Akhàt Tơviãq Pơnuaĩq Dơđỡuq 18

1Hadơi dơgrữq vruãq nữn hlãq bôh sa aràc mơnuĩh gơnrơh tơmo trỗt mưng dlòc lơngĩq, hũ gơnuar chơnuãq prõng, sì hlùq hũ pơsàc sơdah kơyua mưng kaya gơhluh mơnuĩh nữn. 2Gãm sì sãp đơp hũ gơnuar prãn, mơnuĩh gơnrơh nữn driãu prõng, làiq:

“Ba-by-lôn prõng jơlưh vloh!

Nhũ song tơviãq jỡc anĩh dòq dơgrữq kamlai,

anĩh dòq dơđỡuq ga dơgrữq vơngãq tasỡuq nrãc hũ,

sì anĩh dòq dơđỡuq dơgrữq pơjẽh anàq chĩp tasỡuq vrỡuq hũ, đang mang sì kir amir.

3Kơyua avih dơgrữq lơgar song mơvũq mơvẽl kơyua mưng alãc anõc mơvai prõng mưng kaya drì drõc nhũ hũ,

dơgrữq pitao pãq dlòc voh hlùq song sỗq dlàiq drì drõc sì nhũ,

gah mơnuĩh kãq pa-vlơi dơlãp voh hlùq song mơda gơnãp gơnang mưng kaya prãn khãc mưng kaya hadiuq ling lang nhũ hũ.”

4Vloh hlãq hmỡq sa sãp tơmo mưng lơngĩq đơp:

“Ơ vual vơla kơu, iỡuq tơviãq mưng nhũ,

tồq pơnõq anàq ôh hũ vơnah halơi dơlãp dơgrữq dlàiq dơnũh nhũ hũ,

sì pioh ga pơnõq anàq ôh ãt dơlãp dơgrữq kaya rũc rài nhũ hũ.

5Kơyua dlàiq nhũ hũ song dãq pơđua trôh tãl lơngĩq,

sì Yàc Pô Lơngĩq song sơdor wỡq dơgrữq vruãq ngãq iãh mơsãc nhũ hũ.

6Iỡuq yơr đồq tơngãn sì nhũ kung yơu nhũ song ngãq,

sì iỡuq pơyar wỡq ga nhũ pơtãl pơgãp dua bãc, lũ rlao dua bãc nữn tui yơu dơgrữq vruãq ngãq nhũ hũ;

dơlãp chơwàt nữn nhũ song jrơu, iỡuq jrơu ga nhũ lũ pơgãp dua bãc.

7Nhũ song ngãq pa-dlòc rùp nhũ sì hadiuq pròc preh ling lang yơu halơi,

nữn iỡuq vrơi ga nhũ ãt kaya pơđìq pơđua sì ka-ồq ka-ãn yơu nữn.

Kơyua nhũ đơp dơlãp hatai nhũ, làiq:

‘Kơu dòq guh pãq sơvan yơu sa aràc kamơi pitao,

kơu ôh iỡuq la kamơi vlơu,

sì kơu ròq ôh tũq halơi tơpa gãt kaya sia chõq.’

8Kơyua yơu nữn, dơlãp mĩn sa harơi, dơgrữq kaya rũc rài nhũ hũ ròq dơvruh dơvrah trôh:

mơtai lơhiãq, sia chõq, ờq lơpa,

sì nhũ ròq kađòc chôh pa-lơhiãq mưng apôi,

kơyua Yàc la Yàc Pô Lơngĩq, la Pitao chahrơna nhũ, la Pitao gơnuar chơnuãq.”

9Dơgrữq pitao dơlãp voh hlùq, la dơgrữq mơnuĩh sỗq dlàiq drì drõc sì hadiuq rơđãp ngãq drì drõc sì nhũ, ròq sia chõq sì suãq yuà buah yuãm mưng nhũ tũq nhũ bôh asãq apôi chôh nhũ, 10Dơlãp tũq dòq dữc atah kơyua huaĩq mưng kaya ãt ngãq dlàiq nhũ hũ, đơp: “Dleh dlàr, dleh dlàr ga palơi prõng, Ba-by-lôn, la palơi vãq kaya gơnuar prãn! Kơyua dơlãp sa tũq jơ, kaya ngãq dlàiq hã song trôh.”

