Santhali Project
आपोस का़मि 3
लेडहा होड़े बोगेयेन
आर पातरास आर जोहान दो कोयजोङ ओड़ाक्तेकिन राकाप् चालाक्कान ताहेंकाना, तारासिञ रेयाक् कोयजोङ घा़ड़िच्रे। आर एङगात कुखि खोनगे लेडहाय ताहेंकान मित् होड़को गोक् इदिकायकान ताहेंकाना, ओने उनि दिना़मगे मोजको मेताक् कोयजोङ ओड़ाक् रेयाक् पा़चरि दुवा़रा ठेनको दोहोकायकान ताहेंकाना, कोयजोङ ओड़ाक्ते बोलोक्कान होड़ ठेन कोय आ़जिजोक् ला़गित्। आर उनि दो पातरास आर जोहान कोयजोङ ओड़ाक्ते बोलोक् ला़गिदोक्काने ञेलकेत्किनते कोय ञाम ला़गित्ए नेहोंरात्किना मेनखान पातरास दो जोहान तुलुच् उनि बेङगेत् उरिच्आदेतेये मेनकेदा, “आ़लिञ सेच् बेङगेदमे।” उनि दो उनकिन ठेन खोन जाहानाक् ञाम आसतेये कोयोक् राकाप्आत्किना। खान पातरासे मेनकेदा, “बा़नुक्तिञा रुपा़ आर सोना दो मेनखान ओका मेनाक्तिञा ओनाञ एमाम काना, नासारेतरेन जिसु मा़सि ञुतुमते मा ताड़ाममे।” आर जोजोम ति साप्केदेतेये बेरेत् केदेया। खानगे उनियाक् जाङगा आर ठोड़ें दो केटेच् गोत्एनताया। आर दोन बेरेत्एनतेये तेङगोयेना आरे दाँड़ाँ बाड़ाकेदा। आर उनकिन तुलुच् कोयजोङ ओड़ाक्तेये बोलोयेना ताड़ाम ताड़ामते आर दोन दोनते आर इसोर सारहावाते आर सानाम होड़ उनिको ञेल केदेया, दाँड़ाँ बाड़ायकान आर इसोर सारहावेदेकान, आरको ओरोम केदेया, बाङमा उनि कानगेयाय ओने उनि कोय ञाम ला़गित् कोयजोङ ओड़ाक् रेयाक् मोज दुवा़रा ठेन दुड़ुप् आकाने ताहेनकान ताहेंकाना, आर उनिरे होयेनाक् इया़ते थारबासाव आरको ठाक एना।
कोयजोङ ओड़ाक्रे पातरासाक् गालमाराव
आर उनि दो पातरास आर जोहाने झुटिया़उ आकात्किन ताहेंकानरे, जोतो होड़ ओनको ठेनको ञिर जारवायेना, थारबासाव चाबावाकान, सुलेमानाक्को मेताक् पिंडा़रे आर पातरास ओनाय ञेलकेत् खान ओनको होड़े रोड़ रुवा़ड़ात्कोवा, ए इसराएलरेन होड़को चाक्पे हाहाड़ाक् काना नोवा रेयाङ दो? से चाक्पे बेङगेत् उरिच् आ़लिञ काना, आपनार दाड़े से आपनाराक् इसोर भोकतिते नुयलिञ ताड़ाम ओचोकेदे लेका? आबराहामरेन इसोर आर इसाहाकरेन इसोर आर जाकोबरेन इसोर, आबोरेन हापड़ामकोरेन इसोरगे आच्रेन गुति जिसुइ ठोनोक ओचोआकादेया, ओने ओकोय आपेपे सोपरोतकेदे आर पिला़त सामाङरेपे बाङकेदे उनि दो आड़ाक्काय ला़गित्ए निटलेत्रे हों,1 मेनखान आपे दो उनि सोनोतिच् आर भागेयिच्पे बाङ केदेया, आरपे खोजकेदा मित्टेन खुनिया़ँहि दान लेकातेये एमापेया मेनते।2 आर जियोनरेन मा़लिक दोपे गोच् केदेया ओने ओकोय इसोर दो गोच्को खोने बेरेत्केदे ओने ओना रेयाक्गे आले दोले गोहाको कान। आर नुयपे ञेले आरपे बाडायेदेकान होड़ दो उनियाक् ञुतुमगेये दाड़े ओचोकेदेया, जिसुवाक् ञुतुमरे पा़तिया़उक् इया़ते, हें उनि होतेतेयाक् पा़तिया़उगे नोवा पुरा़ निरोपोन दोए एमआकावादेया आपे जोतोको सामाङरे।
आदो ए बोयहाको बाडायगेया़ञ बिन बाडायतेपे ओनकालेदा मेनते चेत् लेका आपेरेन मुखिया़को हों। मेनखान इसोर दो ओकाको सानाम ना़बिको मोचातेये जा़हिर लाहालेत् ताहेंकान उनिरेन मा़सि दुके जोमा मेनते नोक्ओंय नोनकातेये पुरा़उकेदा। ओनाते मोन आ़चुरतापे, आ़चुर रुवा़ड़ोक्पे आपेयाक् का़इको मेटावक्आ मेनते। जेमोन प्रोभु ठेन खोन रा़सका़ रेयाक् ओकतेको हिजुक्, आर जेमोन आपे ला़गित् निट आकादे मा़सिये कोले, जिसुगे। ओने ओकोय सेरमारे ताहेन दो जा़रुड़कान सानामाक्को आ़उरि तेङगो रुवा़ड़ोक् ओकते हा़बिच्। ओने ओनाको रेयाङ इसोर दो जुग खोनको ताहेंकान आच्रेन सोनोत ना़बिको मोचातेये रोड़ आकात्। मोसे दोए मेनलेत्गेया एनकाथाय प्रोभु इसोर दो आपेरेन बोयहाको मोद खोन मित्टेन ना़बिये तेङगोवापेया, इञ लेकानिच्गे उनियाक्पे आँजोमताया, सानामाक् ओकाकोय गालमारावापे।3 आर नोनका होयोक्आ उनि ना़बि रेयाक् बाय आँजोमताय मित्के मित् होड़ दो दिसा़म होड़को ताला खोने माराव उता़रोक्आ।4 आर सानाम ना़बिकोगे सामुएल आर उनि तायोमतेनको खोन तिना़क्को रोड़ाकात्, ओनको हों नोवाको दिन रेयाक्को जा़हिर आकादा। आपेगे ना़बिकोरेन होपोनको कानापे आर ओना बोनदोबोसरेन, ओने ओकाटाक् इसोर दो आपेरेन हापड़ामको तुलुच्ए बाँधावकेत्, आबराहामे मेतादेरे, आर आम बोंसरेन होतेतेगे धा़रतिरेन सानाम गुसटिको भोरानकोको होयोक्आ।5 आपे ठेन इसोर दो आच्रेन गुति तेङगोकेदेतेये कोल केदेया भोरापे ला़गित् आपे मित्के मित् होड़ आपेयाक् बा़ड़िच्आक्को खोनपे आ़चुरोक्ते।
Source notes (5)
- Cross-reference एकसो ३:१५
- Cross-reference माथ 2७:१५-२३; मा़र १५:५-१४; लु २३:१३-२३; जोहा १९:१२-१५
- Cross-reference देउ १८:१५,१८
- Cross-reference देउ १८:१९; लेबि २३:२९
- Cross-reference जेने १२:३; १८:१८; २२:१८; २६:४
Santhali Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.