Kô-lô-se 1

1Pol, mơnuĩh gơnuar pơđar Yàc Dõc Pơ-tlah Je-su hũ tui yơu hatai ưng Yàc Pô Lơngĩq, sì Ti-mô-the la adơi sơai pơnõq drơi hũ, 2pơyua ga dơgrữq mơnuĩh pãc-tui yàc sì pơnõq adơi sơai tui tơpãq dơlãp Yàc Dõc Pơ-tlah pãq Kô-lô-se. Lakơu kaya anĩt sì kaya dadu lơngai mưng Yàc Pô Lơngĩq, la Ama sì Yàc pơnõq drơi, la Yàc Dõc Pơ-tlah Je-su, trôh pãq dlòc pơnõq adơi sơai.

3Pơnõq hlãq ỡn ngai Yàc Pô Lơngĩq, Ama Yàc Dõc Pơ-tlah Je-su, Yàc pơnõq drơi, dơlãp dơgrữq tũq pơnõq hlãq gãm iơu lakơu ga pơnõq adơi sơai, 4kơyua pơnõq hlãq song hmỡq mưng voh-tui pơnõq adơi sơai hũ dơlãp Yàc Dõc Pơ-tlah Je-su sì mưng kaya khiãng duman nữn pơnõq adơi sơai pioh ga avih dơgrữq mơnuĩh gơnuar pơđar prong, 5kơyua mưng kaya chơkhãq chàc hũ pioh lơĩh ga pơnõq adơi sơai pãq dlòc dơgrữq tãl lơngĩq, la kaya nữn pơnõq adơi sơai song hmỡq mưng halơu dơlãp jơlàt tui pơnuaĩq tơpãq hũ, nữn la Pơnuaĩq Siàp, 6la kaya ãn ngãq tơviãq di khrãh pơnõq adơi sơai, nữn Pơnuaĩq Siàp nữn ãn chơtai voh sì hũ prõng tơgùq vãq avih dun kơyua la yơu halơi, nữn kung yơu nữn dòq dlãp pơnõq adơi sơai, mưng tũq harơi pơnõq adơi sơai song hmỡq sì mơgrũ thơu kaya anĩt Yàc Pô Lơngĩq hũ dơlãp pơnuaĩq tơpãq, 7drưh yơu pơnõq adơi sơai song mơgrũ thơu mưng E-phap-ra, mơnuĩh ngãq vruãq sigỡuq anĩt duman pơnõq hlãq hũ, nhũ la sa aràc mơnuĩh halỗt mơnãq tui tơpãq Yàc Dõc Pơ-tlah hũ ala mơta ga pơnõq hlãq, 8sì la mơnuĩh song akhàt tơviãq ga pơnõq hlãq thơu kaya khiãng duman pơnõq adơi sơai hũ dơlãp Vơngãq Sơđah.

