Skip to content
BibleKenya

Roglai Bible Literal Text

Akhàt Tơviãq Pơnuaĩq Dơđỡuq 22

Patui nữn, mơnuĩh gơnrơh pơto ga hlãq bôh kròc ia kaya hadiuq, ia sơdah yơu chai kràc, ia đuaĩq tơviãq mưng sơvan Yàc Pô Lơngĩq sì Avo Anàq, dòq dơlãp khrãh jơlàt palơi prõng hũ. Vơnah gah nĩ kròc sì gah dih kròc la kayơu kaya hadiuq pơjẽh tơviãq sa plôh dua voh kayơu krơi gỡuq, pa-tơviãq voh kayơu tui yơu vlàt nhũ, dòq hlàq kayơu nữn pioh angui ga vruãq pasồq pakhơĩh ruãq ga dơgrữq lơgar. Ròq ôh dòq kaya sơtãp lơmah halơi tơra, sì sơvan Yàc Pô Lơngĩq sì Avo Anàq hũ ròq dòq dơlãp palơi prõng, dòq dơgrữq mơnuĩh halỗt mơnãq Pitrai ròq duh vruãq Pitrai. Pơnõq nhũ ròq bôh bòq mơta Pitrai, sì angãn Pitrai dòq pãq thơi pơnõq nhũ. Ròq ôh dòq dlài mơlãp tơra, anàq mơnuĩh ôh chàc hũ kaya sơdah apôi đeng hẽla kaya sơdah ia harơi, kơyua Yàc la Yàc Pô Lơngĩq ròq pơsàc sơdah pãq dlòc pơnõq nhũ, sì pơnõq nhũ ròq apãt akõq tãl trôh gãm gãm, ôh luôĩq.

Vloh mơnuĩh gơnrơh đơp sì hlãq: “Dơgrữq pơnuaĩq nĩ la đang mang pãc tui sì tơpãq viãq. Yàc, la Yàc Pô Lơngĩq gah suàt vơngãq dơgrữq mơnuĩh gơnuar hwơr hũ, song pơđar mơnuĩh gơnrơh Pitrai vrơi pa-thơu ga dơgrữq mơnuĩh halỗt mơnãq Pitrai dơgrữq vruãq iỡuq tơviãq trôh savĩq sơmar viãq.” “Iãq dih! Kơu ròq trôh savĩq viãq sơmar! Lơngai ga mơnuĩh rơmiãq jàc dơgrữq pơnuaĩq đơp hwơr dơlãp sơrãq nĩ.”

Hlãq, la Jãng, kung la mơnuĩh song bôh sì hmỡq dơgrữq vruãq nĩ. Dơlãp tũq hlãq song hmỡq sì bôh, hlãq vơviar rùp trỗt pioh duh talơvãt pãq ala tơkai mơnuĩh gơnrơh, la mơnuĩh song vrơi ràc tơviãq ga hlãq dơgrữq vruãq nữn. Dòq mơnuĩh gơnrơh nữn đơp sì hlãq: “Jươi ngãq yơu nữn! Kơu la mơnuĩh ngãq halỗt mơnãq sigỡuq sì hã, gãm sì pơnõq adơi sơai hã hũ, la dơgrữq mơnuĩh gơnuar hwơr, sigỡuq sì dơgrữq mơnuĩh halơi rơmiãq jàc dơgrữq pơnuaĩq dơlãp sơrãq nĩ. Iỡuq duh talơvãt Yàc Pô Lơngĩq!”

Vloh nhũ pơđar hlãq: “Juơi krỡq tap-ban-kiq dơgrữq pơnuaĩq gơnuar hwơr dơlãp sơrãq nĩ, kơyua tũq jơ song jẽq trôh vloh. Mơnuĩh halơi ôh ngãq tơpãq, nữn miẽt ôh ngãq tơpãq. Mơnuĩh halơi tasỡuq nrãc, nữn miẽt tasỡuq nrãc. Mơnuĩh halơi tơpãq dãng, nữn miẽt tơpãq dãng. Mơnuĩh halơi sơđah sơchih, iỡuq miẽt ngãq sơđah sơchih.” “Iãq nĩ! Kơu ròq trôh savĩq sơmar viãq, sì va kaya ban Kơu hũ tui sigỡuq sì Kơu, pioh alĩn vrơi ga dơgrữq mơnuĩh tui yơu vruãq pơnõq nhũ ngãq. Kơu la Al-pha sì Ô-me-ga, Pitao chơmrờp sì luôĩq hadơi, la pơdòq chơmrờp sì luôĩq hadơi. Lơngai ga dơgrữq mơnuĩh voh ao ơtah drơi pioh pơnõq nhũ ròq hũ gơnuar nao trôh pãq kayơu kaya hadiuq, sì nao gãt tơpa dơgrữq sơvòq bãc tơma dơlãp palơi prõng. Dòq gah lơniãu la tơpuôl anàq asơu, dơgrữq mơnuĩh ngãq pajơu, mơnuĩh arĩh athãm, mơnuĩh pa-mơtai mơnuĩh, mơnuĩh duh talơvãt rùp rãp, sigỡuq sì dơgrữq mơnuĩh khiãng sơh sì ngãq vruãq vlữq lor.

Kơu, la Je-su, song pơđar mơnuĩh gơnrơh Kơu hũ pioh ngãq chưng ga dơgrữq vruãq nữn sigỡuq sì dơgrữq sàc pơjũm sơđah. Kơu la phuỗt vơngũn sì anàq tơcho Đa-vit hũ, la Pitỗq mư-ờp sơdah gơchràq.”

Yàc Vơngãq sì Sơdiuq Kamơi đơp: “Iỡuq trôh vẽq!” Asơi hmỡq, kung iỡuq đơp: “Iỡuq trôh vẽq!” Mơnuĩh halơi mơhao ia, iỡuq trôh vẽq, sì mơnuĩh halơi ưng, iỡuq tồq mãq ia kaya hadiuq savĩq vrơi soh.

Hlãq ngãq chưng ga dơgrữq mơnuĩh hmỡq dơgrữq pơnuaĩq hwơr dơlãp sơrãq nĩ, làiq: Mơyah làiq asơi pơtãl kaya hagĩq tơma dơlãp nhũ, nữn Yàc Pô Lơngĩq ròq pơtãl ga mơnuĩh nữn dơgrữq kaya rũc rài song hũ wãq dơlãp sơrãq nĩ. Mơyah làiq mơnuĩh halơi suãq tơviãq sa asĩt dơgrữq pơnuaĩq dơlãp sơrãq gơnuar hwơr nĩ nữn Yàc Pô Lơngĩq ròq suãq vơnah mơnuĩh nữn pãq kayơu kaya hadiuq sì dơlãp palơi sơđah hũ wãq dơlãp srãq nĩ.

Pitao ngãq chưng ga dơgrữq vruãq nĩ đơp: “Iỡuq! Kơu ãn trôh savĩq sơmar viãq.” A-men! Talơvãt Yàc Je-su, lakơu trôh vẽq!

Lakơu kaya anĩt Yàc Je-su hũ dòq sigỡuq sì avih dơgrữq mơnuĩh gơnuar pơđar sơđah. A-men.

Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.