ दो इञाक् कुखिरे हुला़सतेये केटेलगोत्एना। आर भा़गानगेयाय पा़तिया़वेनिच् दो एनते प्रोभु सेच् खोन ला़इ आकावादेयाक्को दो पुरा़उक्गेया।”
मा़रिया़माक्, सारहाव सेरेञ
खानगे मा़रिया़मे मेनकेदा,
“इञाक् जिवि दो प्रोभुइ माराङेदेकाना।
आर जिउ तिञ दो इञरेन बाबाञचाविच् इसोररेये हुला़स आकाना;
एनते उनि दो आच्रेन का़ड़मि रेयाक् निंधा़न दोसाय बेङगेत् आकावात्ताया, एनते,
ञेलमे नित खोन दो जोतो पिड़हिरेनको भा़गानको मेता़ञा;
एनते उनि दाड़ेयानिच् दो इञ ला़गित् माराङ माराङाक्कोय का़मि आकादा।
आर सोनोतगे उनियाक् ञुतुम दो।
आर उनियाक् माँयाँ दो पिड़हि चेतान पिड़हिगे
आच् बोतोरायको चेतानरे।
उनि दो आयाक् सोपोते दाड़ेये चालाव आकादा, उनि दो धोमोककोय छिञछा़तुर आकात्कोवा,
आकोवाक् मोन रेयाक् हुदिस बुनदिसरे,
उनि दो रापाजको सिङघा़सोन खोने ञुरहा़केत्कोवा
आर निंधा़न होड़कोय उसुलकेत्कोवा।
रेङगेच् आकानको दो भागे भागेयाक्तेये बि ओचोकेत्कोवा आर किसा़ँड़ होड़ दो एकेन तिये कोल गोत्कात्कोवा।
इसोर दो आच्रेन गुति इसराएले ञेल साँवहाँकेदेया माँयाँ दिसा़य तुलुच्
आबोरेन हापड़ामको ठेने रोड़लेत् लेका, आबराहामरे
आर उनिरेन बोंसकोरे जायजुग हा़बिच्।”
आर मा़रिया़म दो उनि तुलुच् पे चाँदो गान ताहेंकाते आच् ओड़ाक्तेये रुवा़ड़ चालावेना।
जोहान बाबा़प्तिसिच्आक् जानाम
आर एलिसाबेताक् दुड़ुप् दिन तिया़क्एनताय खान, कोड़ा गिदरा़इ जानामकेदेया। आर आडेपासेरेनको आर उनिरेन पेड़ाकोको आँजोमकेदा प्रोभु दो उनि सेच् आयाक् माँयाँय माराङ आकादा मेनते; आर उनि साँवतेको रा़सका़येना।
आर इरा़ल माँहाँ हिलोक्रे गिदरा़ खातनाये ला़गित्को हेच्एना आर आच् बाबावाक् ञुतुम लेका साकारिया़को ञुमेकान ताहेंकाना। खानगे आच् गोगोय रोड़ रुवा़ड़ात्कोवा, “ओनका दो बाङा, मेनखान जोहाने ञुतुमोक्आ।”
आदोको मेतादेया, “नोनकान ञुतुमानको आमरेन पेड़ा मा बा़नुक्को चोङ।” खान आपाततेत्को इसा़रावादेया चेत् ञुतुमेये मेनजोङकाना मेनते?
आदो मित्टेन ओलोक् पाटा कोयकातेये ओलकेदा, “नुय दो जोहाने ञुतुमोक्आ।” आर जोतोको हाहाड़ायेना। आर इना़ तापतेगे मोचा झिच् गोत्एनताया आर आलाङ उलटा़उ गोत्एनताया आर इसोर सारहाव सारहावते रोरोड़े पोरतोनकेदा। आर उनकिन ओड़ाक् बेड़हायतेन जोतो होड़कोरे बोतोर पाड़ावात्कोवा आर जिहुदा़ रेयाक् गोटा बुरु दिसा़मरे नोवाको जोतो रेयाक्को गालमारावकान ताहेंकाना। आर आँजोमकेत् जोतो होड़ आकोवाक् मोनरे दिसा़ दोहोकेत्तेको मेनकेदा, नुय गिदरा़ दो एनडेखान चेले भालाय होयोक्आ? आर प्रोभुवाक् ति दो उनि साँवते ताहेंकाना।
साकारिया़ रेयाक् ना़बि काथा
आर उनिरेन आपात साकारिया़ दो सोनोत जिउतेये पेरेच्एना आर ना़बिकेत्तेये मेनकेदा।
“प्रोभु इसराएलकोरेन इसोरे सारहावकोक्मा,
ओने उनि दो आच्रेन होड़े भोरात्को आरे एम छाडावकेत्को।
आर आबो ला़गित् बाञचावक् रेयाक् दिरिञे ओमोनकेदा,
आच्रेन गुति दा़उद रेयाक् दा़हङगिरे;
आच्रेन सोनोत ना़बिकोवाक् मोचाते एतोहोप् खोने रोड़ आकात् लेका,
आबोरेन बा़इरिको खोन
आर जोतो कुरुदाबोनकानकोवाक् ति खोन बाञचावक्गे,
आबोरेन हापड़ामकोय माँयाँवाको ला़गित्, आर आयाक् सोनोत बोनदोबोसे दिसा़य ला़गित्।
ओना किरिया़, ओकाटाक् आबोरेन बाबा आबराहामे किरिया़वादे,
ओना एमाबोन ला़गित्।
जेमोन बा़इरिकोवाक् ति खोन बाञचाव आकान, बिन बोतोरते
सोनोतरे आर सा़रियाक्रे
जिवेत् जोनोमगे उनिबो सेवावाय।
आर ए बाछा, आम दो चोट उता़रिच्रेन ना़बिम बिका़उक्आ;
एनते प्रोभु मेंत्हाँ सामाङरे लाहा लाहातेम चालाक्आ
उनियाक् होरको तेयारताय ला़गित्;
उनिरेन होड़ बाञचावक् रेयाक् बुद एमाको ला़गित्।
आकोवाक् का़इको रेयाक् इका़क्ते,
आबोरेन इसोर रेयाक् माँयाँ मोन इया़ते,
ओने ओनाते आङगा मारसाल दो चोट खोने हिरिकेत्बोन।
ञुत आर गुजुक् उमुलरे दुड़ुप् आकानको मारसालाको ला़गित्,
आबोवाक् जाङगा सुलुक रेयाक् होरते आ़युरताबोन ला़गित्।”
आर उनि गिदरा़ दोए हारा इदियेना आर जिउरेये दाड़े इदियेना आर हाहाङकाररेये ताहेंयेना इसराएलको ठेन आयाक् बाहालोक् दिन आ़उरि सोदोरोक् हा़बिच्।
Santhali Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.