Akhàt Tơviãq Pơnuaĩq Dơđỡuq 14

1Vloh hlãq tơlàq iãq, nữn dih, Avo Anàq dòq dữc pãq dlòc chỡq Si-ôn. Sigỡuq sì Pitrai la sa rơtôh pàq plôh pàq rơvơu aràc hũ angãn Pitrai sì angãn Ama Pitrai hũ wãq pãq dlòc thơi pơnõq nhũ. 2Sì hlãq hmỡq sãp đơp mưng dlòc lơngĩq yơu sãp dơnai grĩng grang lũ ia hãl suà prõng, yơu hũ sãp kơtãl tãq prõng, sì sãp hlãq song hmỡq nữn drưh yơu mơnuĩh pẽq tơpĩng kathũr nhũ. 3Pơnõq nhũ adoh sa rơgãm vơhrơu pãq anãq sơvan sì pãq anãq pàq drơi anàq asỡq sigỡuq sì dơgrữq mơnuĩh pô tơha, nữn ôh asơi pơlih mơgrũ thơu rơgãm adoh nữn lơniãu sa rơtôh pàq plôh pàq rơvơu aràc song hũ dơvuh sơlih pãq dlòc voh hlùq. 4Nĩ la dơgrữq mơnuĩh ka-ôh kađòc tasỡuq nrãc sì mơnuĩh kamơi, kơyua pơnõq nhũ dòq sơchih. Nĩ la dơgrữq mơnuĩh nao tui Avo Anàq anĩh halơi nữn Pitrai nao. Dơgrữq mơnuĩh nĩ song hũ dơvuh sơlih di khrãh pơjẽh anàq mơnuĩh yơu voh akõq thũt ga Yàc Pô Lơngĩq sì ga Avo Anàq, 5Ôh hũ pơnuaĩq vlữq lor halơi duah bôh di mơvah pơnõq nhũ, kơyua pơnõq nhũ ôh hũ kaya nỡm halơi.

6Vloh hlãq bôh sa aràc mơnuĩh gơnrơh tơmo por pãq khrãh lơngĩq, hũ Pơnuaĩq Siàp gãm gãm pioh pa-thơu ga vual vơla pãq dlòc voh hlùq — gãm sì ga dơgrữq palơi lơgar, apõc pơtiàt, dơgrữq sãp đơp sì dơgrữq pơjẽh vual vơla — 7driãu prõng sãp làiq: “Iỡuq duh huaĩq Yàc Pô Lơngĩq sì padỡc kaya gơhluh ga Pitrai, kơyua tũq jơ chahrơna Pitrai song trôh. Iỡuq duh talơvãt Pitao chrơng pajỡc lơngĩq, tơnãh, tơsìq sì kròc, chroh ia.”

8Hũ mơnuĩh gơnrơh tơmo, mơnuĩh gơnrơh bãc dua, tui hadơi, đơp làiq: “Nhũ jơlưh trỗt vloh, Ba-by-lôn prõng song jơlưh trỗt vloh, nữn la mơnuĩh pachôh pasũl vãq avih dơgrữq lơgar mơnhũm alãc kaya ơnõc mơvai prõng mưng kaya drì drõc nhũ hũ.”

