1. Samuilo 29

E filistejske zapovednikurja či prihvatin e Davide

1E Filistejcurja ćidine sasti piri vojska ko Afek, a e Izraelcurja utaborisajle ko izvor ando Jizreel. 2Dok e filistejske vladarja džanas po čikat angle piri vojska, savi sas podelime ande čete po šel thaj po milja, o David thaj lešće manuša džanas palal e Ahišesa.

3E filistejske zapovednikurja pučline: “So ćeren akala Hebreja akate?”

O Ahiš phendas: “Godova si o David, savo sas sluga katar o izraelsko caro Saul. Mande si majbut katar jek brš, a katar o đes kana našlo thaj dži ađes, či arakhlem kaj ćerda vareso bilaćhe.”

4Ali e filistejske zapovednikurja holajle po Ahiš thaj phendine: “Bolde les. Neka boldel pe ando than savo dijan les te trajil. Či tromal amenca ande borba, te na boldel pe protiv amende. Sar šaj majlačhe te boldel e naklonost katar piro gospodari, nego gajda kaj čhinela e šore amare vojnikonenđe? 5Zar godova naj okova David pale savo ando ćhelipe đilabenas:

‘O Saul mudardas pe milje,

a o David pe deše milje’?”

6Askal o Ahiš akhardas e Davide thaj phendas lešće: “Dav man solah ando džudo GOSPOD, čestito san thaj drago si manđe kaj služis ande mungri vojska. Sar avilan mande dži ađes, či arakhlem kaj ćerdan vareso bilačhe, ali e aver filistejske vladarenđe naj san pe volja. 7Zato bolde tut thaj dža ando miro. Na ćer khanči so holjardasas e filistejske vladaren.”

8O David phučla les: “So ćerdem? Čefal doš arakhlan manđe sar avilem tute dži ađes? Sostar našti džav te boriv man protiv e dušmaja mungre gospodarešće carošće?”

9O Ahiš phendas e Davidešće: “Ande mungre jakha san lačho sago o anđeo e Devlesko. Ali e filistejske zapovednikurja phendine kaj našti džas amenca ande borba. 10Zato thejara ušti rano ćire gospodarešće slugenca save avile tusa thaj džatar čim đesavol.”

11Gajda o David thaj lešće manuša uštiline rano ande detharin thaj boldine pe ande filistejsko phuv, a e Filistejcurja đeline opre ando Jizreel.