9Kơyua kaya khiãng duman nữn, mưng harơi pơnõq hlãq hmỡq yơu nữn, nữn pơnõq hlãq ôh padưh iơu lakơu ga pơnõq adơi sơai sì rãn lakơu ga pơnõq adơi sơai, tồq pioh ga pơnõq adơi sơai hũ vãq sơrè kaya pãc thơu tui hatai ưng Pitrai dơlãp dơgrữq kaya jãc rgơi sì sơnơng thơu gah suàt vơngãq, 10pioh yàp nao savĩq đang mang sì Yàc dơlãp dơgrữq kaya siàp hatai Pitrai, hũ voh chơtai dơlãp dơgrữq vruãq ngãq siàp, hũ prõng tơgùq dơlãp kaya kơnãl thơu Yàc Pô Lơngĩq, 11hũ prãn khãc gãm sì vãq sơrè kaya prãn tui yơu gơnuar chơnuãq gơhluh Pitrai hũ, pioh ngãq jỡc trôh dơgrữq kaya ãt ỡl sì ãt gơjãp mưng hatai uỗt sơh, 12padỡc tơgùq pơnuaĩq ỡn ngai Ama, Pitao song ngãq ga pơnõq adơi sơai đang mang pioh tồq mãq sigỡuq dơlãp vơnah apôh hama gãm sì dơgrữq mơnuĩh gơnuar pơđar prõng dơlãp kaya sơdah. 13Rùp phuỗt Pitao nữn song dõc suãq pơnõq drơi tơviãq tlah mưng gơnuar prãn kaya sồp kơnãm, sì va pơnõq drơi tơma dơlãp palơi lơgar Anàq khiãng duman Pitrai hũ, 14dơlãp Anàq nữn, pơnõq drơi hũ kaya dơvuh sơlih, nữn la kaya wàq tơleh dlàiq dơnũh. 15Anàq nữn la sẽq vơlai Yàc Pô Lơngĩq hũ ôh bôh jỡc, la Pitao pajỡc tơviãq halơu avih dơlãp dơgrữq kaya chrơng pajỡc. 16Kơyua dơlãp Anàq, dơgrữq kaya pãq dlòc lơngĩq gãm sì pãq ala voh hlùq, kaya drơi bôh gãm sì kaya drơi ôh bôh, song kung hũ chrơng pajỡc. Bôh làiq la sơvan pitao, hẽla mơnuĩh apãt akõq, hẽla hũ gơnuar, hẽla gơnuar chơnuãq, nữn avih dơgrữq kaya kung hũ pajỡc tơviãq kơyua mưng Anàq sì kơyua Anàq. 17Anàq nữn hũ halơu dơgrữq kaya, sì dơgrữq kaya salơnuãq sigỡuq dơlãp Anàq. 18Anàq nữn kung la akõq rùp phàp, nữn la Sàc Pơjũm Sơđah. Rùp phuỗt Anàq nữn la pơdòq phuỗt akhà, la Pitao pajỡc tơviãq halơu avih mưng di khrãh mơnuĩh mơtai, tồq ga Anàq nữn ngãq Pitao apãt akõq pãq dlòc dơgrữq kaya. 19Kơyua Yàc Pô Lơngĩq song siàp hatai pioh ga dơgrữq kaya wil tãl dòq dơlãp Anàq, 20sì mưng Anàq pioh ngãq salơnuãq dơgrữq kaya sì rùp phuỗt Pitrai, bôh làiq dơgrữq kaya gah ala voh hlùq, hẽla dơgrữq kaya pãq dlòc lơngĩq, kơyua song va trôh kaya ngãq sa lơnuãq mưng Anàq nữn, gơnang mưng dơrãh pãq dlòc kayơu pỡc Anàq hũ. 21Tũq halơu drơi, pơnõq adơi sơai kađòc iãq la mơnuĩh chrih sì la mơnuĩh jơdrãq dơlãp kaya sơnơng, dơlãp dơgrữq vruãq iãh mơsãc, 22nữn tũq nĩ, pơnõq adơi sơai song hũ ngãq salơnuãq gơnang mưng kaya mơtai dơlãp rùp phàp Anàq hũ, pioh pabôh mơta pơnõq adơi sơai di anãq Pitrai, la dơgrữq mơnuĩh sơđah sơchih, ôh halôh nỡm, sì ôh hũ kaya pioh gơrloh pơkhè, 23mĩn la pơnõq adơi sơai miẽt dòq dơlãp voh-tui, ãt tơviãq akhà, gơjãp khãc, sì ôh pađuỡt tlah mưng kaya chơkhãq chàc gơnĩt viãq Pơnuaĩq Siàp hũ nữn pơnõq adơi sơai song hmỡq, la Pơnuaĩq Siàp song hũ akhàt vrơi pa-thơu ga dơgrữq kaya chrơng pajỡc pãq ala lơngĩq, sì kơyua nữn, hlãq, Pol, song tơviãq jỡc sa aràc mơnuĩh halỗt mơnãq.

24Tũq nĩ hlãq uỗt sơh dơlãp dơgrữq kaya rũc rài drơi hũ kơyua mưng pơnõq adơi sơai, sì mưng rơlo rùp drơi, hlãq ãn pơtãl wỡq dơgrữq vơnah dòq siẽuq dơlãp dơgrữq kaya pơđìq pơđua Yàc Dõc Pơ-tlah hũ, kơyua mưng rùp phàp Pitrai, nữn la Sàc Pơjũm sơđah, 25nữn kơyua nữn, hlãq song tơviãq jỡc sa aràc mơnuĩh halỗt mơnãq, tui yơu kaya apãt akõq Yàc Pô Lơngĩq hũ, nữn vruãq nữn song hũ pơjao ga hlãq kơyua mưng pơnõq adơi sơai, tồq ngãq wil tãl vruãq pơto akhàt pơnuaĩq Yàc Pô Lơngĩq hũ, 26nữn la kaya dơlãp dơđỡuq song hũ padỡuq dơđỡuq tơpa gãt mưng dơgrữq thũt sì dơgrữq rài, nữn tũq nĩ, kaya dơlãp dơđỡuq nữn song hũ ràc pabôh tơviãq ga dơgrữq mơnuĩh gơnuar pơđar prõng Pitrai hũ, 27la dơgrữq mơnuĩh nữn Yàc Pô Lơngĩq ưng ràc tơviãq yơu halơi la kaya mơda gơnãp gơhluh kaya dơlãp dơđỡuq nĩ hũ di khrãh dơgrữq vual vơla lơniãu, nữn la Yàc Dõc Pơ-tlah dòq dơlãp pơnõq adơi sơai, nữn la kaya chơkhãq chàc gơhluh. 28Nữn la Pitao nữn pơnõq hlãq akhàt vrơi pa-thơu, tũq gơrhia halơu ga dơgrữq mơnuĩh, sì pơto pơđar dơgrữq mơnuĩh mưng dơgrữq kaya jãc rgơi, pioh pơnõq hlãq pơlih pabôh mơta dơgrữq mơnuĩh tơviãq la wil tãl dơlãp Yàc Dõc Pơ-tlah. 29Kung kơyua mưng kaya nữn nữn hlãq dleh dlàr, rãn mơsôh tui yơu vruãq ngãq Pitrai hũ ãn ngãq vruãq mưng gơnuar chơnuãq dơlãp hlãq.