Akhàt Tơviãq Pơnuaĩq Dơđỡuq 17

1Vloh sa aràc dơlãp tơjuh aràc mơnuĩh gơnrơh apãt tơjuh voh chơwàt, nao trôh nữn đơp sì hlãq làiq: “Mai vẽq, kơu ròq vrơi ga hã bôh kaya ngãq dlàiq mơnuĩh kamơi drì drõc ãn dòq guh pãq dlòc lũ chơnãh chroh ia, 2nữn sigỡuq sì nhũ, dơgrữq pitao dơlãp dun kơyua song sỗq dlàiq drì drõc, dòq vual vơla pãq dlòc voh hlùq nữn mơvũq mơvẽl mưng alãc kaya drì drõc nhũ hũ.” 3Mơnuĩh nữn va hlãq nao dơlãp Yàc Vơngãq Sơđah trôh pãq blàc choah, vloh hlãq bôh sa aràc mơnuĩh kamơi dòq guh pãq dlòc anàq asỡq ia phũrn mơriãh, vãq dơgrữq angãn đơp sơvĩl, hũ tơjuh voh akõq sì sa plôh bẽq tơki. 4Mơnuĩh kamơi nữn sì chồq ao ia lơngãt sì phũrn mơriãh, hũ kaya pơkhrà rùp mưng mữh, patơu màc, sì asar patơu kràc, dơlãp tơngãn nhũ ãn tơ-iàq sa voh chơwàt mưng mữh vãq dơgrữq kaya kir amir sì dơgrữq kaya tasỡuq nrãc kơyua mưng kaya drì drõc nhũ hũ, 5dòq pãq dlòc thơi nhũ hũ wãq sa angãn: “Ba-by-lôn dơlãp dơđỡuq prõng rlao, la ami dơgrữq mơnuĩh drì drõc sì dơgrữq kaya kir amir pãq dlòc voh hlùq.” 6Vloh hlãq bôh mơnuĩh kamơi nữn ãn dòq mơvũq mơvẽl sì dơrãh dơgrữq mơnuĩh gơnuar sơđah gãm sì dơrãh dơgrữq mơnuĩh ngãq chưng Yàc Je-su hũ, nữn hadơi sì tũq iãq bôh nhũ, hlãq kơtuãq gãm sì kaya mãq ngãq krơi viãq. 7Mơnuĩh gơnrơh đơp sì hlãq, “Kơyua hayơu hã vloh mãq ngãq krơi? Kơu ròq akhàt ga hã mưng kaya dơlãp dơđỡuq mơnuĩh kamơi sì anàq asỡq ãn dòq pơdiãc nhũ nữn, nữn la anàq asỡq hũ tơjuh voh akõq sì sa plôh bẽq tơki. 8Anàq sỡq nữn sơai bôh hlơu thrơi song hũ, tũq nĩ ôh hũ, vloh làiq jẽq đìq tơgùq mưng anĩh thòc dơlãp ôh hũ tơkai, nữn nhũ ròq nao trôh pãq anĩh mơtai lơhiãq, dòq vual vơla dơlãp voh hlùq, nữn angãn pơnõq nhũ ôh hũ wãq tơma dơlãp Sơrãq Kaya Hadiuq mưng tũq chrơng pajỡc, pơnõq nhũ ròq mãq ngãq krơi tũq iãq bôh anàq asỡq kơyua hlơu thrơi song hũ, tũq nĩ ôh hũ, vloh ròq jẽq mai trôh. 9Dơlãp tũq akõq dlò hũ kaya jãc rgơi dơlãp vruãq nĩ: Tơjuh voh akõq la tơjuh voh chỡq, la anĩh mơnuĩh kamơi dih dòq guh pãq dlòc tơpuôl nhũ, sì tơpuôl nhũ la tơjuh mơnuĩh pitao; 10lơmã pitao song lơhiãq gơnuar, sa aràc pitao ãn kađòc dòq wỡq, sa pitao tơmo ka-ôh trôh. Sì tũq nhũ trôh, nhũ kung dòq mĩn sa lơwah tũq ôh suơi. 11Anàq asỡq hlơu thrơi song hũ nữn tũq nĩ ôh hũ, rùp phuỗt nhũ nữn la pitao bãc talơpãn; nữn nhũ la pơweh pa tơjuh pitao dih, sì ãn nao trôh anĩh pa-lơhiãq. 12Sa plôh bẽq tơki nữn hã bôh la sa plôh pitao, dơgrữq mơnuĩh ka-ôh tồq mãq hũ palơi lơgar, nữn pơnõq nhũ ròq hũ gơnuar ngãq pitao dơlãp sa tũq jơ sigỡuq sì anàq asỡq nữn. 13Dơgrữq pitao nĩ kung hũ sa kaya sơnơng sigỡuq, sì pơnõq nhũ vrơi kaya prãn khãc sigỡuq sì gơnuar chơnuãq drơi hũ ga anàq asỡq. 14Tơpuôl nhũ ròq mơsôh sì Avo Anàq, vloh Avo Anàq ròq pha rlao tơpuôl nhũ kơyua Pitrai la Yàc dơgrữq Yàc, Pitao dơgrữq Pitao — sigỡuq sì Pitrai la dơgrữq mơnuĩh hũ iơu jàq, hũ duỡt ruãh, sì tui tơpãq.” 15Mơnuĩh gơnrơh đơp sì hlãq: “Dơgrữq chroh ia đuaĩq nữn hã bôh, anĩh nữn mơnuĩh kamơi drì drõc ãn dòq guh, la dơgrữq pơjẽh vual vơla, dơgrữq tơpuôl mơnuĩh, dơgrữq palơi lơgar sì dơgrữq sãp đơp. 16Sa plôh bẽq tơkìq nữn hã bôh, sigỡuq sì anàq asỡq — tơpuôl nhũ ròq lơmùq mơvai mơnuĩh kamơi drì drõc nữn, vloh tơpuôl nhũ ròq ngãq ga mơnuĩh kamơi nữn kađòc tlàq luơi sì dòq kalôh, tơpuôl nhũ ròq bõc luỗt rơlo mơnuĩh kamơi nữn, sì tơpuôl nhũ ròq chôh pa-lơhiãq mơnuĩh kamơi nữn mưng apôi, 17kơyua Yàc Pô Lơngĩq song vrơi chẽq dơlãp hatai tơpuôl nhũ pioh pabôh tơviãq kaya ngãq gơnĩt Pitrai hũ, tồq pơjao vrơi palơi lơgar tơpuôl nhũ ga anàq asỡq tãl trôh tũq dơgrữq pơnuaĩq Yàc Pô Lơngĩq ròq jỡc tơviãq iỡuq viãq wil tãl. 18Mơnuĩh kamơi nữn hã bôh la palơi prõng hũ gơnuar apãt akõq pãq dlòc dơgrữq pitao dơlãp voh hlùq.”