Akhàt Tơviãq Pơnuaĩq Dơđỡuq 20

1Vloh hlãq bôh sa aràc mơnuĩh gơnrơh mưng dlòc lơngĩq trỗt, apãt anàq tlir thòc dơlãp ôh hũ tơkai sì sa dãc talơi srẽng prõng dơlãp tơngãn nhũ. 2Nhũ mãq anàq grai, nữn la anàq ala mưng rài sơđãq, nữn la kamlai, hẽla Sa-tan, vloh akãq nhũ wỡq dơlãp sa rơvơu thũt. 3Mơnuĩh gơnrơh prah nhũ tơma dơlãp thòc ôh hũ tơkai, vloh krỡq sì tap-ban-kiq nhũ, tồq ga nhũ ôh dòq nao pa-gơla dơgrữq lơgar tơra tãl trôh tũq sa rơvơu thũt ròq wil tãl. Hadơi nữn, nhũ iỡuq pơlao tơviãq dơlãp sa asĩt tũq jơ.

4Vloh hlãq bôh dơgrữq sơvan sigỡuq sì dơgrữq mơnuĩh dòq guh pãq dlòc đỡn, sì gơnuar chahrơna hũ alĩn vrơi ga pơnõq nhũ, gãm vơngãq yuà dơgrữq mơnuĩh song kađòc koh akõq kơyua ngãq chưng mưng Yàc Je-su sì kơyua mưng pơnuaĩq Yàc Pô Lơngĩq gãm sì avih dơgrữq mơnuĩh halơi ôh duh talơvãt anàq asỡq hẽla rùp rãp nhũ hũ, kung ôh tồq mãq kaya nỡm nhũ hũ pãq dlòc thơi hẽla pãq tơngãn, pơnõq nhũ hadiuq wỡq sì apãt akõq sigỡuq sì Yàc Dõc Pơ-tlah dơlãp sa rơvơu thũt. 5(Katih dòq wỡq dơlãp dơgrữq mơnuĩh mơtai nữn ôh hũ hadiuq wỡq tãl trôh tũq avih sa rơvơu thũt.) Nữn la kaya hadiuq wỡq bãc sa. 6Lơngai viãq sì sơđah viãq ga mơnuĩh halơi hũ vơnah dơlãp kaya hadiuq wỡq bãc sa! Kaya mơtai bãc dua ôh hũ gơnuar hagĩq pãq dlòc dơgrữq mơnuĩh nữn, nữn pơnõq nhũ ròq la mơnuĩh pioh kaya duh talơvãt Yàc Pô Lơngĩq hũ sì Yàc Dõc Pơ-tlah hũ, sì ròq apãt akõq sigỡuq sì Pitrai dơlãp sa rơvơu thũt.

7Vloh dơlãp tũq tãl sa rơvơu thũt, Sa-tan ròq hũ pơlao tơviãq mưng lơvàc krỡq nhũ hũ, 8vloh nhũ ròq tơviãq nao pa-gơla dơgrữq lơgar dòq pàq gah voh hlùq, vual vơla Got sì vual vơla Ma-got, pioh iơu pơtõm tơpuôl nhũ wỡq nữn nao mơsôh ơtòc. Katih tơpuôl nhũ lũ yơu choah pãq tơsìq. 9Tơpuôl nhũ va nao vãq avih anĩh pãq dlòc voh hlùq sì wàc tòp dar tlam dơgrữq mơnuĩh gơnuar sơđah hũ sigỡuq sì palơi prõng anĩt duman, nữn apôi mưng dlòc lơngĩq trỗt sì chôh gơhuar avih tơpuôl nhũ. 10Vloh kamlai, la mơnuĩh pa-gơla pơnõq nhũ, ãt prah tơma dơlãp lơvàc apôi sì kadir, nữn anàq asỡq sigỡuq sì mơnuĩh gơnuar hwơr vlữq lor dòq pãq đỡn, sì tơpuôl nhũ ròq kađòc dleh dlàr pơđìq pơđua harơi gãm sì mơlãp tãl trôh gãm gãm, ôh luôĩq.

11Patui nữn, hlãq bôh sa voh sơvan kòq prõng sì Pitao dòq guh pãq dlòc sơvan, voh hlùq sì lơngĩq đuaĩq dỡuq tlah mưng kaya bôh tơviãq Pitrai hũ, nữn ôh hũ anĩh halơi pioh luơi ga pơnõq nhũ. 12Vloh hlãq bôh dơgrữq mơnuĩh mơtai, gãm mơnuĩh prõng sì mơnuĩh lơđeh tìt, dòq dữc pãq anãq sơvan, sì dơgrữq pỗc sơrãq hũ pơh tơviãq, vloh sa pỗc sơrãq tơmo hũ pơh tơviãq, nữn la Sơrãq Kaya Hadiuq. Mơnuĩh mơtai kađòc chahrơna tui yơu dơgrữq kaya hũ wãq wỡq dơlãp dơgrữq sơrãq nữn, tui yơu dơgrữq vruãq pơnõq nhũ ngãq. 13Tơsìq va pơjao wỡq dơgrữq mơnuĩh mơtai dơlãp ia tơsìq. Kaya mơtai sì tơnãh ala va pơjao wỡq dơgrữq mơnuĩh mơtai dơlãp anĩh nhũ, sì avih tãl aràc dơlãp tơpuôl nhũ kađòc chahrơna tui yơu dơgrữq vruãq pơnõq nhũ ngãq. 14Dòq kaya mơtai sì tơnãh ala kađòc prah tơma dơlãp lơvàc apôi. Nĩ la kaya mơtai bãc dua — nữn la lơvàc apôi. 15Mơyah làiq angãn mơnuĩh halơi kađòc iãq ôh hũ wãq dơlãp Sơrãq Kaya Hadiuq, nữn mơnuĩh nữn kađòc prah tơma dơlãp lơvàc apôi.