Lu-ka 6:31

1Dơlãp harơi Sa-bat, Yàc Je-su ãn nao gãt dơgrữq blàc hamã vơdai mi, sì dơgrữq mơnuĩh mơgrũ Pitrai sơpuãq vơngà vơdai mi, rơsao pãq tơngãn, vloh bõc. 2Nữn hũ sa tơkìq mơnuĩh Pha-ri-si đơp: “Hayơu pơnõq sơai ngãq kaya ôh hũ vrơi gơnuar ngãq dơlãp harơi Sa-bat?” 3Tũq hẽ pơnuaĩq sì pơnõq nhũ, Yàc Je-su đơp sì pơnõq nhũ: “Pơnõq ung ka-ôh pơpoh mưng vruãq sì Đa-vit song ngãq tũq pitao sì dơgrữq mơnuĩh dòq sigỡuq sì nhũ kađòc lơpa yơh? 4Yơu hayơu Pitao ròq tơmã dơlãp sàc Yàc Pô Lơngĩq, mãq bẽn pioh padỡc, pitao mãq bõc, sì vrơi ga dơgrữq mơnuĩh nao sigỡuq sì nhũ, sì bẽn nữn ôh hũ gơnuar mãq bõc, lơniãu pô pioh kaya duh talơvãt nữn hũ gơnuar.” 5Vloh Pitrai đơp sì pơnõq nhũ: “Anàq Mơnuĩh la Yàc harơi Sa-bat hũ.”

6Hũ dơlãp sa harơi Sa-bat tơmo, Pitrai tơmã dơlãp sàc pơtõm pioh pơto pơđar, sì pãq đỡn hũ sa aràc mơnuĩh ung, plàq tơngãn hơnuãq sơai nữn ròq kađòc krao. 7Dòq dơgrữq mơnuĩh gơnuar pơto voh-va sì mơnuĩh Pha-ri-si iãq gơnĩt pioh dio mưng Pitrai, iãq mưng Pitrai hũ pasồq pakhơĩh dơlãp harơi Sa-bat lơĩh, nữn pơnõq nhũ pioh duah pơnẽq hũ yãq dlàiq Pitrai. 8Nữn Pitrai thơu kaya sơnơng pơnõq nhũ hũ, vloh Pitrai đơp sì mơnuĩh kađòc krao tơngãn làiq: “Iỡuq tơgùq dữc vẽq sì tơviãq dòq dữc pãq khrãh dơgrữq mơnuĩh.” Sơai nữn tơgùq dữc sì tơviãq dữc pãq đỡn. 9Yàc Je-su đơp sì pơnõq nhũ: “Kơu tơnĩa pơnõq ung, mơyah làiq iỡuq tui voh-va dơlãp harơi Sa-bat nữn ngãq vruãq siàp hẽla ngãq vruãq mơsãc, dõc mơnuĩh hadiuq hẽla pa-mơtai mơnuĩh?” 10Hadơi nữn iãq bôh dơgrữq mơnuĩh tòp dar, Pitrai đơp sì sơai nữn: “Iỡuq yơr tơngãn sơai nữn tơviãq.” Sơai ngãq tui sì plàq tơngãn sơai hũ pasồq. 11Nữn pơnõq nhũ hũ hatai nong sì lơmùq mơvai nữn vơyai sigỡuq iãq pơnõq nhũ pơlih ngãq hagĩq ga Yàc Je-su.