9Hũ sa aràc mơnuĩh gơnrơh tơmo wỡq, mơnuĩh gơnrơh bãc tlơu, tui hadơi pơnõq nhũ, đơp prõng sãp, làiq: “Mơyah làiq mơnuĩh halơi duh talơvãt anàq asỡq sigỡuq sì rùp rãp nhũ, sì tồq mãq kaya ngãq nỡm nhũ pãq dlòc thơi hẽla pãq dlòc tơngãn drơi, 10nữn mơnuĩh nữn kung ròq mơnhũm alãc kaya ơnõc mơvai prõng Yàc Pô Lơngĩq hũ, la kaya alãc ôh jrơu tôh tơma chơwàt kaya ơnõc mơvai Pitrai hũ, sì mơnuĩh nữn ròq ãt kaya ngãq savữc mưng apôi sì kadir pãq anãq dơgrữq mơnuĩh gơnrơh sơđah sì pãq anãq Avo Anàq. 11Asãq mưng kaya dleh dlàr pơđìq pơđua pơnõq nhũ por tơgùq tãl trôh gãm gãm, ôh luôĩq, nữn pơnõq nhũ ôh hũ padơi dleh dlài harơi gãm sì mơlãp, nữn la dơgrữq mơnuĩh duh talơvãt anàq asỡq sigỡuq sì rùp rãp nhũ, sì mơnuĩh halơi tồq mãq kaya ngãq nỡm angãn nhũ hũ. 12Nĩ la kaya ãt ỡl dơgrữq mơnuĩh gơnuar pơđar sơđah hũ, dơgrữq mơnuĩh rơmiãq jàc dơgrữq pơnuaĩq pơđar-va Yàc Pô Lơngĩq hũ sì voh-tui dơlãp Yàc Je-su.”

13Hlãq hmỡq hũ sa sãp đơp mưng lơngĩq, làiq: “Iỡuq wãq pơnuaĩq nĩ: Mưng nĩ sì hadơi, lơngai ga mơnuĩh halơi la mơnuĩh mơtai dơlãp Yàc.” Yàc Vơngãq Sơđah đơp: “Viãq, tồq pơnõq nhũ ròq padơi dleh mưng dơgrữq vruãq ngãq dleh dlàr drơi, kơyua dơgrữq vruãq pơnõq nhũ ròq tui hadơi sigỡuq sì pơnõq nhũ.”

14Vloh hlãq iãq bôh, sì dih, hũ sa pỗc huãl kòq, sì dòq pãq dlòc huãl la mơnuĩh halơi nữn drưh yơu Anàq Mơnuĩh, hũ chrang pitao mưng mữh pãq dlòc akõq Pitrai, sì tơ-iàq sa bẽq wãc hluỡq dơlãp tơngãn Pitrai. 15Vloh sa aràc mơnuĩh gơnrơh tơmo tơviãq nao mưng sàc duh talơvãt, prõng sãp iơu Pitao ãn dòq guh pãq dlòc huãl: “Lakơu mãq wãc Pitrai tơviãq nữn yuãq vẽq, kơyua iỡuq harơi vlàt pioh yuãq song trôh kơyua tũq vlàt nhũ pãq dlòc voh hlùq song tơsãq.” 16Yơu nữn la Pitao dòq guh pãq dlòc huãl prah wãc Pitrai pãq dlòc voh hlùq, sì voh hlùq kađòc yuãq.

17Vloh sa aràc mơnuĩh gơnrơh tơmo tơviãq mưng sàc duh talơvãt pãq dlòc lơngĩq, mơnuĩh nĩ kung hũ sa bẽq wãc hluỡq. 18Hũ sa aràc mơnuĩh gơnrơh tơmo wỡq, la mơnuĩh hũ gơnuar chơnuãq pãq dlòc apôi, tơviãq mưng ban duh talơvãt, sì nhũ prõng sãp iơu mơnuĩh hũ bẽq wãc hluỡq, làiq: “Iỡuq mãq wãc hluỡq drơi tơviãq nữn yuãq pioh dơgrữq talơkũm nho mưng dơgrữq kayơu nho pãq ala voh hlùq, kơyua talơkũm nho pơnõq nhũ song tơsãq vloh.” 19Yơu nữn la kơyua mơnuĩh gơnrơh prah wãc nhũ trỗt pãq ala voh hlùq sì yuãq pioh vỡn nho pãq ala voh hlùq, vloh prah nhũ tơma thũng juãq nho prõng kaya ơnõc mơvai prõng Yàc Pô Lơngĩq hũ. 20Thũng juãq voh nho hũ gơlìq dòq pãq gah lơniãu palơi prõng sì dơrãh dơlãp thũng nữn tôh tơviãq dlòc trôh talơbỡng mơvah ơseh, ơtah sa rơvơu nãm rơtôh ech-ta-đơ.