Akhàt Tơviãq Pơnuaĩq Dơđỡuq 16

1Vloh hlãq hmỡq sa sãp prõng mưng sàc duh talơvãt đơp sì tơjuh aràc mơnuĩh gơnrơh: “Iỡuq nao vẽq nữn tôh tơjuh voh chơwàt kaya ơnõc mơvai prõng Yàc Pô Lơngĩq hũ pãq ala voh hlùq.”

2Yơu nữn mơnuĩh gơnrơh bãc chơmrờp nao sì tôh tơviãq chơwàt drơi trỗt pãq ala voh hlùq, nữn pađũc lơka katãl kir amir sì ngãq pơđìq pơđua bôh tơviãq dơlãp rùp dơgrữq mơnuĩh, dơgrữq mơnuĩh hũ nỡm anàq asỡq, sigỡuq sì dơgrữq mơnuĩh duh talơvãt rùp rãp nhũ.

3Vloh mơnuĩh gơnrơh bãc dua tôh tơviãq chơwàt nhũ trỗt pãq ia tơsìq, nữn ia tơsìq tơviãq jỡc dơrãh, yơu dơrãh mơnuĩh mơtai hũ, sì dơgrữq pơjẽh hadiuq dơlãp ia tơsìq mơtai avih.

4Vloh patui nữn, mơnuĩh gơnrơh bãc tlơu tôh tơviãq chơwàt nhũ trỗt pãq dơgrữq kròc sì chroh ia, nữn nhũ tơviãq jỡc dơrãh. 5Hlãq hmỡq mơnuĩh gơnrơh lơgar đơp: “Talơvãt Pitao song hũ, sì ròq hũ, la Pitao Sơđah, Pitrai la tơpãq dãng kơyua Pitrai song chahrơna dơgrữq vruãq nĩ. 6Kơyua pơnõq nhũ song ngãq hõq dơrãh dơgrữq mơnuĩh gơnuar sơđah hũ sì dơgrữq mơnuĩh gơnuar hwơr, yơu nữn Pitrai song vrơi ga pơnõq nhũ mơnhũm dơrãh; pơnõq nhũ viãq đang mang ãt yơu nữn.”

7Vloh hlãq hmỡq ban duh talơvãt hẽ wỡq: “Viãq, talơvãt Yàc la Yàc Pô Lơngĩq, Pitao Gơnuar Chơnuãq, dơgrữq kaya chahrơna Pitrai hũ kung tơpãq viãq sì tơpãq dãng.”

8Vloh mơnuĩh gơnrơh bãc pàq tôh chơwàt nhũ pãq dlòc ia harơi, nữn nhũ hũ gơnuar chôh anàq mơnuĩh mưng apôi. 9Yơu nữn la anàq mơnuĩh kađòc chôh kơyua yuà gơhuar tluỡiq viãq, sì pơnõq nhũ đơp sơvĩl trôh angãn Yàc Pô Lơngĩq, Pitao hũ gơnuar pãq dlòc dơgrữq kaya rũc rài nĩ, nữn pơnõq nhũ ôh mơvai tlàq dlàiq pioh padỡc kaya gơhluh ga Pitrai.

10Vloh mơnuĩh gơnrơh bãc lơmã tôh chơwàt nhũ pãq dlòc sơvan anàq asỡq, nữn palơi lơgar nhũ tơviãq jỡc sồp kơnãm, sì anàq mơnuĩh kẽq dơlãh drơi kơyua pơđìq pơđua. 11Pơnõq nhũ đơp sơvĩl trôh Yàc Pô Lơngĩq pãq dlòc lơngĩq kơyua mưng kaya pơđìq pơđua nhũ sì kơyua dơgrữq nỡm halôh pađũc nhũ hũ, nữn vloh pơnõq nhũ ôh ưng mơvai tlàq dlàiq mưng dơgrữq vruãq drơi song ngãq.

12Vloh mơnuĩh gơnrơh bãc nãm tôh chơwàt nhũ trỗt pãq ala kròc prõng Ơ-phơ-rat, nữn ia kròc srõng thô pioh pa-ơgah lơĩh jơlàt ơthua ga dơgrữq pitao mưng gah ia harơi tơgùq mai. 13Hlãq bôh tơviãq mưng mơvah anàq grai, mưng mơvah anàq sỡq, sì mưng mơvah mơnuĩh gơnuar hwơr vlữq lor, hũ tlơu vơngãq tasỡuq nrãc iãq yơu anàq kiãuq. 14Kơyua tơpuôl nhũ la vơngãq dơgrữq kamlai nữn hũ ngãq tơviãq lũ nỡm krơi tơmo, nữn tơpuôl nhũ trôh sì avih dơgrữq Pitao dơlãp dun kơyua nĩ pioh iơu jàq pơnõq nhũ nao mơsôh dơlãp harơi prõng Yàc Pô Lơngĩq, Pitao Gơnuar Chơnuãq hũ. 15(“Iãq dih! Kơu trôh yơu mơnuĩh tlẽq! Lơngai ga mơnuĩh mơ-uãh chơkhãq sì rơmiãq jàc ao atah drơi, tồq ga nhũ ôh yàp nao dòq kalôh nữn anàq mơnuĩh iãq bôh wãc rơsì mơlơu ơlah nhũ hũ.”) 16Tơpuôl nhũ pơjũm pơtõm gỡuq wỡq pãq sa anĩh angãn la Ha-ma-ge-đôn dơlãp sãp Hy-ba-lai.

17Vloh mơnuĩh gơnrơh bãc tơjuh tôh chơwàt nhũ tơmã dơlãp khrãh lơwah, nữn hũ sa sãp đơp prõng mưng sơvan dơlãp sàc duh talơvãt sỡm wàc tơviãq, làiq: “Vruãq song avih vloh!” 18Yơu nữn la bôh tơviãq gơlia liãq, sãp grĩng grang gãm sì sãp grĩm, sì sa kaya sơđô mơgơi tơnãh prõng nữn ròq tơviãq trôh — kaya sơđô mơgơi tơnãh nữn viãq prãn sì prõng viãq sa kaya yơu nữn ka-ôh tơviãq trôh mưng tũq pơjẽh anàq mơnuĩh ròq bôh mơta pãq dlòc voh hlùq. 19Palơi prõng kađòc pa-chơlah tơviãq ngãq tlơu vơnah, sì dơgrữq palơi prõng dơgrữq lơgar jơlưh trỗt, sì Ba-by-lôn prõng pa-sơdor wỡq di anãq Yàc Pô Lơngĩq pioh vrơi ga nhũ chơwàt alãc mưng kaya ơnõc mơvai prõng viãq Pitrai hũ. 20Vloh dơgrữq pỗc pơlao kung đuaĩq dỡuq, sì dơgrữq chỡq chơr ôh duah bôh tơra. 21Dơgrữq hajàt voh pơlia prõng tơrãq pơgãp sa ta-lỡng mưng dlòc lơngĩq hõq trỗt pãq dlòc anàq mơnuĩh, vloh anàq mơnuĩh sơnẽq sỗq sì Yàc Pô Lơngĩq kơyua mưng kaya rũc rài hajàt pơlia, kơyua mưng kaya rũc rài nữn la kir huaĩq viãq.