Roglai Bible Literal Text
Akhàt Tơviãq Pơnuaĩq Dơđỡuq 15
Vloh hlãq bôh sa nỡm prõng sì chrih krơi tơmo pãq dlòc lơngĩq: tơjuh aràc mơnuĩh gơnrơh ãn apãt tơjuh kaya rũc rài, dơgrữq kaya luôĩq hadơi, kơyua kaya anõc mơvai prõng Yàc Pô Lơngĩq hũ wil tãl dơlãp pơnõq nhũ.
Hlãq kung bôh sa kaya hagĩq nữn drưh yơu ia tơsìq mưng chai kràc jrơu sì apôi. Dơgrữq mơnuĩh song pha rlao sì anàq asỡq, pha rlao sì rùp rãp nhũ, kung pha rlao sì katih angãn nhũ hũ, ãn dòq dữc pãq dlòc ia tơsìq chai kràc nữn, tơngãn tơ-iàq tơpĩng kathũr Yàc Pô Lơngĩq hũ. Pơnõq nhũ adoh rơgãm đơp adoh Môi-se hũ, halỗt mơnãq Yàc Pô Lơngĩq, sì rơgãm đơp adoh Avo Anàq hũ, làiq:
“Talơvãt Yàc la Yàc Pô Lơngĩq, Pitao Gơnuar Chơnuãq,
dơgrữq vruãq Pitrai viãq prõng màc sì krơi tơmo viãq.
Talơvãt Pitao dơgrữq rài hũ,
jơlàt ơthua Pitrai la tơpãq rĩng sì tơpãq viãq.
Talơvãt Yàc, asơi vloh ôh kađòc tơtơh huaĩq
sì ròq ôh sơ-uỗt mơyòp angãn Pitrai?
Kơyua mĩn Pitrai la sơđah.
Kơyua vãq avih dơgrữq lơgar ròq trôh
sì duh talơvãt di anãq Pitrai,
kơyua dơgrữq vruãq tơpãq dãng Pitrai hũ song ràc pa-tơviãq.”
Hadơi dơgrữq vruãq nữn, hlãq iãq bôh, anĩh duh talơvãt tlam ngãq chưng hũ pãq dlòc lơngĩq pơh tơviãq. Tơjuh aràc mơnuĩh gơnrơh tơ-iàq tơjuh kaya rũc rài tơviãq nao mưng sàc duh talơvãt, angui chồq pơcha vlơu katãl sơchih, sơdah gơchràq, sì hũ akãq talơi kơ-iãng mưng mữh tòp dar dơda. Vloh sa dơlãp pàq drơi anàq asỡq vrơi ga tơjuh aràc mơnuĩh gơnrơh tơjuh voh chơwàt mưng mữh vuh vãq kaya ơnõc mơvai prõng Yàc Pô Lơngĩq hũ, Pitao hadiuq tãl trôh gãm gãm, ôh luôĩq. Sàc duh talơvãt asãq vãq kơyua mưng kaya gơhluh Yàc Pô Lơngĩq hũ sì gơnuar chơnuãq Pitrai, ôh asơi pơlih tơma dơlãp sàc duh talơvãt tãl trôh tũq tơjuh kaya rũc rài tơjuh aràc mơnuĩh gơnrơh hũ song ngãq wil tãl.
Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.