Akhàt Tơviãq Pơnuaĩq Dơđỡuq 19

1Hadơi dơgrữq vruãq nữn, hlãq hmỡq sãp drưh yơu sãp đơp prõng dơlãp sa tơpuôl mơnuĩh lũ viãq pãq dlòc lơngĩq, làiq:

“Ha-le-lu-ja!

Kaya dõc pơ-tlah, kaya gơhluh sì gơnuar chơnuãq pơweh pa Yàc Pô Lơngĩq pơnõq drơi,

2kơyua dơgrữq kaya chahrơna Pitrai hũ la tơpãq viãq sì tơpãq rĩng,

kơyua Pitrai song chahrơna mơnuĩh kamơi drì drõc

nữn la mơnuĩh ngãq ga iãh sàq voh hlùq nữn mưng kaya lơđãp ngãq drì drõc nhũ hũ.

Pitrai song yơr đồq tơngãn ga dơrãh dơgrữq mơnuĩh halỗt mơnãq Pitrai hũ

mưng tơngãn nhũ.”

3Vloh pơnõq nhũ đơp bãc dua, làiq:

“Ha-le-lu-ja!

Asãq mưng anĩh nhũ miẽt por tơgùq tãl trôh gãm gãm, ôh luôĩq.”

4Dua plôh pàq aràc mơnuĩh pô tơha sì pàq drơi anàq asỡq vơviar rùp trỗt sì duh talơvãt Yàc Pô Lơngĩq, Pitao ãn dòq guh pãq dlòc sơvan, làiq:

“A-men. Ha-le-lu-ja!”

5Sa sãp đơp mưng sơvan đơp tơviãq, làiq:

“Iỡuq sơ-uỗt mơyòp Yàc Pô Lơngĩq pơnõq drơi,

ơ avih dơgrữq mơnuĩh halỗt mơnãq Pitrai,

sì dơgrữq mơnuĩh duh huaĩq Pitrai,

mơnuĩh lơđeh tìt gãm sì mơnuĩh prõng!”

6Vloh hlãq hmỡq sãp đơp ngãq yơu mơnhĩ dơnai tơpuôl mơnuĩh lũ viãq, drưh yơu yuà ia lũ chroh đuaĩq, sì drưh yơu suà grĩm prõng, làiq:

“Ha-le-lu-ja!

Kơyua Yàc la Yàc Pô Lơngĩq pơnõq drơi hũ, nữn la Pitao Gơnuar Chơnuãq, apãt akõq.

7Pơnõq drơi iỡuq uỗt sơh, sơh sơr,

sì padỡc tơgùq kaya gơhluh ga Pitrai

kơyua adãt bõc pa-khiãng Avo Anàq song trôh,

sì sơdiuq Pitrai hũ song rơchãc pơkhrà lơĩh rùp drơi,

8kaya hũ vrơi ga nai nữn la nai chồq ao mưng

pơcha lơmuỡn sơdah blãc sì sơđah sơchih”

(Kơyua pơcha lơmuỡn la dơgrữq vruãq ngãq tơpãq dãng mơnuĩh gơnuar pơđar sơđah hũ).

9Vloh mơnuĩh gơnrơh đơp sì hlãq: “Iỡuq wãq vẽq: Lơngai ga dơgrữq mơnuĩh hũ iơu jàq tơma dòq guh dơlãp harơi adãt bõc pơhuãq Avo Anàq.” Mơnuĩh nữn kung đơp sì hlãq: “Nĩ la dơgrữq pơnuaĩq tơpãq viãq Yàc Pô Lơngĩq hũ.” 10Hlãq pơviar rùp pãq ala tơkai mơnuĩh gơnrơh nữn pioh duh talơvãt nhũ, nữn nhũ đơp sì hlãq: “Juơi ngãq yơu nữn! Kơu kung la mơnuĩh halỗt mơnãq yơu hã sì dơgrữq pơnõq adơi sơai hã hũ, la dơgrữq mơnuĩh hũ pơnuaĩq ngãq chưng mưng Yàc Je-su. Iỡuq duh talơvãt Yàc Pô Lơngĩq, kơyua pơnuaĩq ngãq chưng mưng Yàc Je-su nữn la vơngãq hatai pơnuaĩq đơp hwơr hũ.”