11Vloh dơgrữq mơnuĩh kãq pa-vlơi pãq dlòc voh hlùq sia chõq sì iãq pơlai soh ga nhũ, kơyua ôh bôh mơnuĩh halơi vlơi kaya pơnõq nhũ tơra — 12dơgrữq kaya nữn la mữh, priãq, patơu màc, patơu kràc, pơcha lơmuỡn, pơcha lơngãt, pơcha lơpih, pơcha phũrn mơriãh, sì dơgrữq kayơu gơhlơu, sì dơgrữq kaya angui mưng vơla rơman, dơgrữq kaya angui ngãq mưng kayơu màc, mưng kơsuan, mưng pasơi, mưng patơu kràc sơdah, 13kađoh kayơu sỡm wàc kađoh, kaya jrơu, thồp gơhlơu, chai trỗq, gơhlơu, alãc, lơmãq, tơpũc hlỡq lơmuỡn, vơdai mi, lơmo kơvao, vơve avo, ơseh sì rơdeh ơseh, sigỡuq sì mơnuĩh ngãq halỗt sì vơngãq yuà anàq mơnuĩh. 14“Dơgrữq voh chơtai hã hũ, la kaya chơkhãq khiãng gah suàt vơngãq, song tơviãq atah tlah di hã, dơgrữq kaya angui siàp mơkrơ pròc preh sì mơ-àc mơyàc song lơhiãq thĩt mưng hã vloh, sì tơpuôl nhũ ròq ôh tũq halơi duah bôh wỡq.” 15Dơgrữq mơnuĩh kãq pa-vlơi lũ dơgrữq kaya nĩ, la dơgrữq mơnuĩh song tơviãq jỡc mơda gơnãp, ròq dòq dữc pa-atah mưng nhũ, sia chõq sì iãq pơlai soh kơyua huaĩq kaya pơđìq pơđua yơu nhũ, 16làiq:

“Dleh dlàr, dleh dlàr, ga palơi prõng

gãm chồq ao pơcha lơmuỡn,

pơcha lơngãt, pơcha phũrn mơriãh,

sì kaya pơkhrà rùp mưng mữh,

patơu màc, asar patơu kràc,

17kơyua mĩn dơlãp sa tũq jơ, kaya mơda gơnãp mơ-àc mơyàc ngãq yơu kađòc pa-lơhiãq.”

Dơgrữq mơnuĩh pô apãt ahòq ia, dơgrữq mơnuĩh thuãi đìq dơlãp ahòq trôh pãq anĩh ưng nao, dơgrữq mơnuĩh duh vruãq dơlãp ahòq, sigỡuq sì dơgrữq mơnuĩh nao tơsìq kung dòq dữc gah atah, 18sì driãu papơ tũq iãq bôh asãq apôi chôh bõc nhũ hũ, làiq: “Palơi halơi drưh yơu palơi prõng nữn?” 19Pơnõq nhũ sa-prãi thũl pãq dlòc akõq drơi sì driãu papơ, sia chõq, iãq pơlai soh, làiq:

“Dleh dlàr, dleh dlàr palơi prõng,

anĩh nữn dơgrữq mơnuĩh dòq dơlãp nhũ hũ ahòq ia nao tơsìq

song tơviãq jỡc mơda gơnãp gơnang kaya mơnã nhũ,

kơyua mĩn dơlãp sa tũq jơ, nhũ song kađòc pa-lơhiãq avih.”

20(“Iỡuq uỗt sơh mưng nhũ, ơ lơngĩq,

sigỡuq sì dơgrữq mơnuĩh mơnuĩh gơnuar pơđar sơđah, mơnuĩh ãt pơđar sì gãm mơnuĩh gơnuar hwơr,

kơyua Yàc Pô Lơngĩq song ngãq dlàiq kaya yãq vãq pơnõq hã pơweh sì nhũ!”)

21Vloh hũ sa aràc mơnuĩh gơnrơh prãn khãc pồq voh patơu prõng tơgùq drưh yơu lơsũc sòq prõng sì prah nhũ trỗt pãq ala ia tơsìq, đơp:

“Tui pơnẽq nĩ, palơi prõng Ba-by-lôn

ròq kađòc prah khãc trỗt,

sì ròq ôh tũq halơi dòq bôh wỡq tơra,

22sãp mơnuĩh pẽq kanhĩ, tơpĩng kathũr,

mơnuĩh ayùq tơliãq, sì mơnuĩh ayùq gơdèt

ròq ôh tũq halơi hmỡq wỡq pãq anĩh pơnõq hã tơra,

dơgrữq mơnuĩh khưh rgơi

ròq ôh tũq halơi hũ duah bôh dơlãp hã wỡq,

sãp dơnai lơsũc sòq

ròq ôh tũq halơi hmỡq wỡq pãq anĩh hã tơra,

23kaya sơđah apôi đeng

ròq ôh dòq pơsàc dơlãp hã tơra,

sãp mơtơu lakơi sì mơtơu kamơi

ròq ôh tũq halơi hmỡq wỡq pãq anĩh hã tơra,

kơyua dơgrữq mơnuĩh kãq pa-vlơi hã hũ la dơgrữq mơnuĩh hũ gơnuar prãn pãq dlòc voh hlùq,

kơyua dơgrữq palơi lơgar song kađòc pa-gơla kơyua mưng kaya jũh proh hã hũ.

24Dơrãh dơgrữq mơnuĩh gơnuar hwơr sigỡuq sì dơgrữq mơnuĩh gơnuar pơđar sơđah,

gãm sì kung avih dơgrữq mơnuĩh halơi song kađòc pa-mơtai pãq dlòc voh hlùq song jỡc duah bôh pãq anĩh nhũ.”