Akhàt Tơviãq Pơnuaĩq Dơđỡuq 21

1Patui nữn, hlãq bôh lơngĩq vơhrơu sì tơnãh vơhrơu, kơyua lơngĩq bãc sa sì tơnãh bãc sa ròq nao gãt, sì ia tơsìq nữn ôh dòq tơra. 2Vloh hlãq bôh palơi prõng sơđah, nữn la Je-ru-sa-lem vơhrơu, trỗt mưng Yàc Pô Lơngĩq pãq dlòc lơngĩq, hũ rơchãc pơkhrà yơu sa aràc mơnuĩh sơdiuq vơhrơu pơkhrà rùp ga vơsàc nhũ. 3Hlãq hmỡq sa sãp đơp prõng mưng sơvan, làiq: “Iãq dih! Tlam padưh Yàc Pô Lơngĩq hũ dòq sigỡuq sì anàq mơnuĩh, sì Pitrai ròq hadiuq sì pơnõq nhũ, sì pơnõq nhũ ròq ngãq vual vơla Pitrai, sì rùp phuỗt Yàc Pô Lơngĩq ròq dòq sì pơnõq nhũ. 4Pitrai ròq uãq avih ia mơta tlah mưng mơta pơnõq nhũ, sì kaya mơtai ròq ôh dòq tơra, kung ôh dòq ka-ồq ka-iãp, hẽla sia chõq, hẽla pơđìq pơđua. Dơgrữq kaya nữn ròq ôh dòq tơra; kơyua dơgrữq vruãq halơu thrơi song nao gãt vloh.” 5Vloh Pitao dòq guh pãq dlòc sơvan đơp: “Iãq dih! Kơu song ngãq vơhrơu avih dơgrữq kaya.” Pitrai kung đơp sì hlãq: “Iỡuq wãq wỡq kơyua dơgrữq pơnuaĩq nĩ la đang mang chàc gơnang sì tơpãq viãq.” 6Pitrai kung đơp sì hlãq: “Dơgrữq vruãq nữn ròq ngãq vloh! Kơu la AL-PHA sì Ô-ME-GA, la pơdòq chơmrờp sì luôĩq hadơi. Mơnuĩh halơi mơhao ia, Kơu ròq vrơi mơnhũm soh mưng chroh ia kaya hadiuq. 7Mơnuĩh halơi hũ pha rlao ròq hũ tồq mãq dơgrữq kaya nĩ, sì Kơu ròq la Yàc Pô Lơngĩq nhũ hũ, dòq nhũ ròq la anàq kơu. 8Nữn dòq vơnah dơgrữq mơnuĩh ôh chãc khĩn, mơnuĩh ôh tui tơpãq, mơnuĩh đang mang kir amir, mơnuĩh pa-mơtai mơnuĩh, mơnuĩh drì drõc, mơnuĩh ngãq kaya jũh proh, mơnuĩh duh talơvãt rùp rãp, sigỡuq sì dơgrữq mơnuĩh vlữq lor, nữn anĩh dòq tơpuôl nhũ la dơlãp lơvàc hũ chôh mưng apôi sì kadir, sì nữn la kaya mơtai bãc dua.”

9Vloh hũ sa aràc dơlãp tơjuh aràc mơnuĩh gơnrơh trôh, la mưng dơgrữq mơnuĩh hũ tơjuh voh chơwàt vuh vãq tơjuh kaya rũc rài luôĩq hadơi, sì mơnuĩh gơnrơh nữn đơp sì hlãq, làiq: “Iỡuq trôh pãq đĩ, hlãq ròq vrơi ga sơai bôh sơdiuq kamơi, nữn la sơdiuq Avo Anàq hũ.” 10Pơtui nữn, nhũ va hlãq nao dơlãp Yàc vơngãq Sơđah trôh pãq bò chỡq prõng sì dloòng, vloh pơto ga hlãq palơi prõng Je-ru-sa-lem trỗt mưng anĩh Yàc Pô Lơngĩq, 11hũ kaya gơhluh Yàc Pô Lơngĩq, sì hũ kaya sơdah chràq palơi prõng nữn drưh yơu gar patơu màc, yơu patơu kràc sơdah ngãq yơu chai kràc, 12palơi nữn hũ jơnãng prõng sì dloòng, hũ sa plôh dua sơvòq bãc sigỡuq sì sa plôh dua aràc mơnuĩh gơnrơh dòq pãq dơgrữq sơvòq bãc, sì dơgrữq angãn hũ wãq pãq dlòc sơvòq bãc, nữn la angãn sa plôh dua apõc pơtiàt anàq tơcho Is-ra-el hũ. 13Tlơu voh sơvòq bãc dòq gah ia harơi tơgùq, tlơu voh sơvòq bãc dòq gah prang, tlơu voh sơvòq bãc dòq gah prìq, sì tlơu voh sơvòq bãc dòq gah ia halơi tơma. 14Jơnãng palơi hũ sa plôh dua voh rơnỡq, pãq dlòc đỡn la sa plôh dua angãn sa plôh dua aràc mơnuĩh gơnuar pơđar Avo Anàq hũ. 15Mơnuĩh gơnrơh ãn đơp sì hlãq hũ sa bẽq gai sơnua dũq ngãq mưng mữh pioh nhũ pơlih dũq palơi prõng, dơgrữq sơvòq bãc palơi sì jơnãng palơi. 