12Dơlãp dơgrữq harơi nữn, nữn Pitrai nao pãq chỡq pioh iơu lakơu, sì Pitrai ròq mơ-uãh mơlãp dơlãp kaya iơu lakơu sì Yàc Pô Lơngĩq. 13Tũq harơi vơhrơu ròq trôh, Pitrai iơu dơgrữq mơnuĩh mơgrũ nhũ, sì duỡt rơwah sa plôh dua aràc mơnuĩh dơlãp pơnõq nhũ, nữn Pitrai kung iơu sa plôh dua aràc mơnuĩh nữn la gơnuar pơđar, 14Si-môn nữn, Pitrai kung pa-angãn la Pier, adơi lakơi ung la An-dre, Ja-kơ, Jãng, Phi-lip, Ba-the-le-my, 15Ma-thi-ơ, Thô-ma, Jãng anàq A-phe, Si-môn la mơnuĩh hũ angãn la Se-lôt; 16Ju-đa anàq Ja-kơ, sì Ju-đa Is-ka-ri-ôt la mơnuĩh tơviãq jỡc mơnuĩh jơdrãq sì Pitrai. 17Hadơi sì tũq nữn trỗt sigỡuq sì pơnõq nhũ, Pitrai dòq dữc hũ sa anĩh blàc hlùq đão rĩng, sigỡuq sì tơpuôl lũ dơgrữq mơnuĩh mơgrũ Pitrai, sì lũ tơpuôl vual vơla trôh mưng vãq avih phũm Ju-đe sì Je-ru-sa-lem, kung yơu phũm gah tơsìq Ti-rơ sì Si-đôn, 18dơgrữq mơnuĩh nữn ròq trôh pioh pa-hmỡq Pitrai pơto pơđar sì pioh hũ Pitrai pasồq pakhơĩh avih dơgrữq ruãq sơkìq nhũ hũ. Dơgrữq mơnuĩh kađòc kamlai mơsãc ãp lũ kung hũ pasồq pakhơĩh avih. 19Avih tơpuôl vual vơla miẽt duah pơnẽq ưng rawỡq trôh pãq Pitrai kơyua gơnuar chơnuãq tơviãq mưng Pitrai sì pasồq pakhơĩh ga avih dơgrữq tãl aràc mơnuĩh.

20Vloh Yàc Je-su angơìq mơta iãq dơgrữq mơnuĩh mơgrũ Pitrai hũ, sì đơp: “Lơngai ga pơnõq adơi sơai la mơnuĩh rơbah la-ơi, kơyua mưng lơgar Yàc Pô Lơngĩq la pơweh sì adơi sơai hũ. 21Lơngai ga pơnõq adơi sơai ãn dòq lơpa, kơyua nữn pơnõq adơi sơai ròq hũ tarơi tũc. Lơngai ga pơnõq adơi sơai ãn dòq sia chõq, kơyua mưng nữn pơnõq adơi sơai ròq hũ uỗt sơh. 22Pơnõq adơi sơai hũ lơngai dơlãp tũq aràc lơmùq mơvai di adơi sơai, tũq pơnõq nhũ prah luơi pơnõq adơi sơai, đơp siẽq siẽl sì kơmlah tlàq angãn adơi sơai yơu mơnuĩh brưh mơsãc kơyua mưng Anàq Mơnuĩh. 23Dơlãp harơi nữn, iỡuq sơh sơr sì plõc tơgùq uỗt sơh kơyua, iãq dih, kaya phãn ban pơnõq adơi sơai pãq dlòc lơngĩq la prõc viãq, kơyua ung kõq pơnõq nhũ hũ song pơweh ga dơgrữq sì mơnuĩh gơnuar hwơr tui yơu nữn. 24Bôh làiq, dleh dlàr ga pơnõq adơi sơai, la mơnuĩh mơda gơnãp, kơyua pơnõq adơi sơai song tồq mãq hũ kaya paluơ padờp drơi hũ vloh. 25Dleh dlàr ga pơnõq adơi sơai la mơnuĩh ãn tarơi tũc, kơyua pơnõq adơi sơai ròq lơpa. Dleh dlàr ga pơnõq adơi sơai ãn dòq sơh sơr tlao, kơyua pơnõq adơi sơai ròq ka-ùq ka-ãn sì sia chõq. 26Dleh dlàr ga pơnõq adơi sơai tũq dơgrữq aràc mơnuĩh hũ pơnuaĩq mơyòp mưng drơi, kơyua mưng ung kõq pơnõq nhũ kung pơweh tui pơnẽq yơu nữn sì dơgrữq mơnuĩh gơnuar hwơr vlữq lor.

