Phi-lip 3

1Luôĩq halơi, ơ pơnõq adơi sơai hlãq hũ, iỡuq uỗt sơh dơlãp Yàc. Pơweh sì hlãq, ôh ngãq pa-sơwanh hagĩq tũq wãq wỡq gãm dơgrữq pơnuaĩq nĩ ga pơnõq adơi sơai, kơyua la kaya dadu lơngai ga pơnõq adơi sơai. 2Iỡuq iãq gơrhia pơjẽh anàq asơu, iỡuq iãq gơrhia dơgrữq mơnuĩh ngãq vruãq iãh mơsãc, iỡuq iãq gơrhia mơnuĩh ãt ơdãt sìq kalìq vlữq lor. 3Kơyua pơnõq drơi la mơnuĩh ãt adãt sìq kalìq viãq — nữn la mơnuĩh duh talơvãt mưng Vơngãq Sơđah Yàc Pô Lơngĩq hũ, hũ pa-prõc rùp dơlãp Yàc Dõc Pơ-tlah Je-su, sì ôh chàc gơnang di rơlo rùp, 4bôh làiq hlãq vloh hũ kanõh gơtha kơyua chơkhãq chàc dơlãp rơlo rùp. Mơyah làiq mơnuĩh halơi sơnơng hũ kanõh gơtha pioh chàc gơnang dơlãp rơlo rùp, nữn hlãq dòq hũ lũ rlao: 5Hlãq ãt adãt sìq kalìq dơlãp harơi talơpãn, pơweh sì vual vơla Is-ra-el, pơjẽh gah Ben-ja-min, mơnuĩh He-bơ-rơ, la anàq mơnuĩh He-bơ-rơ; mưng voh-va, la mơnuĩh Pha-ri-si; 6Mưng hatai tluỡiq gơhuar nữn mãq pakỡuq sàc pơjũm sơđah; mưng kaya tơpãq dãng tui voh-va nữn pa-thơu la ôh kaya halơi gơrloh pơkhè jỡc. 7Bôh làiq yơu nữn, avih dơgrữq kaya halơi gãm la hũ kuơ pơweh sì hlãq, nữn kơyua mưng Yàc Dõc Pơ-tlah, hlãq song iãq kaya nữn la lơhiãq soh. 8Viãq dòq rlao nữn wỡq, hlãq vloh iãq avih dơgrữq kaya kung la lơhiãq soh kơyua mưng kaya kuơ màc prõng rlao avih la kaya kơnãl thơu Yàc Dõc Pơ-tlah Je-su, Yàc hlãq hũ, kơyua Pitrai nữn hlãq song ãt lơhiãq avih — viãq, hlãq iãq kaya nữn yơu sồq siãq — tồq pioh ga hlãq hũ Yàc Dõc Pơ-tlah 9sì duah bôh dơlãp Pitrai, ôh iỡuq kơyua hũ kaya tơpãq dãng dơlãp rùp phuỗt drơi mưng voh-va nữn la kaya tơpãq dãng gơnang mưng voh tui dơlãp Yàc Dõc Pơ-tlah — nữn la kaya tơpãq dãng trôh mưng Yàc Pô Lơngĩq song padỡc dơlãp voh tui — 10pioh kơnãl thơu Pitrai sì gơnuar chơnuãq kaya hadiuq wỡq Pitrai hũ sigỡuq sì kaya salơnuãq sigỡuq dơlãp dơgrữq kaya dleh dlàr Pitrai hũ, tũq hũ va trôh anĩh drưh yơu sì kaya mơtai Pitrai hũ, 11bôh làiq duah mưng pơnẽq halơi, nữn hlãq pơlih ngãq jỡc trôh kaya hadiuq wỡq mưng kaya mơtai. 12Nữn ôh iỡuq la hlãq song tồq mãq hũ dơgrữq kaya nữn vloh, hẽla song ngãq wil tãl vloh, nữn hlãq ãn pagui tui ngãq hayơu ga drơi pơlih mơvlah mãq dơgrữq kaya sì kơyua mưng kanõh nữn, hlãq kung song hũ Yàc Dõc Pơ-tlah Je-su mơvlah mãq. 13Pa-thơu pơnõq adơi sơai, hlãq ôh sơnơng la rùp phuỗt drơi song mơvlah hũ. Nữn hlãq miẽt ngãq sa kaya: tũq wơr vẽq dơgrữq kaya halơi pãq hadơi nữn pagui tui dơgrữq kaya dòq pãq anãq, 14iãq tơpãq sa kanõh, hlãq ãn pagui tui tồq hũ kaya ban mưng kaya duỡt ruãh pãq dlòc lơngĩq Yàc Pô Lơngĩq hũ dơlãp Yàc Dõc Pơ-tlah Je-su. 15Yơu nữn, avih dơgrữq mơnuĩh halơi prõng tơgùq kung hũ dlò sơnơng yơu nữn, dòq mơyah làiq hũ kaya halơi pơnõq adơi sơai sơnơng krơi tơmo, Yàc Pô Lơngĩq kung ròq akhàt pa-tơviãq kaya nữn ga pơnõq adơi sơai. 16Bôh làiq yơu nữn, pơnõq drơi song ngãq jỡc trôh kor halơi nữn iỡuq yàp nao tui kor nữn.

17Ơ pơnõq adơi sơai, iỡuq tơviãq jỡc yơu dơgrữq mơnuĩh mơgrũ đõm tui hlãq, sì iỡuq iãq gơnĩt dơgrữq mơnuĩh ãn hadiuq dơlãp kaya ngãq nao nữn, tui yơu krơh pơnõq adơi sơai bôh dơlãp pơnõq hlãq. 18Kơyua hũ lũ mơnuĩh — la dơgrữq mơnuĩh nữn hlãq song gãm đơp miẽt sì pơnõq adơi sơai, nữn tũq nĩ hlãq vloh sià nữn đơp — pơnõq nhũ ãn hadiuq yơu mơnuĩh ngãq jơdrãq sì kayơu pỡc Yàc Dõc Pơ-tlah hũ, 19kaya luôĩq hadơi dơgrữq mơnuĩh nữn hũ la lơhiãq thĩt, yàc pơnõq nhũ la tũc tiàt pơnõq nhũ, sì kaya gơhluh pơnõq nhũ hũ dòq dơlãp vruãq ngãq đang mang mơlơu ơlah pơnõq nhũ hũ, nữn la dơgrữq mơnuĩh mĩn sơnơng trôh dơgrữq vruãq dun kơyua. 20Nữn kơyua pơnõq drơi la vual vơla hũ lơĩh pãq dlòc lơngĩq, nữn mưng anĩh nữn pơnõq drơi sơh sơr chơkhãq chàc Pitao Dõc Suãq, la Yàc, nữn la Yàc Dõc Pơ-tlah Je-su, 21la Pitao ròq pa-sơdua rùp phàp ôh kuơ màc pơnõq drơi hũ tơviãq jỡc drưh yơu sì rùp phàp gơhluh Pitrai hũ, drưh tui yơu gơnuar chơnuãq ãn ngãq vruãq Pitrai hũ tồq ga dơgrữq kaya pãc-tui drơi.