Santhali Project
आपोस का़मि 4:12
Verse 12 is marked below, with the whole chapter around it. Read from the start
पातरास आर जोहान माराङ बा़इसि सामाङरे
आर उनकिन दो होड़कोकिन गालमारावाको कान ताहेंकानरे नायकेको कोयजोङ ओड़ाक् पाहराकोरेन सुबेदार आर सा़दुकिको दो उनकिन ठेनको दानदानाव हेच्एना, आ़डिको एदरेयेनते दिसा़म होड़कोकिन चेत्आकोकाना आर जिसुरे गोच्को खोन जिवेत् बेरेदोक् रेयाङकिन जा़हिरेत् ताहेंकान इया़ते। आर उनकिनरे हातको लागावकेदा आर दोसार हिलोक् हा़बिच् ला़गित् हाजोतरेको दोहोकात्किना, एनते आ़युप् आकान ताहेंकाना। मेनखान काथा आँजोमकेत्को मोदरेन ढेर होड़को पा़तिया़वेना, आर हेरेल होपोनको रेयाक् लेखा दो मोंड़ें हाजार गान होयेना,
आदो दोसार हिलोक् ओनकोरेन मुखिया़को आर मुरुबिको आर सोसतोर बाडायको दो जेरुसालेमरेको जारवायेना, आर हान्नास माराङ नायके आर कायाफा, आर जोहान आलेकसानदेर आर माराङ नायके गुसटिरेन जोतोको, आर तालारे उनकिन तेङगोकेत्किनतेको कुलिकेत्किना, “ओका दाड़ेते से ओका ञुतुमते आबेन दो नोवा बेन का़मिकेदा?” उनरे पातरास दो सोनोत जिउते पेरेच्एनतेये मेतात्कोवा, ए आपे दिसा़म होड़कोरेन मुखिया़को आर मुरुबिको आ़लिञगे मित्टेन निजोर होड़रे मित्टेच् उपका़र का़मि रेयाङ तेहेञलिन कुलि ओचोक्कान खान चेत् लेकाते उनि होड़े बोगे ओचो आकाना मेनते, एनडेखान आपे सानामको आर इसराएलरेन सानाम होड़को बाडायमा, नासारेतरेन जिसु मा़सि ञुतुमते, ओने उनि आपेपे कुरुसलेदे ओकोय इसोर दो गोच्को खोने बेरेत्केदे, उनि होतेतेगे नुय होड़ दो आपे सामाङरे बोगे आकाने तेङगोवाकाना।
उनि कानगेयाय धिरि दो,
ओकाटाक् आपे ओड़ाक् बेक्नावकोपे निहा़ँत गिडिकात्, ओनागे कोनाच रेयाक् आसोलाक् होय आकाना।1
आर एटाक् जाहाँयरे बाञचाव दो बा़नुक् आनाङ एनते एटाक् ञुतुम हों बा़नुक् आनाङ सेरमा लाताररे, मानवाको तालारे एमआकानाक् ओने ओनातेबो बाञचावक्।
आदो पातरास आर जोहान ता़किनाक् दिल ञेलकाते, आर उनकिन दो बिन बिदिया़वान आर साधारोन होड़ कानाकिन मेनते बाडायकाते ओनको दोको हाहाड़ायेना, आदोको ञेल ओरोमकेत्किना़ बाङमा उनकिन होड़ दो जिसु साँवते ताहेनकान होड़ कानाकिन मेनते। आर उनि बोगे ओचोवाकान होड़ उनकिन तुलुच् तेङगोवाकानको ञेलकेदेते चेत् हों बाको रोड़ दाराम दाड़ेयादा। आदो बा़इसि खोन ओडोक हाताड़ोक्को हुकुमात्किनते आको आकोरेको ला़पा़याना। मेनकेदाको, “उनकिन होड़ दो चेत् बोन चेकाकिना? एनते मित्टेच् नामडाक चिनहा़गे उनकिन होतेते होय आकाना ओना दो जेरुसालेमरे सानाम ताहेनको ठेन सोरोसगेया, आर बाबोन बाङ दाड़ेयाक् काना। मेनखान दिसा़म होड़को तालारे नोवा बा़ड़ति आलो पासनाव इदिक्आ मेनतेबोन चेहावकिना जेमोन आर दो ओना ञुतुमते ओकोय हों आलोकिन गालमारावाको।”
आदो होहो आ़गुकातेको हुकुमात् किना जेमोन जिसु ञुतुमते दो आलोतेत्गेकिन रोड़ बाड़ाय आरकिन चेत्आको। मेनखान पातरास आर जोहान दोकिन रोड़ रुवा़ड़ात्कोवा, “इसोर बाङकाते आपेयाक्गे आँजोमतापे दो इसोर सामाङरे ठिका से बाङा ओना दो आपे बाड़े बिचा़रपे। एनते ओहोलिञ दाड़ेलेया आ़लिञलिञ ञेलआकात् आरलिञ आँजोमाकात्आक्को बाङ ला़इ दो।” खान ओनको दो आरहों बा़ड़ति चेहावकेत्किनतेको आड़ाक्कात्किना, एनते सा़जा़इकिन रेयाक् चेत् हों बाको ञामलेत्आ, होड़को इया़ते, सानाम होड़को एनते ओना होय आकानाक् इया़ते इसोरको साबासियायकान ताहेंकान, एनते उनि होड़, ओने ओकोयरे निरोपोन रेयाक् चिनहा़ होयेन, उनि दो पोन गेल सेरमा खोन बा़ड़ति उमेररेने ताहेंकाना।
