Phi-lip 4

1Yơu nữn, ơ pơnõq adơi sơai anĩt duman sì gãm sơdor hlãq hũ, kaya uỗt sơh sì sơgỡn màc hlãq hũ, ơ pơnõq adơi sơai anĩt duman, iỡuq miẽt dòq gơjãp kađữc yơu nữn dơlãp Yàc.

2Hlãq lakơu pơto pa-sơdor E-vô-đi sì lakơu pơto pa-sơdor Sin-ty-kơ hũ kaya sơnơng salơnuãq sigỡuq dơlãp Yàc. 3Gơnĩt viãq làiq, hlãq kung lakơu sơai, ơ mơnuĩh ngãq vruãq tơpãq siàp sigỡuq sì hlãq, sơai iỡuq dõc dơgrữq mơnuĩh kamơi nữn, pơnõq nhũ sigỡuq sì hlãq song mơvlah mơsôh ga Pơnuaĩq Siàp, sigỡuq sì Kơ-le-mãn gãm sì dơgrữq ban mơyơu tơmo ngãq vruãq sigỡuq sì hlãq, nữn angãn pơnõq nhũ dòq dơlãp Sơrãq Kaya Hadiuq.

4Iỡuq uỗt sơh gãm dơlãp Yàc. Hlãq ròq đơp wỡq, iỡuq uỗt sơh vẽq! 5Iỡuq luơi ga dơgrữq aràc thơu vruãq ngãq lơmuỡn siàp pơnõq adơi sơai hũ. Yàc song jẽq trôh vloh. 6Juơi ka-ồq ka-ãn hagĩq, pa-vlữq wỡq, dơlãp dơgrữq vruãq, mưng kaya iơu lakơu sì rãn lakơu sigỡuq sì kaya ỡn ngai, iỡuq luơi dơgrữq pơnuaĩq iơu lakơu pơnõq adơi sơai hũ padỡc tơgùq ga Yàc Pô Lơngĩq, 7vloh kaya dadu lơngai Yàc Pô Lơngĩq hũ, la kaya tơpa rlao avih dơgrữq kaya pãc thơu, ròq rơmiãq jàc hatai pơnõq adơi sơai sì kaya sơnơng pơnõq adơi sơai dơlãp Yàc Dõc Pơ-tlah Je-su.

8Luôĩq hadơi, ơ pơnõq adơi sơai, dơgrữq kaya halơi la tơpãq viãq, dơgrữq kaya halơi la đang mang sơ-uỗt mơyòp, dơgrữq kaya halơi tơpãq dãng, dơgrữq kaya halơi la sơđah sơchih, dơgrữq kaya halơi la đang mang khiãng anĩt, dơgrữq kaya halơi hũ tiẽng dơnai siàp, mơyah làiq kaya ngãq siàp halơi sì mơyah làiq kaya halơi đang mang mơyòp, nữn pơnõq adơi sơai iỡuq sơnơng trôh nhũ. 9Dơgrữq kaya halơi pơnõq adơi sơai song mơgrũ thơu, song tồq mãq, song hmỡq sì song bôh dơlãp hlãq, nữn iỡuq ngãq dơgrữq kaya nữn, vloh Yàc Pô Lơngĩq dadu lơngai ròq dòq sigỡuq sì pơnõq adơi sơai.

10Hlãq hũ uỗt sơh viãq dơlãp Yàc kơyua tũq luôĩq hadơi pơnõq adơi sơai vloh sơnơng trôh hlãq, đơp viãq, dơlãp vruãq nĩ, pơnõq adơi sơai song gãm sơnơng trôh hlãq, nữn ôh hũ sa lơwah halơi pioh akhàt pa-tơviãq. 11Nữn ôh iỡuq la hlãq đơp mưng kaya siẽuq sier drơi, kơyua hlãq song mơgrũ iỡuq siàp hatai bôh làiq hlãq dòq dơlãp kaya ròq trôh halơi. 12Hlãq vrơu thơu kaya kađòc rơbah siẽuq, sì vrơu thơu hũ dơlãh dơlai. Dơlãp dơgrữq vruãq ròq trôh sì dơlãp dơgrữq kaya song trôh, hlãq song mơgrũ hũ tũq tarơi gãm sì hũ tũq ãt lơ-pa, hũ tũq dơlãh dơlai gãm sì hũ tũq siẽuq sier. 13Hlãq hũ tãl prãn pa-sơmũ avih dơgrữq kaya gơnang mưng Pitao ngãq ga hlãq prãn khãc. 14Bôh làiq yơu nữn, pơnõq adơi sơai song ngãq iỡuq tũq pa-mơpha kaya kãl dơmãl sigỡuq sì hlãq. 15Ơ pơnõq adơi sơai la mơnuĩh palơi Phi-lip, pơnõq adơi sơai kung thơu làiq dơlãp tũq chơmrờp Pơnuaĩq Siàp hũ, tũq hlãq tơviãq mưng Ma-se-đoan, ôh hũ sàc pơjũm sơđah halơi dõc pa-mơpha sigỡuq sì hlãq mưng vruãq pơgòp palơh, lơniãu nữn mĩn pơnõq adơi sơai, 16kơyua pãq anĩh Te-sa-lô-ni-ka, pơnõq adơi sơai song sa-bãc dua-bãc pơyua dơgrữq kaya angui ga hlãq. 17Nữn ôh iỡuq la hlãq chơkhãq duah kaya vrơi soh nữn, nữn hlãq chơkhãq duah voh chơtai pơtãl dơlãh dơlai dơlãp vơnah kaya hũ kuơ pơnõq adơi sơai hũ. 18Hlãq hũ tãl dơgrữq kaya sì dơlãh dơlai. Hlãq song hũ tãl, tũq tồq mãq mưng Ep-ba-phô-đĩt kaya alĩn vrơi trôh mưng pơnõq adơi sơai, la kaya bơu vơlhũ, la kaya padỡc pioh hũ tồq mãq, la kaya siàp hatai Yàc Pô Lơngĩq. 19Yàc Pô Lơngĩq hlãq hũ ròq ngãq vrơi tãl dơgrữq kaya angui pơnõq adơi sơai hũ tui yơu kaya mơda gơnãp Pitrai hũ dơlãp kaya gơhluh mưng Yàc Dõc Pơ-tlah Je-su. 20Lakơu kaya gơhluh pơweh pa Yàc Pô Lơngĩq, la Ama pơnõq drơi, tãl trôh gãm gãm ôh luôĩq. A-men.

21Lakơu chuãq rơwãc avih dơgrữq mơnuĩh gơnuar pơđar prõng dơlãp Yàc Dõc Pơ-tlah Je-su. Dơgrữq adơi sơai dòq sigỡuq sì hlãq chuãq rơwãc pơnõq adơi sơai. 22Avih dơgrữq mơnuĩh gơnuar pơđar prõng chuãq rơwãc pơnõq adơi sơai, nữn hlơu viãq la dơgrữq adơi sơai dơlãp sàc anĩh Se-sa.

23Lakơu kaya anĩt Yàc hũ, la Yàc Dõc Pơ-tlah Je-su dòq sigỡuq sì vơngãq yuà pơnõq adơi sơai. A-men.