11Vloh hlãq bôh lơngĩq pơh tơviãq, sì iãq dih, sa drơi anàq ơseh kòq, sì Pitao đìq pãq dlòc nhũ hũ iơu angãn la tui tơpãq sì tơpãq viãq, Pitrai chahrơna sì mơsôh kalìt tui pơnuaĩq tơpãq dãng. 12Mơta Pitrai drưh yơu dơlãh apôi, lũ kaya chrang mữh pãq dlòc akõq Pitrai, hũ sa angãn hũ wãq nữn ôh asơi thơu lơniãu rùp phuỗt Pitrai. 13Pitrai chồq sa vlah ao ơtah irũq dơlãp dơrãh, sì angãn Pitrai hũ iơu la Pơnuaĩq Yàc Pô Lơngĩq hũ. 14Dơgrữq tơpuôl lĩng pãq dlòc lơngĩq nao tui Pitrai pãq dlòc ơseh kòq, chồq pơcha lơmuỡn kòq sì sơđah sơchih. 15Sa bẽq đao hluỡq tơviãq mưng mơvah Pitrai, pioh nhũ sì Pitrai poh dơgrữq palơi lơgar, vloh Pitrai ròq apãt akõq pơnõq nhũ mưng gai mơjrà pasơi, sì Pitrai juãq thũng gơlìq alãc vuh kaya ơnõc mơvai prõng Yàc Pô Lơngĩq hũ, Pitao Gơnuar Chơnuãq. 16Pitrai hũ sa angãn wãq pãq dlòc ao ơtah sì pãq dlòc pha Pitrai: “Pitao dơgrữq pitao sì Yàc dơgrữq yàc.”

17Vloh hlãq bôh sa aràc mơnuĩh gơnrơh dòq dữc dơlãp ia harơi, sì nhũ nữn driãu sa sãp prõng, đơp sigỡuq sì avih dơgrữq pơjẽh anàq chĩp ãn por pãq dlòc lơngĩq, làiq: “Trôh pãq đĩ vẽq, iỡuq pơtõm dơlãp harơi pa-khiãng prõng Yàc Pô Lơngĩq hũ, 18pioh bõc rơlo dơgrữq pitao, rơlo dơgrữq pô apãt akõq prõng, rơlo dơgrữq mơnuĩh prãn khãc, rơlo tơpuôl ơseh sì mơnuĩh lĩng đìq pãq dlòc tơpuôl nhũ, sigỡuq sì rơlo dơgrữq mơnuĩh, gãm mơnuĩh lơnang lơnai sì mơnuĩh ngãq halỗt mơnãq, gãm mơnuĩh lơđeh tìt gãm sì mơnuĩh prõng.”

19Patui nữn, hlãq bôh anàq asỡq sì dơgrữq pitao pãq dlòc voh hlùq sigỡuq sì tơpuôl lĩng pơnõq nhũ nữn pơtõm gỡuq wỡq pioh mơsôh ơtòc sì Pitao đìq pãq dlòc ơseh sigỡuq sì tơpuôl lĩng Pitrai hũ. 20Vloh anàq asỡq kađòc mãq krỡq, sigỡuq sì nhũ la mơnuĩh gơnuar hwơr vlữq lor, mơnuĩh nữn ngãq di anãq nhũ dơgrữq kaya nỡm krơi tơmo, gơnang mưng nữn sì nhũ pa-gơla dơgrữq mơnuĩh song tồq mãq nỡm anàq asỡq sì dơgrữq mơnuĩh duh talơvãt rùp rãp nhũ. Avih dua aràc pơnõq nhũ ãn hadiuq kađòc prah tơma dơlãp lơvàc apôi chôh sigỡuq sì apôi kadir. 21Katih dòq wỡq dơlãp tơpuôl nhũ nữn kađòc pa-mơtai kơyua mưng đao thõc Pitao đìq pãq dlòc ơseh, nữn la đao thõc tơviãq mưng mơvah Pitrai, sì avih dơgrữq anàq chĩp hũ bõc tarơi kơyua mưng rơlo tơpuôl nhũ.