पा़तिया़वाकानकोवाक् कोयजोङ
आदोकिन आड़ाक् ओचोयेन खान उनकिन दो आपनाररेनको ठेनकिन हेच्एना आरको ला़इयात्कोवा माराङ नायकेको आर मुरुबिकोको मेतात्किन ताहेंकान। आर ओनको दो ओना आँजोमकेत् खान मित् मोनते इसोर दोहायादेतेको मेनकेदा, ए प्रोभु आम ओने सेरमा आर धा़रति आर जालापुरि आर ओनाकोरे मेनाक् जोतोवाक्एम बेनाव आकात्,2 आम ओने सोनोत जिउ होतेते आलेरेन हापड़ाम, आमरेन गुति दा़उद मोचातेम रोड़लेत्, एनकाथाय,
चेत् इया़ते जिहुदि बाहरेरेनको दोको राङगावेना आर जा़तजा़तरेनको दो आ़उड़िया़क्को पोन्थाकेदा।3
धा़रतिरेन रापाजको दोको तेङगोयेना आर मुखिया़को दो मित् ठेनको जारवायेना
प्रोभु उपा़रते आर उनिरेन ओजोक्इच् उपा़रते,
एनते सा़रिगे नोवा नागराहारे आमेम ओजोक्केदे आमरेन सोनोत गुति जिसु उपा़रतेको जारवायेना, हेरोद हों आर पोनतियुस पिला़त हों, जिहुदि बाहरेरेनको आर इसराएलरेनको साँवते,4 ओना का़मिया मेनते ओका आमाक् ति आर आमाक् मोनेये निट लाहावाकात् ताहेंकान। आर नितोक् दो, ए प्रोभु, ओनकोवाक् धामकावको बेङगेत्आताकोम आर आले आमरेन गोलामको बाड़े सोहोत्आलेम, पुरा़ सोहोसाते आमाक् काथा रोड़ ला़गित्, बोगेको ला़गित् आमाक् तियेम तिया़र तुलुच् आर जेमोन चिनहा़को आर हाहाड़ावाक्को होयोक् आमरेन सोनोत गुति जिसु ञुतुमते। आदोको कोयकेत् खान ओना जायगा दो दालदालावेना, ओने ओकारेको जारवा आकान ताहेंकान आर जोतोगे सोनोत जिउतेको पेरेच्एना आर सोहोसाते इसोराक् काथाको रोड़ेत् ताहेंकाना।
पा़तिया़वाकानकोवाक् सा़झिया़ सोमपा़ति
आर पा़तिया़वाकान गादेल होड़ दो मित् मोन आर मित् जिविको ताहेंकाना आर मित् होड़ हों बाय मेनलेदा मेनाक्तायाक्को मोदरे जाहानाक्गे आपनारआक् कानताया मेनते, बिचकोम सानामाक्गे सा़झिया़ते ताहेंकानताकोवा।5 आर आपोसतोलको दो माराङ दाड़े सालाक् गोहाको एमेत् ताहेंकाना, प्रोभु जिसु मा़सिये जिवेत् बेरेत्एन रेयाक्, आर ओनको सानामकोरे दाया दो माराङगे ताहेंकाना। ओकोय टोन्टाक् होड़ हों ओनको मोदरे दो बाको ताहेंकाना, एनते तिना़क् होड़ ओत बाड़गेयान से जुमिदारको से ओड़ाक् मा़लिकको ताहेंकान, ओनको दो ओनाको आ़खरिञकेदा। आर आ़खरिञेनाक् दामको आ़गुकाते आपोसतोलकोवाक् जाङगा ठेनको दोहोयेत् ताहेंकाना, आर मिमित् होड़ जा़रुड़ाक्को लेकाको एम हा़टिञाकोकान ताहेंकाना।
आदो कुपरोस दिसा़मरेन लेबि खुँटरेन जोसेफ ओकोय दो आपोसतोलको दो बारनाबासको बाहनाकेदे, ओकाटाक् तोरजोमाते दो जिवि राड़ेच्रेन होपोन। उनि दो गोडा ताहेंकानतायते ओनाय आ़खरिञकेदा आर टाका आ़गुकाते आपोसतोलकोवाक् जाङगा ठेने दोहोकेदा।
Source notes (5)
- Cross-reference सेरे ११८:२२,२३; दानि २:३४,३५
- Cross-reference एकसो २०:११; नेहे ९:६; सेरे १४६:६
- Cross-reference सेरे २:१,२
- Cross-reference लु २३:७-११; माथ २७:१,२; जोहा १८:२८,२९
- Cross-reference आ का़ २:४४,४५
Santhali Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.