1. Samuilo 27

O David maškar e Filistejcurja

1O David gindilas ande peste: “Ipak jek đes o Saul mudarela man. Avilosas majlačhe te našav ande phuv e Filistejenđi. Gajda o Saul majbut či rodela man ande sasti Izraelsko phuv thaj gajda spasiva man katar lesko vas.”

2Gajda vo thaj okola šov šela manuša đele ando Gat ko caro Ahiš, e Moahesko čhavo. 3O David thaj lešće manuša đele te trajin pire familijenca ko Ahiš ando Gat. E Davideja sas lešće duje romnja, e Ahinoama andar o Jizreel thaj e Avigajila, e Navalešće udovicava, andar o Karmel. 4Kana e Saulešće phendine kaj o David našlo ando Gat, majbut či rodelas les.

5O David phendas e Ahišešće: “Ako arakhlem milost ande ćire jakha, de man than ande varesave katar ćire gava kaj šaj đelemas te trajiv. Sostar te ćiro sluga trajil tusa ando carsko gav?”

6Gajda godova đes o Ahiš dija les o gav Ciklag, savo katar askal pripadil e caronenđe andar e Juda. 7O David trajisarda ande Filistejenđi phuv jek brš thaj štar čhon.

8O David thaj lešće manuša džanas te pljačkin e Gešurcen, Gizrijancen thaj e Amalečanen, save katar e purani vrjama bešenas ande phuv katar o Šur pa sa dži ko Egipat. 9Kana o David napadnisardas varesavo krajo, či muklasas po trajo ni e manušen ni e manušnjen, a lelas e bakhren, thaj e guruven, e magarcen, e kamilen thaj e drze. Askal boldelas pe palpale ko Ahiš.

10Kana o Ahiš phučlas e Davide: “Kaj sanas ađes ande pljačka?”, o David phendasas: “Semas ando južno deo e Judako”, ili: “Po jugo kaj trajin o Jerahmeelcurja”, ili: “Ande pustinja kaj trajin e Kenejcurja.”

11O David či mućelas po trajo ni e manušen ni e manušnjen, te vareko lendar či avilosas ando Gat thaj mothodasas e Ahišešće so vo thaj lešće manuša vi čače ćeren. Gajda ćerelas sasti vrjama dok trajilas ande phuv e Filistejenđi.

12O Ahiš paćalas e Davidešće thaj gindilas: “Lesko them o Izrael zurale mrzil les. Zato pale uvek služila manđe.”