27Nữn Kơu đơp sì pơnõq adơi sơai, dơgrữq aràc halơi ãn dòq hmỡq, iỡuq khiãng duman mơnuĩh sòq drãq dì drơi sì iỡuq ngãq savĩq siàp ga mơnuĩh mơvai lơmùq dì drơi. 28Iỡuq vrơi lơngai ga mơnuĩh sơtãp lơmah pơnõq adơi sơai sì iỡuq iơu lakơu ga mơnuĩh đơp siẽq siẽl pơnõq adơi sơai. 29Pơweh sì asơi pah miãng pơnõq adơi sơai gah nĩ, iỡuq vrơi wỡq miãng gah dĩh, dòq aràc asơi tlẽq sơwah ao lơniãu pơnõq adơi sơai hũ, nữn pơnõq adơi sơai kung juơi apãt katũc ao dơlãp tlah di mơnuĩh nữn. 30Aràc halơi lakơu pơnõq adơi sơai, iỡuq vrơi vẽq, sì juơi đồq wỡq mưng mơnuĩh nữn mãq kaya hagĩq pơnõq adơi sơai hũ. 31Pơnõq adơi sơai ưng aràc ngãq ga drơi yơu halơi, iỡuq ngãq kaya nữn ga pơnõq nhũ yơu nữn mĩn. 32Mơyah làiq pơnõq adơi sơai anĩt dơgrữq aràc halơi anĩt drơi, nữn la hũ kaya anĩt hagĩq pơweh sì adơi sơai drơi? Kơyua nữn mư mưng mơnuĩh hũ dlàiq kung anĩt drơi yơu nữn. 33Mơyah làiq pơnõq adơi sơai ngãq siàp sì mơnuĩh ngãq siàp sì drơi, nữn la hũ kaya anĩt hagĩq pơweh sì pơnõq adơi sơai? Mơnuĩh hũ dlàiq kung ngãq yơu nữn. 34Mơyah làiq pơnõq adơi sơai vrơi ga aràc anham sì chơkhãq khiãng adơi sơai iỡuq tồq mãq vẽq kaya pơnõq nhũ, nữn la kaya anĩt pơweh sì adơi sơai? Mơnuĩh hũ dlàiq kung vrơi ga mơnuĩh hũ dlàiq anham, pioh tồq mãq wỡq yơu nữn. 35Nữn iỡuq anĩt mơnuĩh sòq drãq sì drơi sì ngãq siàp ga pơnõq nhũ, iỡuq vrơi anham sì juơi mãq wỡq, nữn hũ tồq mãq kaya phãn ban pơnõq adơi sơai ròq prõc viãq, pơnõq adơi sơai la anàq Pitao Dloòng Dlòc Rlao Avih, kơyua Pitrai gãm lơmuỡn siàp pơweh sì mơnuĩh ôh hũ kaya anĩt sì brữh mơsãc. 36Iỡuq hũ anĩt duman, yơu Ama pơnõq adơi sơai hũ hatai anĩt duman. 37Juơi chahrơna, nữn adơi sơai ròq ôh kađòc chahrơna. Juơi ngãq dlàiq nữn adơi sơai ròq ôh kađòc kaya ngãq dlàiq. Iỡuq tơleh dlàiq, nữn adơi sơai ròq hũ tơleh dlàiq. 38Iỡuq vrơi vẽq, nữn kaya ròq hũ vrơi ga pơnõq adơi sơai: sa vơnãh sơkãq — hũ gơlìq jẽh ngãq ga vãq sơrè — vloh tôh tơma kanui ao adơi sơai. Kơyua pơnõq adơi sơai sơkãq ga aràc kor halơi nữn pơnõq nhũ ròq sơkãq wỡq ga adơi sơai kor nữn.”