16Palơi hũ ngãq padỡc pàq gah rĩng gỡuq, gah ơtah palơi prõng rĩng gah lơnang palơi. Mơnuĩh gơnrơh nữn dũq palơi mưng gai sơnua, hũ sa plôh dua rơvơu ech-ta-đơ: Gah ơtah, gah lơnang sì gah dloòng palơi la rĩng gỡuq. 17Nhũ kung dũq jơnãng palơi, jơnãng kơpar sa rơtôh pàq plôh pàq ku-đe tui yơu sơnua dũq anàq mơnuĩh hũ (nữn kung la sơnua dũq mơnuĩh gơnrơh hũ). 18Kaya ngãq jơnãng palơi la ngãq mưng patơu kràc sơdah, dòq palơi prõng nữn ngãq mưng mữh viãq, drưh yơu chai krơh sơdah. 19Dơgrữq rơnỡq jơnãng palơi prõng nữn hũ pơkhrà ngãq mưng lũ dơgrữq patơu màc. Rơnỡq bãc sa ngãq mưng patơu kràc sơdah, rơnỡq bãc dua ngãq mưng patơu màc lơngãt, rơnỡq bãc tlơu la patơu màc phũrn, rơnỡq bãc pàq la patơu màc la-ngơu hlàq kayơu, 20rơnỡq bãc lơmã ngãq mưng patơu akẽq mơriãh, rơnỡq bãc nãm ngãq mưng patơu màc akẽq, rơnỡq bãc tơjuh ngãq mưng patơu màc gơchràq, rơnỡq bãc talơpãn ngãq mưng patơu akẽq la-ngơu, rơnỡq bãc salơpãn ngãq mưng patơu akẽq phũrn, rơnỡq bãc sa plôh ngãq mưng patơu akẽq la-ngơu tali, rơnỡq bãc sa plôh sa ngãq mưng patơu màc akẽq phũrn, sì rơnỡq sa plôh dua ngãq mưng patơu màc akẽq lơngãt. 21Sa plôh dua voh sơvòq bãc prõng la sa plôh dua gar patơu kràc; pơweh sì dơgrữq voh sơvòq bãc palơi nữn ngãq tơviãq mưng sa gar patơu kràc sa-khũc prõng, dòq jơlàt dơlãp palơi prõng ngãq mưng mữh viãq, sơđah drưh yơu chai krơh. 22Hlãq ôh bôh hũ sàc duh talơvãt halơi dơlãp palơi prõng, kơyua Yàc la Yàc Pô Lơngĩq, Pitao Gơnuar Chơnuãq sigỡuq sì Avo Anàq la sàc duh talơvãt palơi prõng hũ. 23Palơi ôh chàc hũ ia harơi hẽla ia vlàt pioh pơsàc sơdah ga palơi, kơyua kaya gơhluh Yàc Pô Lơngĩq pơsàc sơdah palơi prõng, dòq druãi apôi đeng palơi prõng hũ la Avo anàq. 24Dơgrữq vual vơla ròq nao mai gơnang mưng kaya sơdah palơi prõng nữn, sì dơgrữq pitao pãq dlòc voh hlùq va kaya gơhluh nhũ tơma pãq đỡn. 25Dơgrữq harơi, dơgrữq sơvòq bãc palơi ôh tũq halơi kađòc krỡq, kơyua ôh hũ dlài mơlãp pãq đỡn. 26Anàq mơnuĩh ròq va kaya gơhluh sì kaya ki ngãm dơgrữq lơgar tơma dơlãp đỡn, 27nữn kaya hagĩq tasỡuq nrãc hẽla mơnuĩh ngãq vruãq đang mang sì kir amir sì pa-gơla pơgàt ròq ôh tũq halơi tơma dơlãp palơi, lơniãu dơgrữq mơnuĩh halơi hũ wãq angãn dơlãp sơrãq kaya hadiuq Avo Anàq hũ.