1. Samuilo 28

O Saul thaj e Samuilesko duho

1Ande godoja vrjama e Filistejcurja ćidine e vojska te napadnin e Izraelcen.

O Ahiš phendas e Davidešće: “Moraš te džanes kaj tu thaj ćire manuša džana ando rato manca thaj mungre vojskasa.”

2O David phendas: “Akana vi uverija tu korkoro sa so šaj ćiro sluga.”

O Ahiš pe godova phendas lešće: “Lačhe, čhava tut te aves mungro stalno čuvari.”

3Kana mulo o Samuilo, sasto Izrael tuguilas pale leste, pa prahosardine les ande lesko gav ande Rama. Ali majsigo nego so o Samuilo mulo, o Saul andar e phuv trada sa e vračaren thaj okolen save akharenas e duhonen.

4E Filistejcurja ćidine pe palo rato thaj utaborisajle ando Šunem, a o Saul ćida sa e Izraelcen pa utaborisajle ande Gilboa. 5Kana o Saul dikhla e filistejsko vojska, darajlo gajda kaj lesko ilo izdraja e daratar. 6O Saul phučla e GOSPODE palo savet, ali o GOSPOD či odgovorisarda lešće ni prekal o suno, ni prekal e rašaja, ni prekal e prorokurja.

7Zato o Saul phendas pire službenikonenđe: “Araćhen manđe varesave manušnja savi akharel e duhonen, te džav late thaj phučav palo savet.”

Phendine lešće: “Si jek ando Endor.”

8Godoja rjat o Saul ćerda pe kaj si vareko aver, gajda kaj lija peste aver drze. Askal vo thaj još duj džene đele ke godoja manušnji.

Vo phendas laće: “Akhar manđe e duho te saznajiv so avela, akhar okoles kasko alav phenav tuće.”

9Ali e manušnji phendas lešće: “Valda džanes so o Saul ćerda, kaj trada andar e phuv sa e vračaren thaj okolen kaj akharenas e duhonen. Sostar čhos manđe zamka te avav mudardi?”

10Askal o Saul hala laće solah e GOSPODEJA: “Hav solah e džude GOSPODEJA, pale akava či aveja kaznime.”

11E manušnji pe godova phučla les: “Kas te akharav tuće?”

A vo phendas: “Akhar manđe e Samuile.”

12Kana e manušnji dikhla e Samuile, čhuta muj andar o sasto glaso thaj phendas e Saulešće: “Sostar hohadan man? Pa tu san o Saul!”

13O caro phendas laće: “Na dara. So dićhes?”

E manušnji phendas: “Dikhav e duho savo inkljel andar e phuv.”

14Vo phučla: “Sar izgledil?”

Voj phendas: “Inkljel o phuro manuš ogrnime e plaštosa.”

O Saul askal džangla kaj si godova o Samuilo, pa dija koča thaj poklonisajlo e mujesa dži ke phuv.

15O Samuilo phučla e Saule: “Sostar uznemirisardan man thaj akhardan man?”

O Saul phendas: “Ande bari nevolja sem. E Filistejcurja ratujin protiv mande, a o Del bolda pe mandar. Majbut či odgovoril manđe ni prekal e prorokurja ni prekal e sune, pa akhardem tut te phenes manđe so te ćerav.”

16O Samuilo phendas: “Sostar phučes man, akana kana o GOSPOD bolda pe tutar thaj postanisardas ćiro dušmano? 17O GOSPOD ćerda okova so phendas prekal mande. Lijas tutar o carstvo thaj dija les jećhešće katar ćire pašutne, e Davidešće. 18Pošto či čhutan kan ko GOSPOD thaj či pherdan lešći osveta pe Amalečanurja. Zato o GOSPOD ađes ćerel tuće akava. 19O GOSPOD e Izraelcen thaj vi tut predaila ande vas e Filistejenđe, a thejara tu thaj ćire čhave avena manca. O GOSPOD vi e izraelsko vojska predaila ande vas e Filistejenđe.”

20Isto časo o Saul haradilo pe phuv kozom si lungo e daratar katar e Samuilešće alava. A hasardas vi e snaga, kaj khanči či hala sasto đes thaj sasti rjat.

21Kana godoja manušnji nakhli dži ko Saul thaj dikhla kaj si pherdo dar, phendas lešće: “Ake, me, ćiri sluškinja, čhutem kan tute. Čhutem mungro trajo pe kocka thaj ćerdem okova so phendan manđe. 22Zato akana tu čho kan mande thaj muk te dav tut vareso te has sar avilosas tut snaga palo drom.”

23Vo odbisarda lat e alavenca: “Či kamav te hav.”

Ali sar lešće sluge thaj e manušnji navalisardine pe leste te hal, čhuta kan lende pa uštilo katar e phuv thaj bešlo po kreveto.

24E manušnja sas ugojime guruv, saves odma dija čhurjasa. Lijas vi aro, šukljarda les bi kvascosko thaj pekla mangro. 25Askal godova inkalda anglo Saul thaj lešće sluge, pa haline. Isto godoja rat vazdine pe thaj đeletar.