Akhàt Tơviãq Pơnuaĩq Dơđỡuq 13

1Patui nữn, hlãq bôh sa drơi anàq asỡq tơgùq mưng tơsìq, hũ sa plôh bẽq tơkìq sì tơjuh voh akõq, sì pãq dlòc dơgrữq tơkìq nhũ la hũ sa plôh chrang pitao, nữn pãq dlòc dơgrữq voh akõq nhũ la hũ sa angãn iãh sơvĩl. 2Anàq sỡq nữn hlãq bôh drưh yơu anàq ka-pôĩh, plàq tơkai nhũ drưh yơu plàq tơkai anàq jagơu, dòq mơvah nhũ yơu mơvah rơmoòn phũm, sì anàq grai pơjao vrơi gơnuar prãn drơi ga nhũ, sigỡuq sì sơvan nhũ gãm sì gơnuar chơnuãq prõng viãq. 3Sa voh akõq dơlãp dơgrữq akõq nhũ ngãq yơu kung song ãt poh tãl trôh mơtai, nữn kaya nỡm halôh jẽq sì mơtai nhũ hũ song jỡc pasồq pakhơĩh. Vãq avih voh hlùq kung sơuỗt mơyòp duh huaĩq sì nao tui anàq asỡq nữn, 4sì aràc duh talơvãt anàq grai kơyua nhũ song vrơi gơnuar chơnuãq ga anàq asỡq, pơnõq nhũ kung duh talơvãt anàq asỡq, làiq: “Asơi drưh yơu anàq asỡq, sì asơi tãl prãn pioh pơlih mơsôh sòq jơdrãq sì nhũ jỡc?” 5Sa voh mơvah đơp pơnuaĩq yeh pơchrìq sì đơp sơvĩl. Hũ alĩn vrơi ga anàq asỡq, gơnuar chơnuãq kung hũ vrơi ga nhũ pioh ngãq dơlãp pàq plôh dua vlàt. 6Yơu nữn la anàq asỡq pơh mơvah nhũ pơweh dơgrữq pơnuaĩq đơp sơvĩl sòq jơdrãq di Yàc Pô Lơngĩq, tlao siẽq siẽl angãn Pitrai, sì anĩh tlam Pitrai hũ — dơgrữq mơnuĩh hadiuq pãq dlòc lơngĩq. 7Anàq asỡq hũ gơnuar ngãq mơsôh sì dơgrữq mơnuĩh gơnuar sơđah sì pha rlao pơnõq nhũ, gơnuar chơnuãq kung hũ vrơi ga nhũ pãq dlòc dơgrữq apõc pơtiàt, vual vơla, pơnuaĩq đơp sì palơi lơgar. 8Dơgrữq mơnuĩh hadiuq pãq dlòc voh hlùq ròq duh talơvãt nhũ, la dơgrữq mơnuĩh halơi nữn angãn mơnuĩh nữn song ôh hũ wãq dơlãp sơrãq kaya hadiuq Avo Anàq, Pitao ròq kađòc pa-mơtai mưng tũq chrơng pajỡc dun kơyua. 9Mơyah làiq mơnuĩh halơi hũ tanĩa, iỡuq hmỡq vẽq.

10Mơyah làiq mơnuĩh halơi pioh dòq dơlãp kaya mãq va,

mơnuĩh nữn iỡuq nao jơlàt nĩ,

mơyah làiq aràc halơi song kađòc pa-mơtai mưng đao thõc,

mơnuĩh nữn iỡuq mơtai mưng đao thõc.

Nĩ la kaya ãt ỡl sì voh-tui dơgrữq mơnuĩh gơnuar sơđah hũ.

11Vloh hlãq bôh sa drơi anàq asỡq tơmo tơgùq mưng ala hlùq, sì nhũ hũ dua bẽq tơki drưh yơu anàq avo anàq, nữn nhũ đơp drưh yơu anàq grai. 12Nhũ angui avih dơgrữq gơnuar chơnuãq anàq asỡq bãc chơmrờp hũ pãq anãq anàq asỡq nữn, sì nhũ nữn mãq gơnuar nĩ sì voh hlùq sigỡuq sì dơgrữq vual vơla pãq dlòc voh hlùq ròq duh talơvãt anàq asỡq bãc chơmrờp, nữn la anàq asỡq hũ nỡm hlôh jẽq mơtai song pasồq pakhơĩh. 13Nhũ ngãq dơgrữq kaya krơi tơmo chrih viãq, tơviãq jỡc nhũ vloh pơlih ngãq ga apôi mưng dlòc lơngĩq pa-trỗt pãq ala voh hlùq pãq anãq anàq mơnuĩh. 14Sì mưng dơgrữq kaya nỡm krơi tơmo nữn nhũ hũ gơnuar ngãq tơviãq pãq anãq anàq asỡq, nhũ pa-gơla vual vơla pãq dlòc voh hlùq, tũq pơđar vual vơla pãq dlòc voh hlùq ngãq sa voh rùp rãp anàq asỡq hũ ngãq hlôh dơgrẽh mưng đao thõc nữn mĩn hadiuq. 15Nhũ hũ gơnuar vrơi yuà suãq ga rùp rãp anàq asỡq hũ, pioh ga rùp rãp anàq asỡq nữn vloh đơp jỡc, sì kung ngãq ga dơgrữq mơnuĩh halơi ôh duh talơvãt rùp rãp anàq asỡq nữn iỡuq kađòc pa-mơtai. 16Nhũ kung ngãq ga dơgrữq mơnuĩh, lơđeh tìt kung yơu mơnuĩh prõng, mơda gơnãp kung yơu mơnuĩh rơbah, mơnuĩh lanơng lơnai gãm sì mơnuĩh halỗt mơnãq, ngãq hayơu pơlih vrơi ga aràc tồq mãq sa voh nỡm pãq dlòc plàq tơngãn hơnuãq pơnõq nhũ hẽla pãq dlòc thơi pơnõq nhũ hũ. 17Pioh ga ôh hũ mơnuĩh halơi pơlih vlơi hẽla kãq pa-vlơi hagĩq jỡc mơyah làiq mơnuĩh nữn ôh hũ nỡm nữn, la angãn anàq asỡq hũ, hẽla katih angãn nhũ hũ. 18Kaya jãc rgơi la nĩ: Mơnuĩh halơi hũ kaya jãc thơu, mơnuĩh nữn iỡuq karhia katih anàq asỡq hũ. Kơyua nhũ la katih sa aràc mơnuĩh hũ, sì katih nhũ la (666) nãm rơtôh nãm plôh nãm.