39Pitrai kung akhàt ga pơnõq nhũ sa pơnuaĩq pa-mayơu: “Mơnuĩh vùp ôh tũq halơi va jơlàt mơnuĩh vùp, iỡuq lơĩh? Ôh iỡuq la avih dua aràc ròq lơvuh tơmã dơlãp lơvàc yơh? 40Mơnuĩh mơgrũ nữn ôh rlao dì pôgrũ, nữn dơgrữq aràc mơnuĩh tũq hũ pa-mơgrũ wil tãl ròq tơviãq drưh yơu pôgrũ drơi. 41Kơyua hagĩq pơnõq adơi sơai iãq bôh harô dơlãp mơta adơi sơai drơi, sì pơnõq adơi sơai vloh ôh bôh kayơu dơra dơlãp mơta drơi hũ? 42Ngãq hayơu pơnõq adơi sơai pơlih hũ đơp sì adơi sơai drơi: ‘Ơ sơai, iỡuq vrơi hlãq mãq harô dơlãp mơta sơai tơviãq’ tũq rùp phàp pơnõq adơi sơai ôh iãq bôh bẽq kayơu dơra dơlãp mơta drơi hũ? Mơnuĩh vlữq lor dih! Hlơu viãq, iỡuq mãq bẽq kayơu tơviãq mưng mơta drơi, vloh nữn pơnõq adơi sơai iãq bôh nĩq nũn iỡuq mãq harô dơlãp mơta adơi sơai drơi. 43Kơyua ôh hũ kayơu siàp halơi tơviãq voh iãh, vơnãh tơmo, nữn kung ôh hũ kayơu iãh halơi tơviãq voh siàp. 44Kơyua mưng dơgrữq kayơu hũ tồq thơu làiq gơnang di voh kayơu nữn. Anàq mơnuĩh ôh pẽq voh kayơu vãl dơlãp bôr druơi, pơnõq nhũ kung ôh pẽq voh nho pãq anĩh bôr vrìq. 45Mơnuĩh siàp mưng kaya pioh rơmiãq hatai lơmuỡn siàp sì tũc hatai tơviãq jỡc vruãq siàp, dòq mơnuĩh mơsãc mưng dơlãp kaya mơsãc tơviãq jỡc kaya mơsãc. Kơyua mưng kaya vãq sơrè dơlãp hatai nữn chơbuai drơi đơp tơviãq.

46Hayơu pơnõq adơi sơai iơu kơu: ‘Yàc, Yàc,’ nữn ôh ngãq tui pơnuaĩq kơu pơto pơđar? 47Kơu ròq vrơi ga pơnõq adơi sơai thơu mơnuĩh halơi trôh pãq kơu, hmỡq pơnuaĩq kơu sì ngãq tui dơgrữq pơnuaĩq nữn ròq yơu aràc halơi. 48Mơnuĩh nữn drưh yơu mơnuĩh vữq sàc, sì mơnuĩh nĩ ròq plà hlùq chõh dơlãp sì ngãq ranỡq pãq dlòc patơu tali. Vloh nữn, tũq ia blỗc sỡm nãi tơgùq trôh, ia đuaĩq prãn khãc tơmã sàc nữn, nữn ôh tũq halơi mơgơi jỡc, kơyua sàc song hũ padỡc gơjãp kađữc. 49Dòq mơnuĩh hmỡq pơnuaĩq nữn ôh ngãq tui nữn drưh yơu sa aràc mơnuĩh vữq padỡc sàc pãq dlòc hlùq ôh hũ ranỡq, tũq ia sỡm nãi blũc prãn tơmã sàc nữn, nữn nhũ kađòc jơlưh, sì tơyah tơyai sàc nữn la viãq prõc.”